ສຳນັກຂ່າວ AFP ລາຍງານຈາກເມືອງແທມປາ, ປະເທດສະຫະລັດອາເມລິກາ ເມື່ອວັນທີ 26 ກໍລະກົດ ວ່າທີມນັກວິໄຈໃນໂຄງການຍານສຳຫລວດອະວາກາດ Mars Express ຂອງອົງກອນອະວາກາດເອີຣົບ ESA ເຜີຍຜົນການຄົ້ນພົບໃນວາລະສານວິທະຍາສາດໄຊແອນສ໌ ລະບຸເຖີງການຄົ້ນພົບທະເລສາບຂະຫນາດໃຫຍ່ກ້ອງຊັ້ນນໍ້າກ້ອນເທີງດາວອັງຄານ ບົ່ງຊີ້ເຖີງການມີຢູ່ຂອງນໍ້າ ແລະ ອາດຮວມໄປເຖິງສີ່ງທີ່ມີຊີວິດອີກດ້ວຍ.
ການຄົ້ນຫາແມ່ນນໍາໃຊ້ອຸປະກອນເຣດ້າທີ່ໃຊ້ຢັ່ງຄວາມເລີກເອີ້ອນວ່າ ມາຣ໌ຊິດ ຫລື Mars Advanced Radar for Subsurface and Ionosphere Sounding (MARSIS) ໃນພູມຖານທີ່ເອີ້ນວ່າ ‘ ພຣານຸມ ເອົາສຕາເລ’ (Planum Australe) ທີ່ບໍລິເວນຊັ້ນຂົ້ວນໍ້າກ້ອນທາງຕອນໃຕ້ຂອງດາວອັງຄານ ລະຫວ່າງເດືອນ ພຶດສະພາ ປີ 2012 ຫາ ເດືອນ ທັນວາ 2015, ຂໍ້ມູນ 29 ຊຸດຊ່ວຍໃຫ້ນັກວິທະຍາສາດສາມາດຮ່າງແຜນທີ່ຂອງທະເລສາບກ້ອງຊັ້ນນໍ້າກ້ອນໄດ້.
ທະເລສາບດັ່ງກ່າວມີຄວາມກ້ວາງປະມານ 20 ກິໂລແມັດ ເປັນແຫລ່ງນໍ້າທີ່ໃຫຍ່ທີ່ສຸດເທົ່າທີ່ເຄີຍມີການຄົ້ນພົບເທີງດາວອັງຄານ ຢູ່ເລິກລົງໄປຈາກຊັ້ນພື້ນຜິວນໍ້າກ້ອນຂອງດາວອັງຄານປະມານ 1,6 ກິໂລແມັດ ແລະ ຄາດວ່າມີຄວາມເລິກປະມານ 1 ແມັດ, ແຕ່ບໍ່ສາມາດລະບຸໄດ້ວ່າມີຄວາມຍາວເທົ່າໃດ ຊື່ງຂໍ້ມູນເຣດ້າທີ່ປະກົດມີລັກສະນະຄ້າຍຄືກັນກັບທະເລສາບໃຕ້ດິນທີ່ພົບໃນກ້ອງຊັ້ນນໍ້າກ້ອນໃນແອນຕາກຕິກ ແລະ ກີນແລນ ເທີງໂລກ.
ຢ່າງໃດກໍຕາມ ກ່ຽວກັບຄຳຖາມທີ່ວ່າເຄີຍມີການກໍ່ຕົວຂອງສີ່ງທີ່ມີຊີວິດໃນທະເລສາບແຫ່ງນີ້ ແລະ ມັນຍັງຄົງຢູ່ມາຈົນເຖີງປະຈຸບັນຫລືບໍນັ້ນ ຍັງຄົງເປັນປະເດັນທີ່ຍັງບໍ່ລົງຕົວ ດ້ວຍສະພາບປະຈຸບັນ, ຊື່ງຜູ້ຊ່ຽວຊານສົງໄສເຖີງຄວາມເປັນໄປໄດ້ ເພາະເຊື່ອວ່ານໍ້າຈະມີອຸນຫະພູມທີ່ເຢັນຈັດ ແລະ ມີປະລິມານຄວາມເຂັ້ມຂອງເກືອ ແລະ ແຮ່ທາດໃນລະດັບສູງ, ອຸນຫະພູມຄາດວ່າຈະຢູ່ຕໍ່າກວ່າຈຸດເຍືອກແຂງຂອງນໍ້າບໍລິສຸດຫລາຍ. ຂະນະດຽວກັນການທີ່ນໍ້າຍັງຄົງສະພາບເປັນຂອງແຫລວພາຍໃຕ້ສະພາວະນີ້ໄດ້ ຈຳເປັນຕ້ອງມີສ່ວນຜະສົມຂອງໂຊດຽມ, ແຄວຊຽມ ແລະ ແມກນີຊຽມ.
ແຫລ່ງຂ່າວຕ່າງປະເທດ: TDN&AFP