ໃນວັນທີ 31 ຕຸລາ 2018ທີ່ຜ່ານມາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຕັດສິນປະຫານຊີວິດທ້າວ ທໍ່ລິຊົງ (ຈຳເລີຍ) ອາຍຸ 30 ປີ ຢູ່ບ້ານໜອງປອງ ເມືອງຄຳເກີດ ແຂວງບໍລິຄຳໄຊ ສະຖານຂົນສົ່ງຢາເສບຕິດປະເພດເຮໂຣອິນ ຈຳນວນ 10 ແທ່ງ.
ອີງຕາມສຳນວນຄະດີ ແລະ ຄຳສາລະພາບຂອງຈຳເລີຍ ໃນວັນທີ 14 ທັນວາ 2016 ທ້າວ ເບັງຊົງ ໄດ້ໂທລະສັບຫາທ້າວ ທໍ່ລິຊົງ (ຈຳເລີຍ) ບອກວ່າໃຫ້ໄປຫາຢູ່ນະຄອນຫຼວງວຽງຈັນ ເພື່ອຈະໃຫ້ໄປສົ່ງຢາເຮໂຣອິນ ໃຫ້ຜູ້ສັ່ງຊື້ ໂດຍຮັບຄ່າຈ້າງ 1.500 ໂດລາສະຫະລັດ ຫຼື ປະມານ 12 ລ້ານກີບ ເມື່ອຈຳເລີຍໄປຮອດນະຄອນຫຼວງວຽງຈັນ ທ້າວ ເບັງຊົງ ກັບໝູ່ອີກ 1 ຄົນ ຂັບລົດກະບະສີຂາວ ຍີ່ຫໍ້ຟອດ ບໍ່ຕິດປ້າຍທະບຽນ ໄປຮັບເອົາຢູ່ຄິວລົດສາຍໃຕ້ແລ້ວພາໄປພັກຢູ່ເຮືອນພັກ ມາໃນວັນທີ 15 ທັນວາ 2016 ພວກກ່ຽວໄດ້ອອກຈາກເຮືອນພັກໄປເຂດຫໍພັກຊີເກມ ພໍໄປຮອດທ້າວ ເບັງຊົງ ໄດ້ລົງລົດໄປກວດເງິນສັ່ງຊື້ ແລ້ວໝູ່ຂອງທ້າວ ເບັງຊົງ ໄດ້ຂັບລົດໄປສົ່ງຈຳເລີຍຢູ່ຕໍ່ໜ້າມະຫາວິທະຍາໄລແຫ່ງຊາດ ເພື່ອລໍຖ້າເອົາຢາເຮໂຣອິນໄປສົ່ງຕາມນັດໝາຍປະມານ 20 ນາທີ ມີລົດກະບະໄທຕັນສີດຳ ໃນລົດມີທ້າວ ເບັງຊົງ ແລະ ໝູ່ຜູ້ກ່ຽວໜຶ່ງຄົນ ຈາກນັ້ນ ທ້າວ ເບັງຊົງ ບອກໃຫ້ຈຳເລີຍໄປເອົາແກັດເຈ້ຍທີ່ບັນຈຸຢາເສບຕິດ 10 ແທ່ງ (ທີ່ມີນ້ຳໜັກເກີນ 3 ກິໂລ) ໄປສົ່ງໃຫ້ຜູ້ສັ່ງຊື້ທີ່ລໍຖ້າຢູ່ຕໍ່ໜ້າມະຫາວິທະຍາໄລແຫ່ງຊາດ ຈຶ່ງຖືກເຈົ້າໜ້າທີ່ກັກຕົວພ້ອມຂອງກາງຈຳນວນດັ່ງກ່າວ ສ່ວນຢາເຮໂຣອິນທີ່ຢຶດມາໄດ້ນັ້ນເຈົ້າໜ້າທີ່ໄດ້ນຳໄປກວດພິສູດພົບວ່າມີສານເຄມີອອກລິດຕໍ່ຈິດປະສາດແທ້ ຕາມໃບຢັ້ງຢືນຜົນກວດວິໄຈ ສະບັບເລກທີ 117.17/ກນວ, ລົງວັນທີ 21 ມິຖຸນາ 2017.
ຜ່ານການຄົ້ນຄວ້າສຳນວນຄະດີຢ່າງລະອຽດ ແລະ ເຫັນວ່າ ມີຂໍ້ມູນຫຼັກຖານຮັດກຸມ ແລະ ພຽງພໍທີ່ຢັ້ງຢືນວ່າການກະທຳຂອງທ້າວ ທໍ່ລິຊົງ (ຈຳເລີຍ) ເປັນການກະທຳຜິດທາງອາຍາໃນສະຖານການຂົນສົ່ງຢາເສບຕິດປະເພດເຮໂຣອິນ ທີ່ແຕະຕ້ອງຕໍ່ເສດຖະກິດຂອງຊາດ ທັງເຮັດໃຫ້ສັງຄົມບໍ່ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມທີ່ໄດ້ກຳນົດໄວ້ ໃນກົດໝາຍວ່າດ້ວຍການປັບປຸງມາດຕາ 146 ຂອງກົດໝາຍອາຍາ ແລະ ກົດໝາຍວ່າດ້ວຍຢາເສບຕິດທີ່ໄດ້ກຳນົດວ່າ ບຸກຄົນໃດຫາກຜະລິດປຸງແຕ່ງ ຫຼື ມີໄວ້ຄອບຄອງ ຄ້າຂາຍ ຈຳໜ່າຍ ນຳເຂົ້າ ສົ່ງອອກ ຂົນສົ່ງ ຫຼື ນຳຢາອີຢາບ້າ, ຢາໄອສ ຫຼື ວັດຖຸອອກລິດຕໍ່ຈິດປະສາດຜ່ານ ສປປ ລາວ ເກີນກວ່າ 3 ກິໂລຂຶ້ນໄປຈະຖືກລົງໂທດປະຫານຊີວິດ.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: ໜັງສືພິມວຽງຈັນໃໝ່, ໜັງສືພິມ ປກສ
ຮູບປະກອບ: ໜັງສືພິມ ປກສ