ທະນາຄານແຫ່ງ ສປປ ລາວ (ທຫລ) ໄດ້ໃຊ້ 3 ນະໂຍບາຍເຂົ້າຊ່ວຍຜູ້ປະສົບໄພໃນຂອບເຂດທົ່ວປະເທດ ເພື່ອເປັນສ່ວນໜຶ່ງໃນການຊ່ວຍເຫຼືອຜູ້ປະສົບໄພພິບັດຈາກທໍາມະຊາດ ແລະ ພະຍາດລະບາດໃນລະດູຝົນປີ 2018 ທີ່ຜ່ານມາ ໂດຍສະເພາະໃນຂະແໜງກະສິກໍາ ພ້ອມທັງມອບໃຫ້ທະນາຄານທຸລະກິດ (ທທກ) ເພີ່ມທະວີຈັດຕັ້ງປະຕິບັດນະໂຍບາຍດັ່ງກ່າວ ພ້ອມແນໃສ່ການຜະລິດເຂົ້າລະດູແລ້ງປີ 2019 ໃຫ້ໄດ້ 1 ແສນເຮັກຕາ ແລະ ພືດລະດູແລ້ງ 1,85 ແສນເຮັກຕາ ໃຫ້ມີປະສິດທິພາບ ແລະ ບັນລຸຕາມແຜນທີ່ວາງໄວ້.
ທ່ານ ສອນໄຊ ສິດພະໄຊ ຜູ້ວ່າການ ທຫລ ໄດ້ຊີ້ແຈງຕໍ່ຄໍາຊັກຖາມຂອງສະມາຊິກ ສະພາແຫ່ງຊາດ ໃນກອງປະຊຸມຜ່ານມາວ່າ: ຕໍ່ກັບສະພາບຄວາມເຫຍຫາຍຈາກຜົນກະທົບຈາກໄພພິບັດທາງທໍາມະຊາດ ແລະ ພະຍາດລະບາດ ຈະສືບຕໍ່ໃຊ້ 3 ນະໂຍບາຍສິນເຊື່ອທີ່ໄດ້ແຈ້ງອອກໃນທ້າຍປີ 2017 ເພື່ອຊ່ວຍໃນການແກ້ໄຂບັນຫາດັ່ງກ່າວ ໂດຍມອບໃຫ້ ທທກ ຈັດຕັ້ງປະຕິບັດຕໍ່ລູກຄ້າທີ່ໄດ້ຮັບຜົນກະທົບ ເຊິ່ງປະກອບໃຫ້ມີທຶນ ແລະ ດອກເບ້ຍໃຫ້ລູກຄ້າທີ່ໄດ້ຮັບຜົນກະທົບຄື: ໃຫ້ ທທກ ເລື່ອນເວລາຊໍາລະໜີ້ ລວມທັງຕົ້ນທຶນ ແລະ ດອກເບ້ຍ; ສະໜອງເງິນກູ້ບ້ວງໃໝ່ໃຫ້ສະເພາະລູກຄ້າທີ່ໄດ້ຮັບຜົນກະທົບ ແລະ ເປັນຜູ້ທີ່ໄດ້ຮັບຜົນເສຍຫາຍ ຈາກໄພທໍາມະຊາດຕາມເງື່ອນໄຂຕົວຈິງ; ສຸດທ້າຍ, ຮັບນະໂຍບາຍຜ່ອນຜັນຍົກເວັ້ນບາງມາດຕາຂອງຂໍ້ຕົກລົງ ວ່າດ້ວຍການຈັດຊັ້ນໜີ້ ແລະ ການຫັກເງິນແຮໜີ້ ທີ່ຖືກຈັດຊັ້ນຂອງທະນາຄານທຸລະກິດ, ພ້ອມທັງມອບໃຫ້ ທທກ ເພີ່ມທະວີຈັດຕັ້ງປະຕິບັດນະໂຍບາຍດັ່ງກ່າວ ເພື່ອແນໃສ່ຮັບປະກັນໃຫ້ການຜະລິດເຂົ້ານາແຊງ 1 ແສນເຮັກຕາ ແລະ ພືດລະດູແລ້ງ 1,85 ແສນເຮັກຕາ ໃນປີ 2019 ໃຫ້ໄດ້ຮັບປະສິດທິພາບ ແລະ ບັນລຸຕາມແຜນການ.
ອີງຕາມຂໍ້ມູນຈາກໜ່ວຍງານກ່ຽວຂ້ອງຂອງລັດຖະບານ ເປີດເຜີຍກ່ອນໜ້ານີ້ວ່າ: ໃນລະດູຝົນ 2018 ທົ່ວປະເທດ ມີຜູ້ໄດ້ຮັບຜົນກະທົບຈາກໄພພິບັດທາງທໍາມະຊາດ ແລະ ພະຍາດລະບາດ ໂດຍສະເພາະການຜະລິດເຂົ້ານາປີ ໃນປີ 2018 ມີຜົນກະທົບທັງໝົດ 1,19 ແສນເຮັກຕາ, ເສຍຫາຍ 12% ຂອງພື້ນທີ່ປັກດໍາ ຖືວ່າເກີນຄ່າເຕືອນໄພຂອງການຄໍ້າປະກັນຄວາມໝັ້ນຄົງທາງດ້ານສະບຽງອາຫານຂອງຊາດ ເຊິ່ງຜົນຜະລິດເຂົ້ານາປີໄດ້ພຽງ 3,2 ລ້ານໂຕນ, ຂາດປະມານ 3 ແສນໂຕນ, ເນື້ອທີ່ປູກພືດໄດ້ຮັບ 11,6 ພັນເຮັກຕາ ແລະ ສັດລ້ຽງ ກັບໜອງປາຈໍານວນຫຼາຍເຮັກຕາທີ່ໄດ້ຮັບຄວາມເສຍຫາຍ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