ທ່ານ ອັນໂຕນິໂອ ກູເຕີເຣສ ເລຂາທິການໃຫຍ່ ສະຫະປະຊາຊາດ (ສປຊ) ໄດ້ແຈ້ງຕໍ່ກອງປະຊຸມຖະແຫຼງຂ່າວ ໃນວັນທີ 29 ຕຸລາ 2018 ທີ່ສຳນັກງານໃຫຍ່ ສປຊ ລະບຸວ່າ: ຜົນຂອງການຄົ້ນຄວ້າ ທີ່ອົງການອະນາໄມໂລກ WHO (World Health Organization) ໄດ້ເຜີຍແຜ່ກ່ຽວກັບອາກາດເປັນພິດສົ່ງຜົນກະທົບຕໍ່ສະໝອງຂອງເດັກນ້ອຍ. ປັດຈຸບັນ, ເດັກນ້ອຍຈຳນວນ 10 ຄົນ ຈະມີ 9 ຄົນທີ່ຕິດເຊື້ອ ເຊິ່ງ WHO ໄດ້ແກ້ໄຂແລ້ວພຽງບາງປະເທດເທົ່ານັ້ນ ແລະ ຮຽກຮ້ອງໄປຍັງປະເທດຕ່າງໆ ໃຫ້ມີນະໂຍບາຍຢ່າງຈິງຈັງເພື່ອແກ້ໄຂບັນຫາດັ່ງກ່າວ.
WHO ໃຫ້ຮູ້ວ່າ: ອາກາດເປັນພິດ ເຮັດໃຫ້ເກີດພິດອັນຕະລາຍຕໍ່ການດຳລົງຊີິວິດ ຂອງເດັກນ້ອຍຫຼາຍລ້ານຄົນໃນທົ່ວໂລກ ໃນຂະນະທີ່ເດັກນ້ອຍໜ້າຈະໄດ້ຫາຍໃຈຢູ່ໃນສະພາບອາກາດທີ່ປອດໃສດີ ແລະ ມີການພັດທະນາທີ່ພຽບພ້ອມທີ່ສຸດ. ນອກນັ້ນ, ເດັກນ້ອຍໄດ້ຮັບຜົນກະທົບໄດ້ງ່າຍກວ່າຜູ້ໃຫຍ່ ເພາະຈັງຫວະການຫາຍໃຈຂອງເດັກນ້ອຍນັ້ນໄວກວ່າ ແລະ ໄດ້ຮັບທາດພິດໄດ້ງ່າຍກວ່າ ໂດຍສະເພາະເດັກທີ່ເກີດໃໝ່ຈະໄດ້ຮັບຜົນກະທົບໄດ້ງ່າຍຈາກອາກາດເປັນພິດ. ການໄດ້ຮັບສານພິດດັ່ງກ່າວ, ຈະໄດ້ຮັບເມື່ອຄອບຄົວຂອງພວກເຂົານຳໃຊ້ເຊື້ອໄຟທີ່ກໍ່ໃຫ້ເກີດມົນລະພິດ ເພື່ອປຸງແຕ່ງອາຫານ, ດັງໄຟຝີງ ແລະ ໃຊ້ເປັນແສງສະຫວ່າງ.
ປັດຈຸບັນນີ້, WHO ໄດ້ນຳສະເໜີວິທີການແກ້ໄຂຈຳນວນໜຶ່ງທີ່ສາມາດເຮັດໄດ້ ເພື່ອຫຼຸດຜ່ອນອາກາດເປັນພິດເປັນຕົ້ນແມ່ນ ການນຳໃຊ້ເຊື່ອໄຟທີ່ສະອາດໃນການປຸງແຕ່ງອາຫານ ແລະ ພາຫະນະໃນການເດີນທາງໄປມາ ໂດຍໃຫ້ຄວາມສຳຄັນເຖິງການນຳໃຊ້ພະລັງງານ ທີ່ມີປະສິດທິພາບຢູ່ໃນການກຳນົດແຜນການສຳລັບເຮືອນ ແລະ ໃນຕົວເມືອງ.
ຜົນຂອງການຄົ້ນຄວ້າດັ່ງກ່າວ, ໃຫ້ຮູ້ວ່າ: ສະເພາະໃນປີ 2016 ມີເດັກນ້ອນເສຍຊີວິດເຖິງ 600,000 ຄົນ ຍ້ອນຫຼອດລົມອັກເສບຮຸນແຮງ ທີ່ເກີດຈາກອາກາດເປັນພິດ ເຊິ່ງອາກາດເປັນພິດຕາມທ້ອງຖະໜົນຫົນທາງ ຮ້າຍແຮງທິີ່ສຸດຢູ່ໃນບັນດາປະເທດທີ່ມີລາຍຮັບຕໍ່າ ຫາ ປານກາງ ອາດເຮັດໃຫ້ເດັກນ້ອຍເກີດມາມີນ້ຳໜັກບໍ່ສົມສ່ວນ, ເປັນພະຍາດຫອບຫືດ, ມະເຮັງ ເຊິ່ງເປັນການສົ່ງຜົນກະທົບຕໍ່ການພັດທະນາຂອງລະບົບປະສາດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: unhcr.org