ສຳນັກຂ່າວຕ່າງປະເທດລາຍງານຈາກເມືອງເຮເທນສ໌, ປະເທດເກຣັກ ເມື່ອວັນທີ 25 ກໍລະກົດ ວ່ານາຍົກລັດຖະມົນຕີ ອະເລັກຊິດ ຊີປຣາສ ຖະແຫລງການເມື່ອວັນຈັນ ກ່ຽວກັບການໄວ້ອາໄລທົ່ວປະເທດເປັນເວລາ 3 ມື້ໃຫ້ແກ່ຜູ້ເສຍຊີວິດຢ່າງຫນ້ອຍ 74 ຄົນ ຈາກເຫດການໄຟປ່າແຜ່ລາມຫລາຍສິບຈຸດ ໃນພື້ນທີ່ເມືອງເຮເທນສ໌ ທີ່ສົ່ງຜົນໃຫ້ມີຜູ້ຮັບບາດເຈັບເພີ່ມອີກຢ່າງຫນ້ອຍ 178 ຄົນ ແລະ ໃນຈຳນວນນີ້ 10 ຄົນຍັງມີອາການຢູ່ໃນພາວະວິກິດ ຂະນະທີ່ສຳນັກຂ່າວແຫ່ງຊາດຂອງເກຣັກ ລາຍງານວ່າໄພພິບັດທາງທຳມະຊາດທີ່ເກີດຂື້ນນີ້ຖືເປັນ ໂສກອະນາຕະກຳແຫ່ງຊາດ.

ດ້ານສຳນັກງານປ້ອງກັນ ແລະ ບັນເທົາສາທາລະນະໄພຂອງເກຣັກ ລາຍງານວ່າເຈົ້າຫນ້າທີ່ດັບເພີງຫລາຍພັນຄົນຍັງຄົງກະຈາຍກຳລັງກັນຢູ່ຕາມຈຸດເກີດເຫດ ເພື່ອເລັ່ງຄວບຄຸມສະຖານະການໂດຍຈຸດທີ່ວິກິດທີ່ສຸດ ກໍຄືທີ່ເມືອງມາຕີ ຊື່ງເປັນຫນື່ງໃນເມືອງທ່ອງທ່ຽວຍອດນິຍົມ ຕັ້ງຢູ່ຫ່າງຈາກເມືອງເຮເທນສ໌ ໄປທາງຕາເວັນຕົກປະມານ 30 ກິໂລແມັດ. ແຕ່ປະຕິບັດການແມ່ນເປັນໄປດ້ວຍຄວາມຍາກລຳບາກເນື່ອງຈາກສະພາບອາກາດຮ້ອນແຮງ ແລະ ກະແສລົມແຮງ. ຂະນະດຽວກັນມີການປະເມີນແລ້ວວ່າ ໄຟປ່າຄັ້ງນີ້ແມ່ນມີຄວາມຮຸນແຮງຫລາຍກວ່າໄຟປ່າເທີງເກາະອີເວຍ ທາງຕອນໃຕ້ຂອງເກຣັກ, ເມື່ອເດືອນ ສິງຫາ 2007 ທີ່ເຮັດໃຫ້ມີຜູ້ເສຍຊີວິດເຖີງ 77 ຄົນ.

ທັງນີ້, ນາຍົກລັດຖະມົນຕີ ແຫ່ງເກຣັກ ທ່ານ ຊີປຣາສ ໄດ້ປະກາດພາວະສຸກເສີນຂອງໄຟປ່າຄັ້ງນີ້ເປັນໄພພິບັດລະດັບປະເທດເປັນທີ່ຮຽບຮ້ອຍ ແລະ ຍື່ນຄໍາຮ້ອງຂໍຄວາມຊ່ວຍເຫລືອຈາກສະຫະພາບເອີຣົບ (EU) ນຳ. ປະຈຸບັນແມ່ນທາງບັນດາປະເທດ ໄຊປຣັດ, ປອກຕຸຍການ, ແອັດສະປາຍ, ອີຕາລີ ໄດ້ທະຍອຍລຳລຽງສົ່ງມອບຄວາມຊ່ວຍເຫລືອທີ່ຈຳເປັນໃຫ້ແກ່ລັດຖະບານເຮເທນສ໌ແລ້ວ.

ນອກຈາກເກຣັກແລ້ວ ຍັງມີອີກຫລາຍປະເທດໃນເອຣົບ ທີ່ກຳລັງຜະເຊີນກັບໄຟປ່າເຊັ່ນກັນ ບໍ່ວ່າຈະເປັນ ຊູແອດ, ນອກແວ, ແຟງລັງ, ລັດເວຍ ໄຟປ່າຄັ້ັງນີ້ແມ່ນສ່ວນຫນື່ງຂອງວິກິດໄພແລ້ງຂັ້ນຮຸນແຮງທີ່ສຸດໃນຮອບ 1 ສະຕະວັດ.

ແຫລ່ງຂ່າວຕ່າງປະເທດ: TDN, The New York Times.