ໃນຕອນເຊົ້າຂອງວັນທີ 5 ກັນຍາ 2018 ທະນາຄານແຫ່ງ ສປປ ລາວ (ທຫລ) ໄດ້ຈັດພິທີມອບ-ຮັບເລຂາຄະນະພັກ ທຫລ ແລະ ຜູ້ວ່າການ ທຫລ ທີ່ຫ້ອງປະຊຸມທະນາຄານແຫ່ງ ສປປ ລາວ ໂດຍການໃຫ້ກຽດເຂົ້າຮ່ວມຂອງທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ຮວມເຖິງບັນດາສະຫາຍຄະນະປະຈຳພັກ-ຄະນະຜູ້ວ່າການ ທຫລ, ຄະນະພັກ, ສະມາຊິກສະພາບໍລິຫານ ທຫລ, ບັນດາຄະນະກົມ/ທຽບເທົ່າກົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂດຍໃນພິທີດັ່ງກ່າວ ໄດ້ແຕ່ງຕັ້ງໃຫ້ທ່ານ ສອນໄຊ ສິດພະໄຊ ກຳມະການສຳຮອງສູນກາງພັກ, ເລຂາຄະນະພັກ ທຫລ ຂຶ້ນຮັກສາການຜູ້ວ່າການ ທະນາຄານແຫ່ງ ສປປ ລາວ ແທນທ່ານ ສົມພາວ ໄຟສິດ ກຳມະການສູນກາງພັກ, ເລຂາຄະນະພັກ ທຫລ, ຜູ້ວ່າການ ທຫລ (ຄົນເກົ່າ).
ໃນພິທີຄັ້ງນີ້ ທ່ານ ສົມພາວ ໄຟສິດ ໄດ້ລາຍງານສະພາບການຊີ້ນຳວຽກງານທະນາຄານໃນໄລຍະຜ່ານ ໂດຍມີຜົນສຳເລັດຫຼາຍດ້ານ ເປັນຕົ້ນແມ່ນ:
- ໄດ້ເອົາໃຈໃສ່ສຶກສາອົບຮົມ ແລະ ນຳພາການເມືອງແນວຄິດໃຫ້ແກ່ສະມາຊິກພັກ-ພະນັກງານ ຢ່າງເປັນປົກກະຕິ ແລະ ດ້ວຍຮູບການທີ່ເໝາະສົມ
- ຊີ້ນຳ-ນຳພາການປະຕິບັດວຽກງານວິຊາສະເພາະ ເຊິ່ງສາມາດປະຕິບັດໄດ້ຕາມຄາດໝາຍໄດ້ດີສົມຄວນ ໂດຍສະເພາະທາງດ້ານເງິນຕາຄື ເສດຖະກິດໄດ້ມີການຂະຫຍາຍຕົວຢ່າງຕໍ່ເນື່ອງ, ອັດຕາເງິນເຟີ້ສະເລ່ຍ 5 ເດືອນ 2018 ຢູ່ໃນລະດັບ 1,69%
- ຄວບຄຸມປະລິມານເງິນ M2 ຂະຫຍາຍຕົວໃນຂອບເຂດທີ່ກຳນົດໄວ້
- ການລະດົມທຶນຂອງທະນາຄານທຸລະກິດເພີ່ມຂຶ້ນ 11,24% ກວມ 54,16% ຂອງ GDP
- ສິນເຊື່ອຂອງທະນາຄານທຸລະກິດ ເພີ່ມຂຶ້ນ 14,49% ກວມ 47,82% ຂອງ GDP
- ໜີ້ບໍ່ເກີດໝາກອອກຜົນກໍ່ຢູ່ໃນແຜນທີ່ກຳນົດໄວ້ ປັດຈຸບັນທະນາຄານທຸລະກິດ ແລະ ສະຖາບັນການເງີນ ມີການຂະຫຍາຍຕົວທາງດ້ານປະລິມານ ແລະ ຄຸນນະພາບ
- ລະບົບນິຕິກໍາໃນການຄຸ້ມຄອງມະຫາພາກເງິນຕາ ໄດ້ຮັບການສ້າງ ແລະປັບປຸງ
- ວຽກງານບັນຊີ-ການຊໍາລະໄດ້ມີບາດກ້າວທີ່ຕັ້ງໜ້າ
- ວຽກງານຫຼັກຊັບ ແລະ ວຽກງານຕ້ານການຟອກເງິນໄດ້ຈັດຕັ້ງປະຕິບັດຢ່າງມີຜົນຄືບໜ້າ
- ການພົວພັນຮ່ວມມືພາກພື້ນ ແລະ ສາກົນ ໄດ້ຮັບການເສີມຂະຫຍາຍຢ່າງຕັ້ງໜ້າ ເຮັດໃຫ້ບົດບາດຂອງຂະແໜງການທະນາຄານລາວ ໄດ້ຮັບການຍົກສູງຂຶ້ນໃນເວທີພາກພື້ນ ແລະສາກົນ.
ທ່ານ ຈັນສີ ໂພສີຄຳ ໄດ້ຕີລາຄາສູງຕໍ່ການຊີ້ນຳ-ນຳພາຂອງທ່ານ ສົມພາວ ໄຟສິດ ພ້ອມໝູ່ຄະນະທີ່ເອົາໃຈໃສ່ຕໍ່ການປະຕິບັດໜ້າທີ່ການເມືອງຂອງຕົນຢ່າງມີຜົນສຳເລັດໃນຫຼາຍດ້ານ ນອກຈາກນີ້ທ່ານຍັງໄດ້ໃຫ້ຄຳເຫັນເພີ່ມເຕີມວ່າ “ການຍົກຍ້າຍ ແລະການແຕ່ງຕັ້ງການນໍາລະດັບສູງຂອງທະນາຄານໃນຄັ້ງນີ້ ແມ່ນເປັນໄປປົກກະຕິຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່”.
ສຳລັບທ່ານ ສອນໄຊ ສິດພະໄຊ ແມ່ນມີປະຫວັດການເຄື່ອນໄຫວວຽກງານຢູ່ທະນາຄານແຫ່ງ ສປປ ລາວ ເປັນເວລາຍາວນານ ກ່ອນໜ້ານີ້ທ່ານເຄີຍດຳລົງຕຳແໜ່ງຜູ່ອຳນວຍການທະນາຄານຮ່ວມທຸລະກິດລາວ-ຫວຽດ, ເປັນຜູ້ອຳນວຍການທະນາຄານການຄ້າຕ່າງປະເທດລາວ, ຈາກນັ້ນທ່ານໄດ້ຮັບໜ້າທີ່ເປັນຮອງຜູ້ວ່າການ ທະນາຄານແຫ່ງ ສປປ ລາວ ແລະ ໃນກອງປະຊຸມໃຫຍ່ຄັ້ງທີ X ຂອງພັກ ທ່ານໄດ້ຮັບການເລືອກຕັ້ງເປັນກຳມະການສຳຮອງສູນກາງພັກ.
ແຫຼ່ງຂ່າວ ແລະ ຮູບປະກອບ: ໜັງສືພິມເສດຖະກິດ-ການຄ້າ