ເມື່ອວັນທີ 21 ສິງຫາ 2018 ເອເອຟພີລາຍງານວ່າ ທ່ານ ນາງ ອອງຊານ ຊູຈີ ທີ່ປຶກສາແຫ່ງຊາດ ແລະ ລັດຖະມົນຕີວ່າການກະຊວງການຕ່າງປະເທດມຽນມາ ກ່າວເຖິງຄວາມຄືບໜ້າການດຳເນີນການເພື່ອຮັບຕົວຜູ້ອົບພະຍົບຈາກບັງກາລາເທດກັບຄືນມຽນມາ ຫຼັງຊາວມຸສລິມໂຣຮິນຍາກວ່າ 7 ແສນຄົນ ໄດ້ອົບພະຍົບໜີຄວາມຮຸນແຮງຈາກພາລະກິດກວາດລ້າງກຸ່ມຕິດອາວຸດຂອງກອງທັບມຽນມາໃນລັດຍະໄຂ່ໄປບັງກາລາເທດວ່າຂຶ້ນຢູ່ກັບທາງລັດຖະບານບັງກາລາເທດ
ທ່ານ ນາງ ຊູຈີ ກ່າວໃນການປະຊຸມວິຊາການ ໃນຫົວຂໍ້ ຄວາມທ້າທາຍ ແລະ ຫົນທາງຕໍ່ໜ້າໃນຊ່ວງປ່ຽນຜ່ານຂອງລະບອບປະຊາທິປະໄຕມຽນມາວ່າ “ມັນຍາກກັບການທີ່ມຽນມາຈະກຳນົດເວລາໄດ້ເອງພຽງຝ່າຍດຽວ ເພາະວ່າເຮົາຕ້ອງເຮັດວຽກຮ່ວມກັບທາງລັດຖະບານບັງກາລາເທດ ແລະ ບັງກາລາເທດຈຳເປັນຕ້ອງຕັດສິນໃຈວ່າຕ້ອງກຳນົດໄລຍະເວລາດົນພຽງໃດ”
ຄຳກ່າວຂອງທ່ານ ນາງ ອອງຊານ ຊູຈີ ມີຂຶ້ນຫຼັງຈາກທີ່ລັດຖະບານມຽນມາຖືກສະຫະປະຊາຊາດ ແລະ ປະຊາຄົມໂລກກົດດັນຢ່າງໜັກໃຫ້ຮັບຮອງຄວາມປອດໄພ ແລະ ຈັດສ້າງຊຸມຊົນທີ່ຢູ່ອາໃສທີ່ເຄົາລົບຄວາມເປັນມະນຸດຂອງຊາວໂຣຮິນຢາ ຫຼັງມຽນມາກັບບັງກາລາເທດລົງນາມໃນຂໍ້ຕົກລົງສົ່ງຕົວຊາວໂຣຮິນຢາກັບຖິ່ນຖານໃນລັດຍະໄຂ່ ແຕ່ຍັງບໍ່ມີຄວາມຄືບໜ້າເນື່ອງຈາກຊາວໂຣຮິນຢາ ແລະ ບັງກາລາເທດຍັງຄຳນຶງເຖິງຄວາມປອດໄພ ທັງຍັງຕົກລົງກັນບໍ່ໄດ້ເຖິງລາຍລະອຽດ ໂດຍສະເພາະປະເດັນທີ່ມຽນມາຍັງຢືນຢັນການປະຕິເສດຍອມໃຫ້ໃຊ້ສັນຊາດໃນບັດປະຊາຊົນວ່າ “ໂຣຮິນຢາ” ເຊິ່ງອ້າງວ່າບໍ່ແມ່ນໜຶ່ງໃນຊົນເຜົ່າຂອງມຽນມາ ແລະ ຄ້າຍອົບພະຍົບທີ່ມຽນມາຈັດໄວ້ໃຫ້ນັ້ນຍັງບໍ່ເໝາະສົມຕໍ່ການຢູ່ອາໃສ
ແຫລ່ງຂ່າວ: www.khaosod.co.th