ອົງການສະຫະປະຊາຊາດຄະນະກຳມາທິການຂັ້ນສູງເພື່ອຜູ້ອົບພະຍົບ ໄດ້ປະເມີນຈໍານວນຜູ້ອົບພະຍົບສະສົມໃນໂລກຢູ່ທີ່ເກືອບ 70 ລ້ານຄົນແລ້ວ, ສ່ວນໃຫຍ່ຍັງຄົງແມ່ນຄົນຊີເຣຍ ແລະ ອັບການິສະຖານ.

ໃນວັນທີ່ 19 ມິຖຸນາ 2018, ສຳນັກຂ່າວຕ່າງປະເທດລາຍງານຈາກເມືອງເຈນີວາ, ປະເທດສະວິດເຊີແລນວ່າ ອົງການສະຫະປະຊາຊາດຄະນະກຳມາທິການຂັ້ນສູງເພື່ອຜູ້ອົບພະຍົບ (ຍູເອັນເອສຊີອາ) ອອກລາຍງານປະຈໍາປີເນື່ອງໃນ ”ວັນຜູ້ອົບພະຍົບໂລກ” ເຊິ່ງກົງກັບວັນທີ່ 20 ມິຖຸນາ ຂອງທຸກປີ ກ່ຽວກັບສະຖານະການການອົບພະຍົບໃນໂລກຕະຫຼອດທັງປີທີ່ຜ່ານມາວ່າ: ສະຖິຕິການເປັນຜູ້ອົບພະຍົບ, ຜູ້ສະແຫວງຫາສະຖານທີ່ອົບພະຍົບ ຫຼື ຜູ້ທີ່ປາສະຈາກທີ່ທີ່ຢູ່ອາໄສພາຍໃນປະເທດຂອງຕົນເອງ ເຊິ່ງໄດ້ຮັບຜົນກະທົບຈາກສົງຄາມ, ຄວາມຮຸນແຮງ ແລະ ການກົດຂີ່ ຕະຫຼອດທັງປີ 2017 ຢູ່ທີ່ 68.5 ລ້ານຄົນ, ເພີ່ມຂຶ້ນເກືອບ 3 ລ້ານຄົນຈາກສະຖິຕິໃນປີ 2016. ນັ້ນໝາຍຄວາມວ່າໃນປະຊາກອນໂລກທຸກ 110 ຄົນ ຈະມີ 1 ຄົນຢູ່ໃນສະຖານະການຜູ້ອົບພະຍົບ.

ທັງນີ້ ປະເທດຊີເຣຍຍັງຄົງເປັນປະເທດອັນດັບ 1 ທີ່ມີປະຊາກອນຢູ່ໃນສະຖານະຜູ້ອົບພະຍົບ. ສະຖິຕິໃນປີທີ່ຜ່ານມາຂອງຈໍານວນຜູ້ອົບພະຍົບຄົນຊີເຣຍ ແມ່ນຫຼາຍກວ່າ 6.3 ລ້ານຄົນ, ຄິດເປັນສັດສ່ວນຫຼາຍກວ່າ 1 ໃນ 3 ຂອງປະຊາກອນຜູ້ອົບພະຍົບທັງໝົດທີ່ຢູ່ພາຍໃຕ້ການດູແລຂອງຍູເອັນເອສຊີອາ ແລະ ເພີ່ມຂຶ້ນປະມານ 800.000 ຄົນ ຈາກສະຖິຕິໃນປີ 2016. ແຕ່ສະຖິຕິດັ່ງກ່າວບໍ່ໄດ້ລວມເອົາຄົນຊີເຣຍອີກ 6.2 ລ້ານຄົນເຊິ່ງຕິດຄ້າງຢູ່ຕາມສະຖານທີ່ຮົບ ຫຼື ບໍ່ມີທີ່ຢູ່ອາໄສຢູ່ພາຍໃນປະເທດ. ສ່ວນອັນດັບ 2 ໄດ້ແກ່ ປະເທດອັບການິສະຖານ ດ້ວຍສະຖິຕິຜູ້ອົບພະຍົບຈໍານວນ 2.6 ລ້ານຄົນ, ເພີ່ມຂຶ້ນ 5% ໃນຮອບ 1 ປີທີ່ຜ່ານມາ.

ຢ່າງໃດກໍຕາມ ປະເທດທີ່ມີສັດສ່ວນການເພີ່ມຂຶ້ນຂອງຜູ້ອົບພະຍົບຫຼາຍທີ່ສຸດຄື ປະເທດຊູດານໃຕ້, ເພີ່ມຂຶ້ນຈາກ 1.4 ລ້ານຄົນໃນຊ່ວງຕົ້ນປີທີ່ຜ່ານມາ ເປັນຫຼາຍເຖິງ 2.4 ລ້ານຄົນໃນຊ່ວງທ້າຍປີດຽວກັນ. ຜູ້ອົບພະຍົບສ່ວນໃຫຍ່ອົບພະຍົບໄປຍັງປະເທດອ້ອມຂ້າງ ເຊັ່ນ ເຄນຍາ, ຍູກັນດາ ແລະ ຊູດານ. ຂະນະທີ່ສະຖິຕິຜູ້ອົບພະຍົບຈາກມຽນມາເພີ່ມຂຶ້ນ 2 ເທົ່າໃນປີທີ່ຜ່ານມາເປັນ 1.2 ລ້ານຄົນ, ແນ່ນອນວ່າສ່ວນໃຫຍ່ເປັນຄົນໂຣຮິນຈາໃນລັດຍະໄຂ່ ແລະ ອົບພະຍົບໄປຍັງປະເທດບັງກະລາເທດ.

ແຫຼ່ງຂ່າວ: ເດລີນິວ, ຮູບພາບ: ຜູ້ອົບພະຍົບ