ພາຍຫຼັງເຫດການປາຕາຍໃນແມ່ນໍ້າຕອນໃນວັນທີ 7-9 ພະຈິກ 2018, ເຈົ້າເມືຶງ ເມືອງສັງທອງໄດ້ອອກແຈ້ງການ ຫ້າມບໍລິໂພກ ຫຼື ຈຳໜ່າຍປາຕາຍເຂດແມ່ນໍ້າຕອນໃນວັນທີ 12 ພະຈິກ 2018.
ຮອງເຈົ້າເມືອງ ເມືອງສັງທອງ ທ່ານ ບົວຄຳ ສີສົງຄາມ ຢັ້ງຢືນປາຕາຍຢູ່ເຂດແມ່ນ້ຳຕອນ ເກີດຈາກການໃຊ້ສານເຄມີຂອງບໍລິສັດປູກກ້ວຍແຫ່ງໜຶ່ງຂອງ ສປຈີນ ທີ່ລົງທຶນການປູກກ້ວຍໃນເນື້ອທີ່ຂອງປະຊາຊົນ 3 ບ້ານ ໃນ 2 ແຂວງ. ປັດຈຸບັນ, ບໍລິສັດໄດ້ອອກມາຮັບຜິດຊອບຕໍ່ກັບເຫດການທີ່ເກີດຂຶ້ນ ໂດຍຈະຮັບຜິດຊອບເປັນເວລາ 3 ປີ ແລະ ໃນ 1 ປີຈະປ່ອຍປາປີລະ 1 ແສນໂຕ.
ທ່ານ ບົວຄຳ ສີສົງຄາມ ໄດ້ໃຫ້ການສຳພາດ ຊີ້ແຈງກ່ຽວກັບບັນຫາດັ່ງກ່າວວ່າ: “ເຫດການປາຕາຍໃນແມ່ນ້ຳຕອນ ມາຈາກການນຳໃຊ້ສານເຄມີປູກກ້ວຍຂອງບໍລິສັດ ສປ ຈີນ. ຍ້ອນວິຊາການຂອງບໍລິສັດບໍ່ມີການຮັກສາທີ່ດີ ເຮັດໃຫ້ສານເຄມີໄຫຼລົງສູ່ແມ່ນ້ຳຕອນ ເຮັດໃຫ້ປາຕາຍປະມານ 310 ກິໂລກຣາມ (ຈາກການເກັບກຳຂໍ້ມູນຂອງວິຊາການ). ໃນເບື້ອງຕົ້ນພວກເຮົາໄດ້ແຈ້ງໃຫ້ພໍ່ແມ່ປະຊາຊົນ ສະເພາະໄລຍະນີ້ຫ້າມບໍລິໂພກປາຕາຍ, ບໍ່ໃຫ້ນຳໃຊ້ນໍ້າດັ່ງກ່າວ ແລະ ບໍ່ໃຫ້ນຳສັດອື່ນໆລົງແມ່ນ້ຳ. ພ້ອມນັ້ນ, ໄດ້ເຊີນບໍລິສັດມາປຶກສາຫາລື ເຊິ່ງຄວາມເສຍຫາຍຄັ້ງນີ້ເຂົາເຈົ້າກໍຍິນດີຮັບຜິດຊອບ. ໃນການຟື້ນຟູແມ່ນ້ຳໃຫ້ເປັນປົກກະຕິ ໃນໄລຍະສັ້ນ ຫຼື ຍາວນັ້ນ ກໍຂຶ້ນກັບການຄົ້ນຄວ້າວິໄຈ. ປະຈຸບັນໄດ້ເອົານ້ຳ, ດິນ ໄປວິໄຈຢູ່ກະຊວງກະສິກຳ ແລະ ປ່າໄມ້ “.
ທ່ານ ກ່າວຕື່ມອີກວ່າ: “ການຄຸ້ມຄອງການນໍາໃຊ້ສານເຄມີຕ່າງໆ ໃນຊ່ວງໄລຍະນີ້, ໃຫ້ທາງສວນກ້ວຍຢຸດຕິການໃຊ້ສານເຄມີທຸກຊະນິດ ຖ້າມີຄວາມຈໍາເປັນຕ້ອງສະເໜີຫາພາກສ່ວນທີ່ກ່ຽວຂ້ອງ ເຊິ່ງພະແນກກະສິກໍາ ແລະ ປ່າໄມ້ຈະເປັນຜູ້ຄຸ້ມຄອງກ່ຽວກັບການປູກກ້ວຍ ພ້ອມກັບຄະນະນຳເມືອງ ຈະໄດ້ລົງກວດກາກ່ອນວ່າຈະໃຊ້ມາດຕະຖານເທົ່າໃດ, ຈະເອົາໄປຖອກບ່ອນໃດ. ໃນໄລຍະຍາວແມ່ນຈະເບິ່ງຜົນກວດຈາກການວິໄຈນໍ້າ, ດິນ, ວິໄຈປຸ໋ຍ-ຝຸ່ນ ວ່າເກີດຈາກຫຍັງແທ້ ຫຼື ມີການໃຊ້ສານເຄມີເກີນຂະໜາດບໍ່ ຖ້າຫາກເກີນ ແມ່ນຈະອີງໃສ່ມາດຕະການ ແລະ ລະບຽບກົດໝາຍທີ່ວາງໄວ້”.
ບໍລິສັດຈາກ ສປ ຈີນ ທີ່ເຮັດໃຫ້ປາຕາຍໃນແມ່ນໍ້າຕອນ ເມືອງສັງທອງໃນຄັ້ງນີ້ ເປັນບໍລິສັດທີ່ມາເຊົ່າດິນຂອງປະຊາຊົນໃນ 3 ບ້ານ ກວມເອົາ 2 ເມືອງ ແລະ 2ແຂວງຄື: ບ້ານກົວ ເມືອງສັງທອງ, ນະຄອນຫຼວງວຽງຈັນ ແລະ ບ້ານນ້ຳໂທມ, ບ້ານສວນມອນ ເມືອງຫີນເຫີບ ແຂວງວຽງຈັນ ມີເນື້ອທີ່ທັງໜົດ 250 ເຮັກຕາ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: Lao National Radio