ວັນທີ 24 ກໍລະກົດ 2018 ທີ່ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະໄດ້ລົງພ້ນທີ່ ເພື່ອຊີ້ນຳ ແລະ ຕິດຕາມການຊ່ວຍເຫລືອຢ່າງໃຫ້ຊິດ
ທ່ານ ເລັດ ໄຊຍະພອນ ເຂົ້າແຂວງໆ ອັດຕະປື ໃຫ້ສຳພາດກັບທາງທີມງານຂ່າວ ເສດຖະກິດ-ການຄ້າຜ່ານໂທລະສັບວ່າ: ບ້ານເຮືອນປະຊາຊົນທີ່ຢູ່ໃກ້ແຄມແມ່ນ້ຳເຊປຽນໄດ້ຮັບຜົນກະທົບຢ່າງໜັກ ເປັນຕົ້ນແມ່ນ ບ້ານໃໝ່, ບ້ານຫີນລາດ, ບ້ານທ່າແສງຈັນ, ບ້ານຕະໝໍຍອດ, ບ້ານທ່ານຫີນໃຕ້, ບ້ານທ່າບົກ ແລະ ບ້ານທ່າມ່ວງ ເມືອງສະໜາມໄຊ ແຂວງອັດຕະປື ທັນທີທີ່ຊາບຂ່າວທາງອົງການປົກຄອງແຂວງ ໄດ້ປະສານສົມທົບກັບພາກສ່ວນທີ່ກ່ຽວຂ້ອງເພື່ອເຂົ້າໃຫ້ການຊ່ວຍເຫຼືອປະຊາຊົນຢ່າງຮີບດ່ວນຄັ້ງແຕ່ຄ່ຳຄືນຂອງວັນທີ 23 ກໍລະກົດ 2018 ແຕ່ມາຮອດປັດຈຸບັນ ແມ່ນຍັງບໍ່ສາມາດເຂົ້າຊ່ວຍເຫຼືອປະຊາຊົນໄດ້ໝົດ ເນື່ອງຈາກເຂດທີ່ໄດ້ຮັບຜົນກະທົບມີນ້ຳໄຫລແຮງກວມພ້ນທີ່ເປັນວົງກວ້າງ, ປະລິມານນ້ຳຍັງບໍ່ຫຼຸດລົງ ເຮັດໃຫ້ເຮືອທີ່ຈະເດີນທາງໄປຊ່ວຍບໍ່ສາມາດເຂົ້າໄປພື້ນທີ່ດັ່່ງກ່າວນັ້ນໄດ້, ຍັງມີປະຊາຊົນຈຳນວນຫຼາຍທີ່ຕິດຢູ່ຕາມຫຼັງຄາເຮືອນ ແລະ ປາຍຕົ້ນໄມ້.
ຕາມການແຈ້ງການຂອງຫ້ອງວ່າການແຂວງອັດຕະປື ລາຍງານໃຫ້ຮູ້ຕື່ມວ່າ ນັບແຕ່ເວລາ 20:00 ໂມງ ຂອງວັນທີ 23 ກໍລະກົດ 2018 ຈົນເຖິງປັດຈຸບັນ ຄະນະພັກ-ອຳນາດການປົກຄອງທຸກຂັ້ນ ພ້ອມດ້ວຍພະນັກງານ, ທະຫານ, ຕຳຫຼວດ ແລະ ປະຊາຊົນທົ່ວແຂວງ ຮວມທັງແຂວງໃກ້ຄຽງ ເຊັ່ນ: ຈຳປາສັກ, ເຊກອງ ແມ່ນໄດ້ສຸມໃສ່ຊ່ວຍເຫຼືອຈົນສຸດຄວາມສາມາດ,ແຕ່ກໍ່ເປັນເຫດການສຸດວິໄສ ຊ່ວຍບໍ່ໄດ້ໝົດທຸກຄົນໃນເວລາຈຳກັດ.
ນັກຂ່າວທ້ອງຖິ່ນປະຈຳພາກສະໜາມລາຍງານໃນເວລາປະມານ 16:00 ໂມງ ວ່າລັດຖະບານໄດ້ນຳເຮືອບິນເຮລິຄອບເຕີ 2 ລຳ ເຂົ້າມາຊ່ວຍເພີ່ມເຕີມ, ສົມທົບກັບເຮືອກູ້ຊີບທີ່ປະຈຳຢູ່ພື້ນທີ່ກ່ອນໜ້ານີ້ ໂດຍຍົນໄດ້ເຮັດການບິນສຳຫຼວດຫາຈຸດເປົ້າໝາຍ ແລະ ທະຍອຍຊ່ວຍເຫຼືອປະຊາຊົນທີຕົກຄ້າງຢູ່ບໍ່ຕ່ຳກວ່າ 200-300 ຄົນ ເຊິ່ງທີມໜ່ວຍກູ້ໄພກຳລັງເລັ່ງຕິດຕາມຄົ້ນຫາຕໍ່ໄປ. ເຊິ່ງປັດຈຸບັນມີລາຍງານມີປະຊາຊົນຂາດທີ່ຢູ່ອາໃສກວ່າ 6,600ຄົນ ແລະ ຕົວເລກຜູ້ສູນຫາຍຢ່າງບໍ່ເປັນທາງການຫຼາກວ່າ 200 ຄົນ ສ່ວນຕົວເລກຜຜູ້ເສຍຊີວິດຍັງບໍ່ມີຕົວເລກແນ່ນອນເທື່ອ.
ແຫລ່ງຂ່າວ: ເສດຖະກິດ-ການຄ້າ