ສຳນັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນທີ 5 ທັນວາ 2018 ວ່າ ທ່ານ ຄຣິສຕອຟ ຄາສຕາເນີ ລັດຖະມົນຕີກະຊວງປ້ອງກັນປະເທດຂອງຝຣັ່ງ ຖະແຫຼງການເມື່ອວັນພຸດ ຫຼັງປະຊາຊົນຮວມຕົວກັນໃນນາມແນວຮ່ວມເສື້ອກັ໊ກສີເຫຼືອງ ນັດໝາຍກັນຜ່ານເຄືອຂ່າຍສັງຄົມອອນລາຍເຟສບຸກ ແລະ ທະວີດເຕີ ໃຫ້ຮວມຕົວປະທ້ວງຕໍ່ຕ້ານລັດຖະບານຄັ້ງໃໝ່ໃນວັນເສົາທີ 8 ທັນວາ 2018 ນີ້ ໂດຍຈຸດຮວມພົນຍັງຄົງຢູ່ຕາມຕົວເມືອງໃຫຍ່ຂອງປະເທດ ແລະ ຊ໊ອງເຊລີເຊໃນເຂດໃຈກາງນະຄອນຫຼວງປາຣີ ວ່າເປັນ “ການກະທຳທີ່ບໍ່ສົມຄວນ” ເພາະສ້າງຄວາມເສື່ອມເສຍໃຫ້ແກ່ພາບລັກຂອງຝຣັ່ງ ເນື່ອງຈາກວັນດັ່ງກ່າວເປັນວັນດຽວກັບທີ່ມີອີກຫຼາຍກວ່າ 120 ເມືອງໃຫຍ່ກຽມຈັດການເດີນຂະບວນລົນນະລົງດ້ານສິ່ງແວດລ້ອມ ເພື່ອສະໜັບສະໜູນການປະຊຸມພັກພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ ທີ່ກຳລັງຈັດຂຶ້ນທີ່ເມືອງ ຄາໂທວິເຂີ ທາງພາກໃຕ້ຂອງໂປແລນ.
ຢ່າງໃດກໍ່ຕາມ ທ່ານ ຄຣິສຕອຟ ຄາສຕາເນີ ໄດ້ສຳຮອງກຳລັງຕຳຫຼວດປາບປາມເອົາໄວ້ 65.000 ຄົນ ເພື່ອກຽມຮັບມືກັບສະຖານະການຮຸນແຮງທີ່ອາດຈະເກີດຂຶ້ນ ຫຼັງເຫດການໃນຫຼາຍເຂດຂອງນະຄອນຫຼວງປາຣີ ໃນວັນທີ 1 ທັນວາ 2018 ທີ່ຜ່ານມາ ສົ່ງຜົນໃຫ້ມີຜູ້ໄດ້ຮັບບາດເຈັບ 130 ຄົນ ແລະ ຖືກຈັບກຸມຕົວຫຼາຍກວ່າ 400 ຄົນ ເສຍຊີວິດຈາກທົ່ວປະເທດຢ່າງໜ້ອຍ 4 ຄົນ.
ຂະນະທີ່ປະທານາທິບໍດີ ເອມມານູເອລ ມາຄົງ ຍັງບໍ່ສະແດງທ່າທີນັບຕັ້ງແຕ່ມອບໝາຍໃຫ້ນາຍົກລັດຖະມົນຕີເອດູອາຣ໌ ຟິລິບ ເປັນຜູ້ປະກາດລໍຖ້າການບັງຄັບໃຊ້ນະໂຍບາຍນ້ຳມັນອອກໄປກ່ອນ ຢ່າງໜ້ອຍ 6 ເດືອນ ແຕ່ກຸ່ມຜູ້ປະທ້ວງເຫັນວ່າເປັນພຽງການຊື້ເວລາ ແລະ ຜູ້ປະທ້ວງໄດ້ຮຽກຮ້ອງໃຫ້ປະທານາທິບໍດີມາຄົງ ແລະ ຟິລິບຕ້ອງລາອອກເທົ່ານັ້ນ ຈົນເຮັດໃຫ້ນາຍົກລັດຖະມົນຕີຝຣັ່ງກ່າວເຕືອນກຸ່ມປະທ້ວງວ່າ ຫາກມີການກໍ່ຄວາມຮຸນແຮງເກີດຂຶ້ນອີກໃນໄລຍະອາທິດນີ້ ລັດຖະບານຈະໃຊ້ມາດຕະການທີ່ຈຳເປັນຕາມກົດໝາຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th
ຮູບປະກອບ: mgronline.com