ລັດຖະບານມາເລເຊຍປະກາດປັບຂຶ້ນຄ່າແຮງຂັ້ນຕໍ່າທົ່ວປະເທດເປັນ 1,050 ຣິງກິດ (ປະມານ 253 ໂດລາ ຫຼື 2,150,000 ກີບ) ແລະ ມີຜົນບັງຄັບໃຊ້ໃນປີ 2019.
ສຳນັກຂ່າວຕ່າງປະເທດລາຍງານວ່າ ລັດຖະບານມາເລເຊຍປະກາດປັບຄ່າແຮງຂັ້ນຕໍ່າຂຶ້ນເປັນ 1,050 ຣິງກິດ ຕໍ່ເດືອນ ຫຼື ປະມານ 5.05 ຣິງກິດຕໍ່ຊົ່ວໂມງ. ນະໂຍບາຍນີ້ຖືກສະເໜີໂດຍຄະນະກຳມະການທີ່ປຶກສາຄ່າແຮງງານແຫ່ງຊາດ. ລັດຖະບານໄດ້ເຫັນດີປັບເພີ່ມຄ່າແຮງຂັ້ນຕໍ່າ ເພີ່ມອີກ 50 ຣິງກິດ. ຄ່າແຮງຂັ້ນຕໍ່າໃນປະຈຸບັນຂອງມາເລເຊຍແມ່ນ 1,000 ຣິງກິດ (ປະມານ 241 ໂດລາ ຫຼື 2,047,000 ກີບ) ຕໍ່ເດືອນ ແລະ ໃນສະເພາະລັດຊາບາ, ຊາຣາວັກ ແລະ ລາບວນ ຄ່າແຮງຂັ້ນຕໍ່າແມ່ນ 920 ຣິງກິດ.
ເຖິງຢ່າງໃດກໍຕາມ, ທາງລັດຖະບານບໍ່ສາມາດໃຫ້ເງິນສົມທົບ ຫຼື ອຸດໜູນແກ່ບັນດານາຍຈ້າງໄດ້ ເນື່ອງຈາກມາເລເຊຍຍັງມີຂໍ້ຈໍາກັດທາງດ້ານການເງິນຢູ່. ການເພີ່ມຄ່າແຮງຂັ້ນຕໍ່າແມ່ນເປັນໄປຕາມສະຖານະການທາງດ້ານເສດຖະກິດໃນປະຈຸບັນຂອງປະເທດ.
ຖະແຫຼງການລະບຸຕື່ມວ່າ ການເພີ່ມເງິນເດືອນຂຶ້ນສູງຫຼາຍຈະສ້າງບັນຫາຕໍ່ອຸດສາຫະກຳ ແລະ ອາດຈະເຮັດໃຫ້ຄວາມສາມາດໃນການແຂ່ງຂັນຂອງປະເທດຫຼຸດລົງ. ສະນັ້ນ, ການປັບເງິນເດືອນຂັ້ນຕໍ່າຂຶ້ນເທື່ອລະນ້ອຍ ຈະຊ່ວຍໃຫ້ບັນດາເຈົ້າຂອງທຸລະກິດສາມາດປັບຕົວໄດ້ ແລະ ຊ່ວຍບໍ່ໃຫ້ບັນດາທຸລະກິດປິດຕົວລົງ ເນື່ອງຈາກຕົ້ນທຶນ ແລະ ຄ່າໃຊ້ຈ່າຍທີ່ເພີ່ມຂຶ້ນ ເຊິ່ງອາດສົ່ງຜົນໃຫ້ມີການປົດພະນັກງານອອກ.
ຖະແຫຼງການຍັງໄດ້ລະບຸຕື່ມວ່າ: ນາຍຈ້າງ ແລະ ຜູ້ຄ້າຂາຍໄດ້ຖືກຮຽກຮ້ອງບໍ່ໃຫ້ຂຶ້ນລາຄາສິນຄ້າ ແລະ ບໍລິການ, ເຊິ່ງໃນເລື່ອງນີ້ ກະຊວງການຄ້າພາຍໃນ ແລະ ຄຸ້ມຄອງຜູ້ບໍລິໂພກ ໄດ້ຖືກມອບໝາຍໃຫ້ຄວບຄຸມລາຄາຂອງສິນຄ້າຕ່າງໆ.
ແຫຼ່ງຂ່າວ: ເວັບໄຊ້ຂ່າວ New Straits Times