ຍີ່ປຸ່ນຍິງຈະຫລວດຊື່ງພັດທະນາໂດຍນັກທຸລະກິດຍີ່ປຸ່ນຂື້ນສູ່ອະວາກາດ ແຕ່ຫລັງຈາກທີ່ຍິງອອກໄປໄດ້ຫນ້ອຍດຽວ ຈະຫລວດກໍຕົກລົງມາໃສ່ຖານຍິງເຮັດໃຫ້ເກີດລະເບີດ ແຕ່ບໍ່ມີຜູ້ໄດ້ຮັບບາດເຈັບ.
ສຳນັກຂ່າວຕ່າງປະເທດລາຍງານວ່າ ຈະຫລວດອະວາກາດ MOMO-2 ຊື່ງພັດທະນາໂດຍ ທາຄາຟູມິ ໂຮລິເອະ, ຜູ້ກໍ່ຕັ້ງບໍລິສັດເຕັກໂນໂລຊີອະວາກາດ Interstellar Technologies ໄດ້ປ່ອຍຈະຫລວດໄປສູ່ວົງໂຄຈອນໂລກ ໃນ ເມື່ອວັນທີ 30 ມິຖຸນາ. ແຕ່ພາຍຫລັງປ່ອຍຂື້ນໄປໄດ້ພຽງຫນ້ອຍດຽວກໍຕົກລົງມາໃສ່ຖານຈົນເກີດລະເບີດ ຕໍ່ຫນ້າຜູ້ຄົນເປັນຈຳນວນຫລວງຫລາຍທີ່ມານັ່ງລໍຖ້າເບີ່ງ. ປະຈຸບັນແມ່ນບໍ່ມີລາຍງານຜູ້ໄດ້ຮັບບາດເຈັບຈາກເຫດການໃນຄັ້ງນີ້.
ຕາມການກຳນົດທີ່ວາງໄວ້, ຈະຫລວດອະວາກາດ MOMO-2 ຄວາມຍາວ 10 ກວ່າແມັດ ຈະຖືກນຳສົ່ງຍິງອອກໄປສູ່ວົງໂຄຈອນໂລກ ເພື່ອສົ່ງອຸປະກອນສັງເກດການຢູ່ທີ່ຄວາມສູງ 100 ກິໂລແມັດ ແລະ ເປັນຈະຫລວດອະວາກາດທີ່ໄດ້ຮັບການສະຫນັບສະໜູນຈາກບໍລິສັດເອກະຊົນເປັນເທື່ອທຳອິດທີ່ໄດ້ອອກສູ່ອະວາກາດ ແຕ່ພາລະກິດນີ້ກໍບໍ່ເປັນຜົນ. ຄວາມພະຍາຍາມໃນການສົ່ງຈະຫລວດອອກສູ່ອະວາກາດຂອງພາກເອກະຊົນຍີ່ປຸ່ນແມ່ນບໍ່ເປັນໄປຕາມທີ່ຄາດການມາໂດຍຕະຫລອດ ເມື່ອທຽບກັບຜົນງານຂອງສຳນັກງານສຳຫລວດອະວາກາດຍີ່ປຸ່ນ JAEA ຂອງລັດຖະບານ.
Interstellar Technologies ເຄີຍພະຍາຍາມຍິງຈະຫລວດ MOMO-2 ເມື່ອເດືອນກໍລະກົດ 2017 ແຕ່ຂາດການຕິດຕໍ່ຈະຫລວດພຽງນາທີດຽວຫລັງຈາກທີ່ປ່ອຍອອກໄປ.
ແຫລ່ງຂ່າວຕ່າງປະເທດ: TRN