ໃນວັນທີ 29 ຕຸລາ 2018 ຜ່ານມາທາງບໍລິສັດ ເອັບສັນ “Epson” ໄດ້ເປີດໂຕ Eco Tank ເພື່ອເນັ້ນຢໍ້າຄວາມເປັນໜຶ່ງໃນຕະຫຼາດເຄື່ອງພິມອິ້ງເຈັກ ທີ່ໂຮງແຮມ ຄລາວ ພລາຊ່າ. ໃຫ້ກຽດເຂົ້າຮ່ວມງານດັ່ງກ່າວ ໄດ້ແກ່: ທ່ານ ນາງ ນິລະວອນ ວິສອນນະວົງ ຜູ້ອໍານວຍການ ບໍລິສັດ ໄມໂຄຼອິນໂຟ ຂາເຂົ້າ-ຂາອອກ ຈໍາກັດຜູ້ດຽວ ແລະທ່ານ ໄພໂຣດ ຢຸດມະຫາລາບກຸນ ຜູ້ຈັດການຝ່າຍຂາຍ ຕ່າງປະເທດ ຂອງບໍລິສັດ ເອັບສັນ (ປະເທດໄທ) ຈໍາກັດ ແລະບັນດາແຂກທີ່ຖືກເຊີນ.

ໃນຄັ້ງນີ້ ເອັບສັນ ໄດ້ທໍາການເປີດໂຕຜະລິດຕະພັນຮຸ້ນໃໝ່ ທີ່ຕອບໂຈດຄວາມຄຸ້ມຄ່າ, ແຂງແຮງທົນທານ ແລະລາຄາປະຢັດ ນັ້ນກໍຄືລຸ້ນ L-series ແລະM-series ເພື່ອຕອບສະໜອງຄວາມຕ້ອງການໃນທຸລະກິດທຸກຂະໜາດ ລວມທັງໂປຼເຈັກເຕີຂະໜາດກາງ 3 ລຸ້ນໃໝ່.

ບໍລິສັດ ເອັບສັນ ເປັນຜູ້ຜະລິດເຄື່ອງພິມແບບກ່ອງມຶກ (ink tank) ອັນດັບໜຶ່ງຂອງໂລກ ເຊິ່ງໃນປັດຈຸບັນ ໄດ້ຈໍາໜ່າຍເຄື່ອງພິມແບບກ່ອງມຶກໄປແລ້ວຫຼາຍກວ່າ 30 ລ້ານເຄື່ອງ ໃນ 150 ປະເທດທົ່ວໂລກ. ສ່ວນໃນປະເທດລາວເອງ ມີເຄື່ອງພິມແບບກ່ອງມຶກຍີ່ຫໍ້ ເອັບສັນ ຫຼາຍກວ່າ 19 ລຸ້ນ; ໃນນັ້ນ, 15 ລຸ້ນ ແມ່ນ L-Series ແລະ4 ລຸ້ນ ແມ່ນ M-Series.

ໃນຕອນນີ້ ບໍລິສັດໄດ້ສ້າງເຄື່ອງພິມຮູບແບບໃໝ່ ທີ່ເອີ້ນວ່າ: “Eco Tank” Economical Tank ໂດຍເນັ້ນໄປທີ່ປະສິດທິພາບສູງສຸດ ແລະລາຄາສຸດປະຢັດ. ທາງ ເອັບສັນ ໄດ້ນໍາສະເໜີ ເຄື່ອງພິມ 5 ລຸ້ນໃໝ່ຈາກ L-series ແລະM-series ໄດ້ແກ່: Eco Tank L3110, L3150, M1100, M1120 ແລະM2140. ນອກນັ້ນ, ຍັງໄດ້ສົ່ງເສີມການຈໍາໜ່າຍໂປຼເຈັກເຕີ 3LCD portfolio ເຖິງ 3 ລຸ້ນ ຂະໜາດກາງ ໄດ້ແກ່: EB-L510U, EB-L610W ແລະEB-L610U. ທັງສາມລຸ້ນລ້ວນແຕ່ມີຂະໜາດກະທັດຮັດ, ນໍ້າໜັກເບົາ ແລະໃຫ້ຄວາມສະຫວ່າງສູງ.