ເວັບໄຊຂ່າວເຟຣສນິວ ເຊິ່ງເປັນເວັບໄຊກະບອກສຽງຂອງລັດຖະບານກຳປູເຈຍ ລາຍງາຍເມື່ອວັນເສົາທີ່ຜ່ານມາ ສົມເດັດຮຸນເຊນ ມີຄວາມຕ້ອງການຮື້ຟື້ນ “ພາລະກິດສຳຄັນ” ຮ່ວມກັບສະຫະລັດ ທີ່ໝາຍເຖິງການຄົ້ນຫາ ແລະ ເກັບກູ້ໂຄງກະດູກທະຫານອາເມລິກາຢ່າງໜ້ອຍ 42 ຄົນ ທີ່ຫາຍສາບສູນໃນກຳປູເຈຍຊ່ວງລະຫວ່າງສົງຄາມ ໂດຍຜູ້ນຳກຳປູເຈຍໄດ້ສັ່ງລະງັບພາລະກິດດັ່ງກ່າວເມື່ອເດືອນກັນຍາປີທີ່ຜ່ານມາ ຫຼັງດຳເນີນງານມາໄດ້ 30 ປີ ເພື່ອເປັນການຕອບໂຕ້ລັດຖະບານອາເມລິກາທີ່ລະງັບວີຊ່າເຈົ້າໜ້າທີ່ລະດັບສູງຫຼາຍຄົນຂອງກຳປູເຈຍ ຈາກການທີ່ກຳປູເຈຍປະຕິເສດຮັບຜູ້ອົບພະຍົບເຊິ່ງຖືກເນລະເທດອອກຈາກສະຫະລັດກັບປະເທດ ຖານມີປະຫວັດກໍ່ຄະດີອາຊະຍາກຳໃນປະເທດ.
ນອກຈາກນີ້, ຄວາມຂັດແຍ້ງລະຫວ່າງກຳປູເຈຍກັບສະຫະລັດເຄັ່ງຮ້ອນຫຼາຍຂຶ້ນ ເມື່ອສົມເດັດຮຸນເຊນກ່າວຫາຢ່າງເປີດເຜີຍວ່າລັດຖະບານຂອງປະທານາທິບໍດີໂດນັລ ທຣໍ້າ ສະໜັບສະໜູນທ່ານ ເກິມ ສຸຂາ ຜູ້ນຳຝ່າຍຄ້ານ ເຊິ່ງໄດ້ຮັບການປະກັນຕົວເມື່ອເດືອນທີ່ຜ່ານມາ ໃຫ້ກັກບໍລິເວນທີ່ເຮືອນແທນ ເພື່ອລໍການຂຶ້ນສານຄັ້ງຕໍ່ໄປໃນຂໍ້ຫາກະບົດ.
ຢ່າງໃດກໍ່ຕາມ, ສົມເດັດຮຸນເຊນ ຢືນຢັນມາຕະຫຼອດວ່າລັດຖະບານຂອງເຂົາບໍ່ເຄີຍຕົກຢູ່ພາຍໃຕ້ແຮງກົດດັນຈາກສະຫະລັດ ແລະ ພັນທະມິດ ເຖິງແມ່ນວ່າ ທ່ານ ຄິມ ສຸຂາ ຈະໄດ້ຮັບການປ່ອຍຕົວຊົ່ວຄາວ ແຕ່ເປັນເພາະເຫດຜົນດ້ານສຸຂະພາບຂອງຈຳເລີຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews
ຮູບປະກອບ: yahoo