ຄວາມມະຫັດສະຈັນ ທີ່ສົ່ງຕໍ່ຄຸນຄ່າ ແລະ ໂອກາດໃຫ້ແກ່ແມ່ຍິງລາວ
ໃນຮ່ອມນ້ອຍໆໃຈກາງເມືອງວຽງຈັນ ເປັນສະຖານທີ່ຕັ້ງຂອງໂຮງງານມະຫັດສະຈັນ ຫັດຖະກຳ
ຕໍ່າພົມລາວ ເຊິ່ງເປັນບ່ອນກຳເນີດງານສີມືອັນປານີດທີ່ງົດງາມອີກຂະແໜງໜຶ່ງຂອງຫັດຖະກຳລາວ. ເມື່ອທ່ານກ້າວເຂົ້າໄປດ້ານໃນ ທ່ານຈະເຫັນກີ່ສິບກວ່າກີ່ ຕັ້ງລຽນກັນຢ່າງເປັນລະບຽບ, ກີ່ຂອງຫັດຖະກຳຊະນິດນີ້ເປັນກີ່ຊົງຕັ້ງ ຕ່າງຈາກກີ່ຕໍ່າຫູກທົ່ວໄປ ແລະ ແຕ່ລະກີ່ຈະມີຄົນຕໍ່າແຕ່ 2–3 ຄົນ ຫຼື ບາງຄັ້ງກໍ່ມີເຖິງ 4–9 ຄົນ!
ມືຂອງເຂົາເຈົ້າແມ່ນສອດເສັ້ນໄໝຢ່າງວ່ອງໄວ ແລະ ສາຍຕາທີ່ມຸ່ງໝັ້ນປຽບດັ່ງບໍ່ຍອມໃຫ້ຄວາມຜິດພາດໃດໆເກີດຂຶ້ນກັບຜົນງານຊິ້ນເອກຂອງພວກເຂົາເຈົ້າໄດ້ເລີຍ ການສ້າງສັນຜົນງານດ້ວຍຈິນຕະນາການທີ່ສີມືລະອຽດອ່ອນ, ປານີດ ດ້ວຍເສັ້ນໄໝທຳມະຊາດ ແລະ ສີຍ້ອມຈາກພືດທຳມະຊາດທີ່ເປັນມິດກັບສິ່ງແວດລ້ອມ ແລະ ລວດລາຍທີ່ມີເອກະລັກພື້ນເມືອງບົ່ງບອກເຖິງວັດທະນະທຳລາວທີ່ມີຄວາມໂດດເດັ່ນ ໃຊ້ເວລາຍາວນານຈິ່ງສຳເລັດ ເຊິ່ງຈະໄດ້ມອບຄຸນຄ່າທີ່ເໜືອກາລະເວລາໃຫ້ແກ່ລູກຄ້າ.
ສ່ວນຫຼາຍເຮົາຈະເຫັນວ່າເສັ້ນໄໝຂອງລາວ ມັກຖືກນິຍົມຕໍ່າເປັນສິ້ນ, ເສື້ອ, ຜ້າພັນຄໍ ແລະ ເຄື່ອງນຸ່ງຫົ່ມແບບອື່ນໆ . ແຕ່ທ່ານ ນາງ ສຸວິຕາ ປະເສີດ ຫຼື ເອື້ອຍລານີ ໄດ້ນຳເສັ້ນໄໝທີ່ທົນທານ ແລະ ສວຍງາມເຫຼົ່ານີ້ມາປະດິດສ້າງເປັນຜົນງານຫັດຖະກຳ ຂະແໜງໃໝ່ ນັ້ນກໍຄື “ພົມໄໝມ້ອນລາວ” ທີ່ຊ່າງສີມືໜຸ່ມນ້ອຍເຫຼົ່ານີ້ກຳລັງເຮັດຢູ່ນັ້ນເອງ.
ມະຫັດສະຈັນ ຫັດຖະກຳ ຕໍ່າພົມລາວ ໄດ້ລວມເອົາປະເພນີຫັດຖະກຳຕໍ່າແຜ່ນແພພື້ນເມືອງຂອງລາວເຮົາ ປະສົມປະສານກັບເຕັກນິກໃໝ່ຈາກພາກກາງຂອງທະວີບອາຊີ ມາສ້າງສັນຜົນງານທີ່ມີເອກະລັກພິເສດ ເຊິ່ງບໍ່ແມ່ນຜະລິດຕະພັນຫັດຖະກຳທຳມະດາທົ່ວໄປ ແຕ່ແມ່ນ ຜະລິດຕະພັນວິຈິດສິນ.
