ສຳນັກຂ່າວ ເອພີ ຮົງກົງ ລາຍງານວ່າ ນັກວິທະຍາສາດຈີນຄົນໜຶ່ງອ້າງວ່າລາວສາມາດແກ້ໄຂພັນທຸກຳຂອງແອນ້ອຍໄດ້ເຊິ່ງລາວໄດ້ແກ້ໄຂພັນທຸກຳໃຫ້ມະນຸດບໍ່ຕິດເຊື້ອHIV, AIDS ຫຼື ເຊື້ອພະຍາດອື່ນໆໄດ້.
ນັກຄົ້ນຄວ້ານາມວ່າ He Jiankui ຈາກເມືອງເຊິນເຈິນ ສປ ຈີນ ໄດ້ກ່າວວ່າ ລາວໄດ້ສາມາດປ່ຽນແປງແກ້ໄຂໂຕອ່ອນເດັກນ້ອຍໃນລະຫວ່າງການເຮັດເດັກຫຼອດແກ້ວຂອງຄູ້ຮັກ 7 ຄູ່, ໃນນັ້ນ ການຕັ້ງຄັນແມ່ນສຳເລັດ 1 ຄັ້ງ ເຊິ່ງເປັນແຝດເພດຍິງ. ລາວໄດ້ກ່າວວ່າ ເປົ້າໝາຍຂອງລາວບໍ່ແມ່ນການຮັກສາ ຫຼື ປ້ອງກັນໂລກທີ່ຕິດຕໍ່ກັນທາງສາຍເລືອດ ແຕ່ເປັນການສ້າງລັກສະນະພູມຄຸ້ມກັນຂອງຮ່າງກາຍແບບທຳມະຊາດ ຈາກເຊື້ອໄວຣັສ HIV ຫຼື AIDS.
ເຖິງຢ່າງໃດກໍຕາມ ຍັງບໍ່ມີການຍືນຍັນຈາກຊ່ຽວຊານທ່ານອື່ນໆວ່າການກ່າວອ້າງຂອງ He Jiankui ສາມາດແກ້ໄຂພັນທຸກຳນັ້ນແມ່ນແທ້ຫຼືບໍ່. ແຕ່ໄດ້ມີນັກວິທະຍາສາດຫຼາຍຄົນຈາກຫຼາຍປະເທດອອກມາຕໍ່ຕ້ານ ແລະ ບໍ່ເຫັນດີກັບການຄົ້ນຄວ້າຄັ້ງນີ້ ເຊິ່ງພວກເຂົາໄດ້ກ່າວວ່າ ການທົດລອງກັບມະນຸດເປັນການກະທຳທີ່ບໍ່ມີສິນທຳ ແລະ ຈະລິຍະທຳ, ການເຮັດແບບນີ້ແມ່ນບໍ່ປອດໄພ, ມັນຈະມີຜົນກະທົບຕໍ່ຄົນຮຸ່ນຫຼັງ ແລະ ມັນອາດສ່ຽງຕໍ່ການຄຸກຄາມພັນທຸກຳອື່ນກໍ່ເປັນໄດ້.
ຮຽບຮຽງຂ່າວໂດຍ: ລັດສະໝີ ພອນວິໄລ
ແຫຼ່ງຂໍ້ມູນ: Bloomberg
ຮູບພາບຈາກ: Zee News india.com