ສຳນັກຂ່າວຕ່າງປະເທດລາຍງານ ເມື່ອວັນທີ 1 ທັນວາ 2018 ວ່າ ປະທານາທິບໍດີ ໂດນັລ ທຣໍ້າ ແລະ ປະທານາທິບໍດີ ສີ ຈິ້ນຜິງ ໄດ້ມີການພົບປະຫາລື ແລະ ຮັບປະທານອາຫານຮ່ວມກັນນອກຮອບການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ “G20” ທີ່ນະຄອນບົວໂນສໄປເຣສ ເມື່ອວັນເສົາທີ່ຜ່ານມາ; ເຖິງບໍ່ມີການຖະແຫຼງຮ່ວມກັນຢ່າງເປັນທາງການ ແຕ່ແຫຼ່ງຂ່າວຈາກທັງສອງຝ່າຍລະບຸວ່າ ຜູ້ນຳສະຫະລັດ ແລະ ຜູ້ນຳຈີນ “ເຫັນດີຮ່ວມກັນໃນທາງຫຼັກການ” ໃນການລະງັບການຕັ້ງກຳແພງພາສີຕໍ່ກັນເປັນເວລາ 90 ວັນ ແລ້ວໃຊ້ຊ່ວງເວລາດັ່ງກ່າວໃນການເຈລະຈາກັນ “ຢ່າງມີປະສິດທິພາບ” ເພື່ອຜົນປະໂຫຍດຂອງທັງສອງຝ່າຍ “ແຕ່ອາດມີການປ່ຽນແປງ” ຫາກການຫາລືໃນລະຫວ່າງນັ້ນບໍ່ປະສົບຜົນສຳເລັດ.
ກາບບັນລຸຂໍ້ຕົກລົງດັ່ງກ່າວໝາຍຄວາມວ່າລັດຖະບານອາເມລິກາ ຍັງບໍ່ປັບເພີ່ມອັດຕາພາສີສຳລັບສິນຄ້ານຳເຂົ້າຈາກຈີນມູນຄ່າ 200.000 ລ້ານໂດລາ ຈາກອັດຕາການເກັບພາສີທີ່ 10% ນັບຕັ້ງແຕ່ເດືອນກັນຍາ 2018 ທີ່ຜ່ານມາ ແລະ ກຽມຈະປັບເພີ່ມເປັນ 25% ເຊິ່ງຈະມີຜົນບັງຄັງໃຊ້ໃນເດືອນ ມັງກອນ 2019; ສ່ວນແຫຼ່ງຂ່າວໃນລັດຖະບານປັກກິ່ງໃຫ້ຂໍ້ມູນວ່າ ຈີນຈະເພີ່ມການຊື້ສິນຄ້າດ້ານພະລັງງານ, ຜະລິດຕະພັນການກະເສດ ແລະ ສິນຄ້າອື່ນຈາກອາເມລິກາ ແຕ່ບໍ່ມີການລະບຸປະລິມານ ແລະ ມູນຄ່າຢ່າງຊັດເຈນ ໂດຍລັດຖະບານປັກກິ່ງຈະລະງັບການໃຊ້ມາດຕະການກຳແພງພາສີກັບສະຫະລັດຄືກັນ ຫາກອີກຝ່າຍຍັງຮັກສາຄຳໝັ້ນສັນຍາ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th, today.line.me