ດ້ວຍຄວາມພະຍາຍາມຕະຫຼອດເກືອບ 20 ປີ ເອື້ອຍລານີ ແລະ ສາມີ ໄດ້ຖັກທໍມົນສະເໜ່ເໜືອກາລະເວລາ ແລະ ມອບໂອກາດໃຫ້ແກ່ແມ່ຍິງລາວທຸກຄົນທີ່ໄດ້ຮ່ວມຄວາມຝັນໄປກັບພວກເພິ່ນ, ສົ່ງເສີມກໍ່ສ້າງວິຊາຊີບຫັດຖະກຳຂະແໜງນີ້ໃຫ້ເອື້ອຍນ້ອງ ເພື່ອຊ່ວຍເຫຼືອຫຼຸດຜ່ອນ ໄພສັງຄົມ-ໄພຢາເສບຕິດ ແລະ ການວ່າງງານ ເຮັດໃຫ້ໄວໜຸ່ມມີວຽກເຮັດງານທຳ ມີລາຍຮັບທີ່ໝັ້ນຄົງ ສາມາດກຸ້ມຕົນເອງໄດ້.
“ໜຶ່ງໃນເປົ້າໝາຍຫຼັກຂອງພວກເຮົາ ແມ່ນຕ້ອງການຊ່ວຍເຫຼືອແມ່ຍິງຜູ້ດ້ອຍໂອກາດ ແລະ ຄົນພິການ.ໂດຍມອບອາຊີບທີ່ຈະຊ່ວຍປັບປຸງຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນເທື່ອລະກ້າວ”ກ່າວໂດຍ ເອື້ອຍລານີ.
ເງື່ອນໄຂຂອງຜູ້ຜະລິດກ່ອນອື່ນໝົດຕ້ອງເປັນຜູ້ທີ່ມີນໍ້າໃຈອົດທົນ , ມີຄວາມດຸໝັ່ນພາກພຽນ ພ້ອມດ້ວຍພອນສະຫວັນ ແລະ ພອນສະແຫວງຮັກອາຊີບ, ເງື່ອນໄຂ ແລະ ຄວາມພ້ອມທັງໝົດເຫຼົ່ານັ້ນ ຈິ່ງສາມາດສ້າງຜະລິດຕະພັນທີ່ເປັນໜ້າງຶດງໍ້ ອັດສະຈັນອອກມາໄດ້.
ບໍ່ພຽງແຕ່ເຕັກນິກ ແລະ ທັກສະຂັ້ນສູງສຸດທີ່ຖືກຖ່າຍທອດສູ່ແມ່ຍິງເຫຼົ່ານີ້ເທົ່ານັ້ນ ແຕ່ຄຸນຄ່າຂອງງານສີມືຫັດຖະກຳຈະໄດ້ຖືກສົ່ງມອບຮຸ່ນຕໍ່ຮຸ່ນ ເຊິ່ງຊ່ວຍໃຫ້ທຸລະກິດນີ້ປະສົບຜົນສຳເລັດໄດ້, ເອື້ອຍລານີ ໄດ້ກ່າວວ່າ ລາຄາຂອງພົມ ແມ່ນຂຶ້ນກັບຄຸນລັກສະນະທີ່ລູກຄ້າຕ້ອງການ ແລະ ມັນຈະກາຍເປັນມໍລະດົກທີ່ລໍ້າຄ່າທີ່ຈະໄດ້ສົ່ງຕໍ່ເຖິງຮຸ່ນລູກຮຸ່ນຫຼານ.
“ພົມເປັນການລົງທຶນທີ່ໄດ້ເພີ່ມຄຸ່ນຄ່າໃນຕົວຂອງມັນເອງນັບມື້ມູນຄ່າກໍ່ຍິ່ງເພີ້ມຂຶ້ນ” ກ່າວໂດຍ ເອື້ອຍ ລານີ.
ນອກຈາກການຮັບປະກັນໃຫ້ຄຸນນະພາບທີ່ດີເລີດແລ້ວ ທາງໂຮງງານມີຄວາມຍິນດີທີ່ຈະໃຫ້ຄຳປືກສາ ແລະ ອອກແບບພົມທີ່ລູກຄ້າຕ້ອງການ ເພື່ອຕອບສະໜອງໃຫ້ໄດ້ຄວາມເພິ່ງພໍໃຈສູງສຸດ.
“ຖ້າຫາກທ່ານຕ້ອງການພົມໄໝມ້ອນລາວ ບໍ່ວ່າຈະເປັນສີສັນ ລວດລາຍພິເສດ, ລາຍສະເພາະ ຫຼື ລາຍທີ່ທ່ານມັກ ເຮົາສາມາດເສກໃຫ້ຄວາມຕ້ອງການຂອງທ່ານເປັນຈິງໄດ້.” ກ່າວໂດຍ ເອື້ອຍລານີ.
ຂໍ້ມູນເພີ່ມເຕີມ:
ໂຮງງານມະຫັດສະຈັນ ຫັດຖະກຳ ຕໍ່າພົມລາວ ຕັ້ງຢູ່ທີ່ບ້ານ ໜອງດ້ວງໃຕ້ ຮ່ອມ 1
ຫຼື ທາງໄປຮ້ານຫຼຽນໄຊໂລຫິດ ເຂົ້າຮ່ອມ 2 ບ້ານສີຫອມ
ເປີດເວລາ 09.00 – 17.00 (ຈັນ-ເສົາ)
ໂທ: 021 216 854, 020 5551 8189
ແຫຼ່ງຂໍ້ມູນ: ວາລະສານຈໍາປາເມືອງລາວສະບັບເດືອນມັງກອນ-ກຸມພາ 2019