ເມື່ອວັນທີ 26 ກໍລະກົດ 2018 ສະຫະປະຊາຊາດປະເມີນຈຳນວນປະຊາຊົນທີ່ໄດ້ຮັບຜົນກະທົບຈາກໄພພິບັດນ້ຳຖ້ວມຢ່າງກະທັນຫັນ ຈາກເຫດເຂື່ອນເຊປຽນ-ເຊນ້ຳນ້ອຍແຕກ ໃນວັນທີ 23 ກໍລະກົດ 2018 ທີ່ຜ່ານມາ ມີຢ່າງໜ້ອຍ 11,777 ຄົນ, ເຮືອນ 223 ຫຼັງ ແລະ ຂົວຢ່າງໜ້ອຍ 14 ແຫ່ງ ໄດ້ຮັບຄວາມເສຍຫາຍ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຖະແຫຼງເມືອວັນພຸດທີ່ຜ່ານມາວ່າ ຍັງມີຜູ້ສູນຫາຍຈາກໄພພິບັດໃນຄັ້ງນີ້ຢ່າງໜ້ອຍ 131 ຄົນ ແລະ ປະຊາຊົນກວ່າ 3,000ຄົນ ຕ້ອງການຄວາມຊ່ວຍເຫຼືອ ແຕ່ທ່ານນາຍົກບໍ່ໄດ້ໃຫ້ຂໍ້ມູນຊັດເຈນກ່ຽວກັບຕົວເລກຜູ້ເສຍຊີວິດ ຕາມລາຍງານຈາກທາງການແຂວງ ອັດຕະປື ໃຫ້ຮູ້ວ່າ ມີຜູ້ເສຍຊີວິດແລ້ວຢ່າງໜ້ອຍ 26 ຄົນ.
ໃນຂະນະດຽວກັນ ສະຫະພັນກາແດງ ແລະ ເດືອນສ້ຽວສາກົນ (International Federation of Red Cross & Red Crescent Societies, IFRC) ລາຍງານການສົ່ງຄະນະເດີນທາງມາທີ່ ສປປ ລາວ ເພື່ອຮ່ວມມືກັບອົງການກາແດງ ໃນການຊ່ວຍເຫຼືອຜູ້ປະສົບໄພ ເຊັ່ນດຽວກັບລັດຖະບານສິງໂປ ທີ່ປະກາດສົ່ງທີມສະໜັບສະໜູນພາລະກິດຂອງອົງການກາແດງໃນລາວ ພ້ອມທັງບໍລິຈາກເງິນຊ່ວຍເຫຼືອເບື້ອງຕົ້ນ 100,000 ໂດລາ