ເວເນຊູເອລາ ຕັ້ງຢູ່ທາງຕອນເໜືອຂອງທະວີບອາເມລິກາໃຕ້ ມີເນື້ອທີ່ປະມານ 912,050 ຕາລາງກິໂລແມັດ ແລະ ມີປະຊາກອນອາໄສຢູ່ປະມານ 31,3 ລ້ານຄົນ, ປະຊາກອນສ່ວນຫຼາຍແມ່ນເຊື້ອສາຍສະເປນ ນັບຖືສາສະໜາຄິສກາໂຕລິກ. ເວເນຊູເອລາ ຫາກໍມີການເລືອກຕັ້ງປະທານປະເທດໄປເມື່ອວັນທີ 20 ພຶດສະພາທີ່ຜ່ານມາ ແລະ ທ່ານ ມາດູໂຣ ຍັງຄົງໄດ້ຮັບຄວາມນິຍົມຈາກປະຊາຊົນໃຫ້ບໍລິຫານປະເທດອີກຄັ້ງ ຖືວ່າເປັນສະໄໝທີ 2 ໃນການບໍລິຫານປະເທດອີກ 6 ປີ.
ເວເນຊູເອລາ ເປັນປະເທດທີ່ມີແຫຼ່ງນໍ້າມັນສຳຮອງຫຼາຍທີ່ສຸດໃນໂລກ ແລະ ເສດຖະກິດຫຼັກແມ່ນເວົ້າໄດ້ວ່າມາຈາກນໍ້າມັນເປັນສ່ວນໃຫຍ່ ຄິດໄລ່ເປັນ 95% ຂອງ GDP ພາຍໃນປະເທດ. ເມື່ອລາຄານໍ້າມັນລົດລົງ ແຕ່ປີ 2014 ເປັນຕົ້ນມາ ຈື່ງເຮັດໃຫ້ເສດຖະກິດຂອງປະເທດດັ່ງກ່າວຫົດຕົວ ແລະ ຕົກຕໍ່າລົງເລື້ອຍໆ, ລວມທັງກໍໃຫ້ເກີດອັດຕາເງີນເຟີ້ຂື້ນ (Hyperinflation), ເສດຖະກິດ-ສັງຄົມ, ໄພອຶດຫິວ, ຄວາມທຸກຍາກ ແລະ ຕະຫຼາດມືດເພີ່ມຂື້ນ ເວົ້າໄດ້ເລີຍວ່າປະຈຸບັນນີ້ ເວເນຊູເອລາ ແມ່ນຕົກຢູ່ໃນພາວະວິກິດການທີ່ຮ້າຍແຮງສຸດ ໃນມື້ໜື່ງມີປະຊາຊົນອົບພະຍົບອອກຈາກປະເທດເປັນຈຳນວນຫຼວງຫຼາຍ.
ເມື່ອລັດຖະບານບໍ່ສາມາດເບີ່ງແຍງການເປັນຢູ່ຂອງປະຊາຊົນໄດ້ ຈື່ງເຮັດໃຫ້ມີການຮວມກຸ່ມ ກໍ່ຕັ້ງກຸ່ມໂຈນ ອອກປຸ້ນສະດົມສີ່ງຂອງ, ອາຫານ ແລະ ສີ່ງທີ່ຈຳເປັນຕ້ອງໃຊ້ຈາກຜູ້ອື່ນ ແມ່ນວ່າລັດຖະບານຈະເຂົ້າປາບປາມ ແຕ່ໃນສະພາບທີ່ຍັງຫາຄວາມໝັ້ນຄົງບໍ່ໄດ້ນີ້ ການປາບກຸ່ມອິດທິພົນທ້ອງຖີ່ນຈື່ງເປັນເລື່ອງທີ່ເກືອບຈະເຮັດບໍ່ໄດ້. ທັງນີ້ເຮົາສາມາດປຽບທຽບລາຄາຊີ້ນງົວໃນປີ 2012 ແລະ ປະຈຸບັນໄດ້ວ່າ ຄວາມແຕກຕ່າງແມ່ນເປັນໄປຫຼາຍພຽງໃດ.
ໃນປີ 2012 ຊີ້ນງົວ 1 ກິໂລ ລາຄາ 22 ໂບລິວາ ແຕ່ໃນປີ 2018 ໄກ່ 2,4 ກິໂລ ລາຄາສູງເຖີງ 14,600,000 ໂບລິວາ ຫຼືປະມານ 522,000ກີບ. ພາວະທີ່ລາຄາເຄື່ອງຂອງບໍລິໂພກໂຕນຂື້ນຈາກຫຼັກ 2 ເປັນ ຫຼັກ 8 ແມ່ນພາວະເງີນເຟີ້ທີ່ຮ້າຍແຮງທີ່ສຸດໃນໂລກ.
ຮຽບຮຽງໂດຍ: ບຸນມີ ຄຳມີໄຊ
ແຫຼ່ງຂ່າວຂໍ້ມູນຕ່າງປະເທດ: bangkokbiznews&PostToday