ພະຍຸເຮີຣິເຄນໂອດິເລ ຖະຫລົ່ມແມັກຊິກໂກ ສົ່ງຜົນບ້ານເຮືອນຫລາຍຫລັງໄດ້ຮັບຄວາມເສຍຫາຍ, ປະຊາຊົນອອກ
ປຸ້ນສະດົມຕາມຮ້ານຄ້າ ເພື່ອຄວາມຢູ່ລອດ.
ເມື່ອວັນທີ 17 ກັນຍາ 2014 ຜ່ານມານີ້ ສຳນັກຂ່າວຕ່າງປະເທດ ລາຍງານວ່າ ພະຍຸເຮີຣິເຄນໂອດິເລ ໄດ້ພັດຖະຫລົ່ມ
ເມືອງບາຮາ ກາລິຟໍເນຍ ປະເທດແມັກຊິກໂກ ສົ່ງຜົນເຮັດໃຫ້ເກີດລົມພັດແຮງ ແລະ ຝົນຕົກນ້ຳຖ້ວມໃນຫລາຍພື້ນ
ທີ່, ສາຍການບິນຕ່າງໆ ກໍພາກັນປະກາດລະງັບຖ້ຽວບິນ ຈົນນັກທ່ອງທ່ຽວກ່ວາ 26,000 ຄົນ ຕ້ອງຕິດຄ້າງຢູ່ພາຍ
ໃນເມືອງ ຫລາຍຄົນຕ້ອງຢູ່ພາຍໃນສະໜາມບິນໄປກ່ອນ ເພາະບໍ່ມີບ່ອນພັກ ໃນຂະນະທີ່ກະແສລົມແຮງໄດ້ເຮັດໃຫ້
ເຮືອນຊານຂອງປະຊາຊົນເສຍຫາຍໜັກຫລາຍຫລັງ ແລະ ໃນວັນທີ 15 ກັນຍາ 2014 ກໍໄດ້ເກີດເຫດປະຊາຊົນຫລາຍ
ຮ້ອຍຄົນ ອອກປຸ້ນສະດົມຕາມຮ້ານຊູເປີມາເກັດ ແລະ ຮ້ານຄ້າຕ່າງໆ ເພື່ອລັກເອົາເຄື່ອງຢູ່ຂອງກິນທີ່ຈຳເປັນ ເຊັ່ນ
ເຂົ້າສານ, ນ້ຳດື່ມ, ເຈ້ຍອະນາໄມ, ເຫລົ້າ, ໄປຈົນຮອດເຄື່ອງໃຊ້ໄຟຟ້າຢ່າງພັດລົມ ແລະ ໂທລະພາບອີກດ້ວຍ.
ທ້າວ ອອສວັນໂດ ໂລເປດ ໜຶ່ງໃນຜູ້ປະສົບໄພ ອາຍຸ 41 ປີ ໄດ້ກ່າວໃນຂະນະທີ່ຂົນເຄື່ອງອອກຈາກຮ້ານຄ້າແຫ່ງໜຶ່ງ
ວ່າ ” ຂ້ອຍເອົານ້ຳ ແລະ ອາຫານໄປໃຫ້ລູກນ້ອຍຂອງຂ້ອຍ ເຈົ້າບໍ່ມີທາງຮູ້ດອກ ວ່າຈະມີຫຍັງເກີດຂຶ້ນອີກມື້ອື່ນນີ້! ”
ຢ່າງໃດກໍດີ ຍັງບໍ່ທັນມີລາຍງານຜູ້ເສຍຊີວິດຈາກໄພພິບັດຄັ້ງນີ້ ແຕ່ກໍມີຜູ້ບາດເຈັບປະມານ 135 ຄົນ ໃນຂະນະທີ່ທາງ
ການໄດ້ສົ່ງທະຫານກ່ວາ 1000 ຄົນ ເຂົ້າໄປຊ່ວຍເຫລືອຜູ້ປະສົບໄພໃນພື້ນທີ່ ຫລັງຈາກພະຍຸເຮີຣິເຄນໄດ້ເຮັດໃຫ້ໄຟຟ້າ
ດັບ ແລະ ນ້ຳປະປາບໍ່ໄຫລ.
