ຕຶກເວີນເທຣດເຊັນເຕີ້ຖະຫລົ່ມ ໃນມະຫານະຄອນນິວຢອກ ຫລື ເຫດການ 9/11 ເຊິ່ງເກີດຂຶ້ນເມື່ອວັນທີ 11/09/2001
ໂດຍໃນປີນີ້ແມ່ນຄົບຮອບ 13 ປີພໍດີ ທາງທີມງານລາວໂພສຕ໌ ຈິ່ງຮວບຮວມເຫດການດັ່ງກ່າວ ເພື່ອລະນຶກເຖິງໂສກ
ນາຕະກຳສຸດໂຫດ ທີ່ທົ່ວໂລກຕ້ອງຕົກຕະລຶງຕະຫລອດການ.
ຍ້ອນຫຼັງຄືນໄປຈາກນີ້ 13 ປີ ຄືໃນວັນທີ 11 ກັນຍາ 2001 ໃນຂະນະທີ່ຊາວເມືອງນິວຢອກ ສະຫະລັດອາເມຣິກາ ໃຊ້ຊີວິດ
ຕາມປົກກະຕິຢ່າງເຊັ່ນທຸກໆວັນ, ແຕ່ຢູ່ບໍ່ຢູ່ກໍກໍເກີດເຫດການທີ່ບໍ່ຄາດຄິດ ສະເທືອນຂັວນຊາວອາເມຣິກັນ ກໍຄືຜູ້ຄົນ
ໃນທົ່ວໂລກ ເມື່ອກຸ່ມກໍ່ການຮ້າຍຈຳນວນ 19 ຄົນ ໄດ້ທຳການຍຶດເຮືອບິນພານິດ 4 ລຳ ແລ້ວບັງຄັບໃຫ້ເຮືອບິນ 2 ລຳ
ບິນຕຳເຂົ້າຕຶກອາຄານເວີນເທຣດເຊັນເຕີ້ ເຊິ່ງເປັນສັນຍາລັກຂອງມະຫານະຄອນນິວຢອກ ທີ່ມີພະນັກງານເຮັດວຽກ
ຢູ່ກ່ວາ 50,000 ຄົນ ໂດຍແຮງຕຳຂອງເຮືອບິນ ໄດ້ເຮັດໃຫ້ຕຶກອາຄານພັງຖະຫລົ່ມລົງ ແລະ ເກີດເພີງໄໝ້ ສົ່ງຄັວນ
ລອຍປຸ້ມຂຶ້ນສູ່ທ້ອງຟ້າ ໃນຂະນະທີ່ຜູ້ຄົນທີ່ຢູ່ພາຍໃນຕຶກ ແລະ ພາຍໃນບໍລິເວນດັ່ງກ່າວ ກໍພາກັນປົບໜີຕາຍກັນຢ່າງ
ສົນລະວົນ.
ເຫດການໂສກນາຕະກຳໃນຄັ້ງນັ້ນ ໄດ້ພາກຊີວິດຜູ້ຄົນໄປກ່ວາ 3 ພັນຄົນ ແລະ ໃນນັ້ນຍັງບໍ່ທັນລວມເຖິງ 1 ພັນຄົນ
ທີ່ສູນຫາຍ ໂດຍບໍ່ພົບແມ່ນແຕ່ຊາກສົບຈາກເຫດການດັ່ງກ່າວເລີຍ, ສ່ວນຜູ້ກໍ່ການຮ້າຍຈຳນວນ 19 ຄົນ ແມ່ນໄດ້
ວາງແຜນສະລະຊີບຂອງຕົນເອງ ເພື່ອພາລະກິດດັ່ງກ່າວນີ້ໂດຍສະເພາະ.
ພາຍຫລັງເຫດການດັ່ງກ່າວບໍ່ດົນ ທາງການສະຫະລັດກໍສາມາດສືບຮູ້ວ່າ ເຫດການສະເທືອນຂັວນຄັ້ງນີ້ ເປັນຝີມືຂອງ
ກຸ່ມກໍ່ການຮ້າຍອັນກໍອິດະ ເຊິ່ງນຳໂດຍ ອຸຊາມະ ບິນລາ ດິນ ເຊິ່ງຕໍ່ມາໄດ້ກາຍເປັນຜູ້ກໍ່ການຮ້າຍທີ່ສະຫະລັດຕ້ອງການ
ໂຕຫລາຍທີ່ສຸດໃນໂລກ ແລະ ເຂົາກໍເປັນຜູ້ກໍ່ການຮ້າຍທີ່ຕາມລ່າຫາໂຕຍາກທີ່ສຸດໃນໂລກເຊັ່ນດຽວກັນ.
ຈົນເມື່ອເຫດການດັ່ງກ່າວຜ່ານກາຍມາເປັນເວລາ 10 ປີ ຄືຮອດເດືອນພຶດສະພາ ປີ 2011 ທາງການສະຫະລັດອາເມຣິ
ກາ ກໍໄດ້ອອກມາຖະແຫລງການຢ່າງເປັນທາງການວ່າ ອຸຊາມະ ບິນລາ ດິນ ໄດ້ເສຍຊີວິດລົງແລ້ວ ຈາກປະຕິບັດການ
ທາງການທະຫານຂອງສະຫະລັດ ເຊິ່ງເປັນຂ່າວທີ່ໂດ່ງດັງໄປໃນທົ່ວໂລກ.
ຢ່າງໃດກໍຕາມ ຄວາມສຳເລັດໃນການສັງຫານ ອຸຊາມະ ບິນ ລາດິນ ບໍ່ໄດ້ເຮັດໃຫ້ເຫດການ 9/11 ຖືກລຶບອອກໄປຈາກ
ຄວາມຊົງຈຳຂອງຊາວອາເມຣິກັນເລີຍ ເພາະນັບຕັ້ງແຕ່ເກີດເຫດນັ້ນມາ ໃນທຸກໆປີເມື່ອຮອດວັນທີ 11 ກັນຍາ ກໍຈະມີ
ກິດຈະກຳລະນຶກເຖິງເຫດການດັ່ງກ່າວຢ່າງເປັນປະຈຳ.
