ເມື່ອວັນທີ 16 ມິຖຸນາ 2018 ເວັບໄຊສ໌ເດລີເມວ ໃນອັງກິດລາຍງານຜູ້ໃຊ້ສະມາດໂຟນ, ໄອໂຟນ ຕຳນິ ລະບົບປະຕິບັດການລ່າສຸດ iOS 11.4 ເຮັດໃຫ້ແບັດເຕີລີ້ຫມົດຢ່າງໄວວາ ຫລັງຈາກບໍລິສັດ Apple ໄດ້ປ່ອຍລະບົບປະຕິບັດການນີ້ໃຫ້ຜູ້ໃຊ້ iPhone ອັບເດດເມື່ອ 2 ອາທິດທີ່ແລ້ວ ແລະ ໃນຂະນະນີ້ທາງ Apple ກໍຍັງບໍ່ທັນໄດ້ອອກມາຊີ້ແຈງ ຫລື ເປີດເຜີຍຕໍ່ສາເຫດທີ່ເຮັດໃຫ້ແບັດເຕີລີ້ຂອງ iPhone ຫມົດໄວຈາກການອັບເດດລະບົບປະຕິບັດການ iOS 11.4 ແຕ່ຢ່າງໃດ.
ຖ້າທ່ານເປັນຫນື່ງໃນບຸກຄົນທີ່ຍັງບໍ່ທັນໄດ້ອັບເດດ ສະມາດໂຟນເປັນ iOS 11.4 ແລ້ວຢ່າຟ້າວອັບເດດ ແມ່ນໃຫ້ລໍຖ້າຕໍ່ໄປກ່ອນ ເພາະມີຜູ້ໃຊ້ iPhone ກຳລັງຮຽກຮ້ອງເຖີງການອັບເດດລະບົບຊອຟ໌ແວລ໌ປະຕິບັດການລ່າສຸດຂອງ Apple ທີ່ປ່ອຍອອກມາ ໂດຍມີຜູ້ໃຊ້ iPhone ຄົນຫນື່ງຂຽນລົງໃນ Reddit ວ່າລະບົບປະຕິບັດການ iOS 11.4 ກິນແບັດເຕີລີ້ ເຮັດໃຫ້ຫມົດໄວກວ່າປົກກະຕິເຖີງ 25% ໃນຂະນະທີ່ຜູ້ໃຊ້ iPhone ຄົນອື່ນໆກໍບອກວ່າພວກເຂົາຕ້ອງໄດ້ສາກແບັດເຕີລີ້ຢ່າງຕໍ່ເນື່ອງ.
iOS 11.4 ເປີດໃຫ້ຜູ້ຄົນໄດ້ນຳໃຊ້ເມື່ອວັນທີ 29 ພຶດສະພາ ເພື່ອເຮັດໃຫ້ເຄື່ອງໂທລະສັບ iPhone ມີປະສິດທິພາບໃນການເກັບຂໍ້ຄວາມໃນ icloud ໂດຍລະບົບປະຕິບັດການ iOS 11.4 ຍັງປະກອບດ້ວຍ AirPlay2 ສຳລັບສຽງໃນຫລາຍໆຫ້ອງ ເພື່ອຮອງຮັບຄູ່ສຽງສະເຕີຣີໂອ Homepod.
ແຫລ່ງຂ່າວຕ່າງປະເທດ : TNA