ຈາກການກວດກາໂຄງການສໍາປະທານທີ່ດິນລັດທົ່ວປະເທດໃນຈໍານວນ 1,758 ໂຄງການພົບເຫັນ 438 ໂຄງການ ກວມເອົາເນື້ອທີ່ 240.189 ເຮັກຕາ ບໍ່ມີການພັດທະນາ ແລະ ປະລະບໍ່ເອົາໃຈໃສ່ ເຊິ່ງກໍາລັງຈະລາຍງານຕໍ່ລັດຖະບານໃນທ້າຍປີ 2018 ນີ້ ເພື່ອຍົກເລີກສັນຍາ ແລະ ດໍາເນີນການປັບໃໝຕາມສັນຍາ.

ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຊີ້ແຈງຕໍ່ຄໍາຊັກຖາມຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ6 ຂອງສະພາແຫ່ງຊາດຊຸດທີ VIII, ໃນວັນທີ 26 ພະຈິກ 2018 ວ່າ: ເພື່ອແກ້ໄຂບັນຫາການບຸກລຸກຈັບຈອງທີ່ດິນໃຫ້ມີຄວາມຈະແຈ້ງ ເຊິ່ງໃນຮ່າງກົດໝາຍວ່າດ້ວຍທີ່ດິນສະບັບປັບປຸງ ກໍໄດ້ເພີ່ມມາດຕະການ ວ່າດ້ວຍການຈັບຈອງ ແລະ ບຸກລຸກທີ່ດິນ ເພື່ອເປັນບ່ອນອີງໃນການແກ້ໄຂ ແລະ ປ້ອງກັນການຈັບຈອງ, ບຸກລຸກທີ່ດິນແບບຊະຊາຍ. ປັດຈຸບັນ, ການກວດສອບໂຄງການເຊົ່າ-ສໍາປະທານທີ່ດິນທົ່ວປະເທດໃນ 1.758 ໂຄງການ ພົບເຫັນທີ່ດິນ 438 ໂຄງການ ກວມເອົາເນື້ອທີ 240.189 ເຮັກຕາ ເຊິ່ງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ພວມກະກຽມລາຍງານລັດຖະບານໃນທ້າຍປີ 2018 ນີ້ ເພື່ອຍົກເລີກສັນຍາ ຫຼື ດໍາເນີນການປັບໃໝຕາມສັນຍາ ໃນນັ້ນ, ມີ 201 ໂຄງການ (81.879 ເຮັກຕາ) ບໍ່ໄດ້ເຄື່ອນໄຫວຫຍັງເລີຍ; 160 ໂຄງການ (91.038 ເຮັກຕາ) ໄດ້ຢຸດເຊົາກ່ອນສິ້ນສຸດໂຄງການ ແລະ ມີ 77 ໂຄງການ (67.272 ເຮັກຕາ) ປະລະບໍ່ເອົາໃຈໃສ່.

ໃນການຍົກເລີກສັນຍາດັ່ງກ່າວ, ໄດ້ປະຕິບັດຕາມຂໍ້ຕົກລົງຂອງທ່ານນາຍົກລັດຖະມົນຕີ ວ່າດ້ວຍການແຕ່ງຕັ້ງຄະນະສະເພາະກິດເພື່ອດໍາເນີນກວດກາ, ສຶກສາ ແລະ ຄົ້ນຄວ້າວິໄຈບັນຫາທີ່ດິນສະບັບເລກທີ 13/ນຍ, ລົງວັນທີ 1 ມີນາ 2017; ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ອອກຄໍາສັ່ງວ່າດ້ວຍການກວດກາຄືນບັນຫາການອອກໃບຕາດິນຊໍ້າຊ້ອນ, ການຈັບຈອງທີ່ດິນ, ຂໍ້ຂັດແຍ່ງຈາກການເອົາໃບຕາດິນຄໍ້າປະກັນການກູ້ຍືມເງິນ ແລະ ຈາກການເອົາໃບຕາດິນເປັນຮຸ້ນ ສະບັບເລກທີ 1924/ກຊສ, ລົງວັນທີ 15 ພຶດສະພາ 2017; ຄໍາສັ່ງແຈ້ງການເຖິງບັນດາທ່ານເຈົ້າເມືອງ ແລະ ພໍ່ແມ່ປະຊາຊົນໃນຂອບເຂດທົ່ວປະເທດກ່ຽວກັບການກວດກາຄືນບັນຫາການອອກໃບຕາດິນ ຫຼື ການມີເອກະສານສິດນໍາໃຊ້ທີ່ດິນຊໍ້າຊ້ອນ ສະບັບເລກທີ 2121/ກຊສ, ລົງວັນທີ 26 ພຶດສະພາ 2017.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມເສດຖະກິດການ-ສັງຄົມ