ສຳນັກຂ່າວຕ່າງປະເທດລາຍງານວ່າ ນາຍົກລັດຖະມົນຕີສະເປນ, ເປໂດຣ ຊານເຊສ໌ ປະກາດຈະໃຫ້ເຮືອ ອະຄົວລຽດສ໌ ຊື່ງບັນທຸກຜູ້ລີ້ໄພ 629 ຄົນ ເຂົ້າຈອດທຽບທ່າຢ່າງປອດໄພໄດ້ທີ່ເມືອງ ບາເລນເຊຍ ຫລັງຈາກເຮືອລຳນີ້ລອຍຢູ່ກາງທະເລເມດິຕາເລນຽນ ມາຫລາຍມື້ ເພາະທາງການອີຕາລີ ແລະ ມອລຕາ ປະຕິເສດບໍ່ໃຫ້ເຮືອເຂົ້າທຽບທ່າໃນປະເທດຂອງພວກເຂົາ.
ທັງນີ້ ເຮືອອະຄົວລຽດສ໌ ຮັບຜູ້ລີ້ໄພຊື່ງຮວມທັງເດັກໄວຫນຸ່ມຈຳນວນກວ່າ 123 ຄົນ ຂື້ນມາຈາກເຮືອຢາງຫລາຍລຳນອກຊາຍຝັ່ງປະເທດລີເບຍ ໃນປະຕິບັດການຊ່ວຍເຫລືອ 6 ເທື່ອຊ່ວງທ້າຍອາທິດທີ່ຜ່ານມາ ແຕ່ປະເທດອີຕາລີປະຕິເສດບໍ່ໃຫ້ເຮືອລຳນີ້ເຂົ້າທຽບທ່າ ໂດຍລັດຖະມົນຕີວ່າການກະຊວງປ້ອງກັນປະເທດອ້າງວ່າ ບໍ່ຕ້ອງການປ່ຽນໃຫ້ອີຕາລີ ກາຍເປັນສູນອົບພະຍົບຂະຫນາດໃຫຍ່ ຂະນະທີ່ມອລຕາລະບຸວ່າ ເລື່ອງນີ້ແມ່ນຢູ່ໃນຄວາມຮັບຜິດຊອບຂອງອີຕາລີ.
ຢ່າງໃດກໍຕາມ ຊານເຊສ ຜູ້ຊື່ງຫາກໍໄດ້ຮັບຕຳແຫນ່ງນາຍົກສະເປນເມື່ອອາທິດທີ່ແລ້ວ ລະບຸວ່າ ເຂົາຈະຊ່ວຍຜູ້ອົບພະຍົບເພື່ອຫລີກລ້ຽງຄວາມວຸ່ນວາຍທາງດ້ານມະນຸດສະທຳ ເປັນຫນ້າທີ່ຂອງເຮົາທີ່ຈະຊ່ວຍບໍ່ໃຫ້ເກີດຄວາມວຸ່ນວາຍທາງມະນຸດສະທຳ ແລະ ມອບທ່າຈອດເຮືອທີ່ປອດໄພແກ່ຄົນເຫລົ່ານີ້ ເພື່ອເຮັດຕາມພັນທະສັນຍາດ້ານສິດທິມະນຸດຂອງເຮົາ.
ແຫລ່ງຂ່າວຕ່າງປະເທດ: TRN