ອະນຸກຳມະການສວນສະໜາມ ໄດ້ຈັດກອງປະຊຸມວຽກງານກະກຽມການສວນສະໜາມ ເພື່ອສະເຫລີມສະຫລອງ
ສອງວັນປະຫວັດສາດຂອງຊາດຄື: ວັນສ້າງຕັ້ງພັກປະຊາຊົນປະຕິວັດລາວຄົບຮອບ 60 ປີ ແລະ ວັນສະຖາປະນາ
ສປປ ລາວ ຄົບຮອບ 40 ປີ ໃນວັນທີ 16 ກັນຍາ 2014 ນີ້ ທີ່ຫ້ອງວ່າການລັດຖະບານ ໂດຍການເປັນປະທານຂອງ
ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ມີບັນດາລັດຖະມົນຕີວ່າການ, ຊ່ວຍວ່າການ ແລະ
ພາກສ່ວນທີ່ກ່ຽວຂ້ອງຈາກຂະແໜງຕ່າງໆເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງການລາຍງານກ່ຽວກັບການກະກຽມໃຫ້ແກ່ວຽກງານ ການສວນສະໜາມສະຫລອງ
ສອງວັນປະຫວັດສາດ ດັ່ງກ່າວໃນໄລຍະຜ່ານມາ ຈາກທ່ານ ດຣ.ສອນໄຊ ສີພັນດອນ ລັດຖະມົນຕີ, ຫົວໜ້າຫ້ອງ
ວ່າການລັດຖະບານ. ຈາກນັ້ນ, ອະນຸກຳມະການສວນສະໜາມ ກໍໄດ້ສຸມໃສ່ຄົ້ນຄ້ວາ ແລະ ສ້າງແຜນການສວນ
ສະໜາມ ໂດຍໄດ້ກຳນົດຈຸດປະສົງ ລະດັບຄາດໝາຍ, ເນື້ອໃນ ແລະ ຮູບການສວນສະໜາມ ແບ່ງອອກເປັນ 2
ຮູບການຄື: ເນື້ອໃນ ແລະ ຮູບການສວນສະໜາມຂອງ ກຳລັງ ປກຊ-ປກສ; ການເດີນຂະບວນຂອງມວນຊົນ,
ໃນນັ້ນໄດ້ກຳນົດຈຳນວນກ້ອນກຳລັງສວນສະໜາມຈຳນວນ 40 ກ້ອນ ແຕ່ລະກ້ອນມີ ຈຳນວນຄົນ 400 ຄົນ
ສຳຮອງ 20 ຄົນ (ຄາດຄະເນເບື້ອງຕົ້ນ ຈຳນວນພົນທັງໝົດ 14.250 ຄົນ), ສ້າງແຜນຈັດວາງກ້ອນກຳລັງ ໂດຍ
ເລີ່ມຕົ້ນຈາກກ້ອນທຸງໄຊ (ຂອງກຳລັງ ປກຊ) ລຽງຕາມລຳດັບ ຈົນຮອດກ້ອນທີ 40 ກ້ອນປິດທ້າຍ ແມ່ນ ກ້ອນ
ໂດດຈ້ອງ (ຂອງກອງທັບຈຳນວນ 50 ຄົນ).
ພ້ອມນີ້ ກອງປະຊຸມໄດ້ຕົກລົງເຫັນດີ ຕາມການສະເໜີປ່ຽນຊື່ເອີ້ນຄຳວ່າ ກ້ອນຂະແໜງການຈາກກະຊວງມາ
ເປັນກ້ອນກະຊວງ, ການກຳນົດເວລາ ສະແດງກ້ອນກຳລັງ ແລະ ງົບປະມານຄືນໃໝ່, ໄດ້ຕົກລົງເຫັນດີສ້າງແຜນ
ຝຶກແອບ 6 ເດືອນຕົ້ນປີ 2015 ກ່ອນຈະເຖິງການສະເຫລີມສະຫລອງຕົວຈິງກາງ ປີ 2015 ແຕ່ລະກ້ອນຈະຕ້ອງ
ໄດ້ທຳຄວາມລຶ້ງເຄີຍກັບສະໜາມຫລວງ (ເດີ່ນພະທາດຫລວງ), ເດືອນ 9 ຫາ 11/2015 ທັງໝົດ 40 ກ້ອນແມ່ນ
ຈະໄດ້ມີການຝຶກແອບໃຫຍ່ ຫລັງຈາກນັ້ນກໍມີກວດກາ ຄວາມພ້ອມໃນແຕ່ລະດ້ານໃຫ້ຮັບປະກັນ ແລະ ມີຄວາມ
ຮຽບຮ້ອຍ
ແຫລ່ງຂ່າວ: ສຳນັກຂ່າວສານປະເທດລາວ