ສຳນັກຂ່າວຕ່າງປະເທດລາຍງານຈາກນະຄອນຫຼວງພະນົມເປນ, ປະເທດກຳປູເຈຍ ເມື່ອວັນທີ 19 ພະຈິກ 2018 ວ່າ ສົມເດັດຮຸນເຊັນ ນາຍົກລັດຖະມົນຕີກຳປູເຈຍ ກ່າວເມື່ອວັນຈັນວ່າ ລັດຖະບານຂອງເຂົາຈະບໍ່ມີທາງລະເມີດລັດຖະທຳມະນູນດ້ວຍການອະນຸຍາດໃຫ້ “ກອງທັບຕ່າງຊາດ” ໃຊ້ດິນແດນສ່ວນໃດໜຶ່ງຂອງກຳປູເຈຍເພື່ອສ້າງເປັນຖານທັບ ແລະ ກຳປູເຈຍມີບົດຮຽນເລື່ອງນີ້ຫຼາຍພໍແລ້ວຈາກປະຫວັດສາດທີ່ຜ່ານມາ ຂະນະດຽວກັນ ລັດຖະບານພະນົມເປນຈະບໍ່ມີທາງອະນຸຍາດໃຫ້ປະເທດໃດກໍ່ຕາມໃຊ້ສະຖານທີ່ກຳປູເຈຍເປັນແຫຼ່ງຜະລິດ ແລະ ທົດສອບອາວຸດອີກດ້ວຍ.

ຄຳຖະແຫຼງດັ່ງກ່າວຂອງສົມເດັດຮຸນເຊັນ ຖືເປັນການປະຕິເສດລາຍງານຂອງ “ດິ ເອເຊຍທາມ” ເຊິ່ງລາຍງານເມື່ອອາທິດທີ່ຜ່ານມາ ໂດຍອ້າງແຫຼ່ງຂ່າວວ່າລັດຖະບານປັກກິ່ງໄດ້ພະຍາຍາມຢ່າງໜັກແຕ່ປີ 2017 ໃນການເຈລະຈາຂໍເຊົ່າພື້ນທີ່ບາງສ່ວນແຄມຝັ່ງຂອງແຂວງ ເກາະກົງ ທີ່ຢູ່ທາງຕາເວັນຕົກສຽງໃຕ້ຂອງກຳປູເຈຍ ເພື່ອກໍ່ສ້າງເປັນຖານທັບເຮືອ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th
ຮູບປະກອບ: hmongupdate