ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດອາເມລິກາ ເມື່ອວັນທີ 18 ທັນວາ 2018 ວ່າ ສານເຂດລໍເຣນ ໃນລັດມິສຊູຣີ ມີຄຳພິພາກສາຕັ້ງແຕ່ວັນທີ 31 ທັນວາ 2017 ໃຫ້ທ້າວ ແບຣ໌ຣີ ຈູເນຍ, ທ້າວ ເດວິດ ແບຣ໌ຣີ ຊີເນຍ (ຜູ້ເປັນອ້າຍ) ແລະ ທ້າວ ໄຄລ໌ ແບຣ໌ຣີ (ຜູ້ເປັນພໍ່) ໃນຄະດີລັກລອບລ່າສັດປ່າໂດຍສະເພາະກວາງ “ຫຼາຍຮ້ອຍໂຕ” ແລະ ຕັດເອົາສະເພາະແຕ່ສ່ວນຫົວກວາງໄປປະດັບຕາມຝາເຮືອນ ຕັ້ງແຕ່ປີ 2015 ໂດຍລົງໂທດຈຳຄຸກເປັນເວລາ 1 ປີ, ຫຼັງຄົບກຳນົດທັງສາມຕ້ອງຍ້າຍໄປຮັບໂທດຈຳຄຸກຕໍ່ອີກ 120 ວັນ ທີ່ຄຸກໃນເຂດບາຣ໌ຕັນ ໂທດຖານລະເມີດກົດໝາຍອາວຸດປືນ ແລະ ທາງການລັດມິສຊູຣີໄດ້ຖອດຖອນໃບອະນຸຍາດລ່າສັດຂອງຈຳເລີຍທັງ 3 ຕະຫຼອດຊີວິດ ພ້ອມທັງປັບໄໝຄ່າເສຍຫາຍຮ່ວມກັນເປັນເງິນ 51.000 ໂດລາ.
ມີການເປີດເຜີຍໃນອາທິດນີ້ວ່າໄດ້ສັ່ງໃຫ້ ທ້າວ ເດວິດ ແບຣ໌ຣີ ຈູເນຍ ໄວອາຍຸ 29 ປີ ຕ້ອງເບິ່ງກາຕູນເລື່ອງ “ແບມບີ້” ຢ່າງໜ້ອຍເດືອນລະ 1 ຄັ້ງ ລະຫວ່າງຢູ່ໃນຄຸກ. ສ່ວນ ທ້າວ ເດວິດ ແບຣຣີ ຊີເນຍ (ອ້າຍ) ແລະ ທ້າວ ໄຄລ໌ ແບຣຣີ (ພໍ່) ບໍ່ມີລາຍງານຊັດເຈນວ່າຕ້ອງໄດ້ເບິ່ງກາຕູນແບມບີ້ຄືກັນ ຫຼື ບໍ່.
https://www.facebook.com/ABCWorldNewsNow/videos/988662411330232/
ດ້ານໄອຍະການເຂດລໍເຣນກ່າວສະແດງຄວາມຫວັງວ່າການເບິ່ງກາຕູນເລື່ອງນີ້ຈະຊ່ວຍກ່ອມໃຈທ້າວ ແບຣຣີ ຈູເນຍ ໂດຍກາຕູນເລື່ອງແບມບີ້ ອອກສາຍຄັ້ງທຳອິດໃນປີ 1942 ເປັນເລື່ອງເລົ່າຂອງລູກກວາງເພດຜູ້ຊື່ແບມບີ້ ທີ່ໃຊ້ຊີວິດລຳພັງທ່າມກາງເພື່ອນສັດນານາສາຍພັນໃນປ່າ ມີທັງສາກສະເທືອນໃຈຜູ້ຊົມຫຼາຍທີ່ສຸດ ເຊິ່ງທາງດິສນີ (ບໍລິສັດຜູ້ຜະລິດກາຕູນ ແລະ ໜັງ) ມີຈຸດປະສົງເພີ່ມການປູກຈິດສຳນຶກຂອງມະນຸດໃນການອະນຸລັກ ແລະ ບໍ່ຄຸກຄາມສັດປ່າ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews
ວິດີໂອປະກອບຂ່າວ: World News Now