ຂປລ. ໃນສົກປີ 2014-2015 ທະນາຄານໂລກ ໄດ້ຄາດຄະເນສະພາບເສດຖະກິດໄລຍະສັ້ນຂອງ ສປປ ລາວວ່າ ການລົງ
ທຶນຂະໜາດໃຫຍ່ໃນຂະແໜງໄຟຟ້າເພື່ອການສົ່ງອອກ ຍັງຄົງຈະສືບຕໍ່ສະໜັບສະໜູນການເຕີບໂຕທາງດ້ານເສດ
ຖະກິດຂອງປະເທດ ແຕ່ການເຕີບໂຕຂອງລວມຍອດຜະລິດຕະພັນພາຍໃນ (GDP) ຈະອ່ອນຕົວລົງເນື່ອງຈາກການ
ຈັດຕັ້ງປະຕິບັດບັນດາໂຄງການໄຟຟ້ານ້ຳຕົກໃໝ່ໆ, ລວມທັງການເຕີບໂຕໃນລະດັບປານກາງ ຢູ່ບັນດາປະເທດ
ເພື່ອນບ້ານ, ພ້ອມນີ້ການສົ່ງອອກໄມ້ທ່ອນກໍຈະຫລຸດລົງໃນປີ 2015.
ທະນາຄານໂລກ ໄດ້ຈັດກອງປະຊຸມເຜີຍແຜ່ບົດສະເໜີກ່ຽວກັບສະພາບລວມຂອງເສດຖະກິດໂລກ ແລະ ພາກພື້ນ
ໃນວັນທີ 8 ເດືອນກັນຍາ ປີ 2014 ຢູ່ກະຊວງແຜນການ ແລະ ການລົງທຶນ, ໂດຍການບັນລະຍາຍຂອງທ່ານ ອູຣິກ ຊັກ
ຄາວ ຜູ້ອຳນວຍການທະນາຄານໂລກປະຈຳພາກພື້ນອາຊີຕາເວັນອອກສຽງໃຕ້ ແລະ ປາຊີຟິກ ແລະ ທ່ານ ແມັກທິວ
ເວີກິດ ຫົວໜ້າຂະແໜງການຄຸ້ມຄອງເສດຖະກິດມະຫາພາກ ແລະ ການເງິນພາກລັດ ທະນາຄານໂລກ, ໃຫ້ກຽດ
ເຂົ້າຮ່ວມຮັບຟັງໂດຍ ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດມະຫາ
ພາກ, ມີບັນດາທ່ານລັດຖະມົນຕີວ່າການ, ຊ່ວຍວ່າການ, ຫົວໜ້າກົມ, ຮອງກົມຈາກຂະແໜງເສດຖະກິດເຂົ້າຮ່ວມ.
ທ່ານ ອູຣິກ ຊັກຄາວ ໄດ້ກ່າວວ່າ: ສຳລັບໄລຍະກາງ ສປປ ລາວ ແມ່ນມີໂອກາດຄວາມສ່ຽງ ແລະ ສິ່ງທ້າທາຍຄືກັນກັບ
ປະເທດອື່ນໆໃນອາຊີຄື ມີການຍາດແຍ່ງເອົາກາລະໂອກາດຜ່ານການຄ້າໃນພາກພື້ນ ເຊິ່ງເປັນພາກພື້ນທີ່ມີການສົ່ງ
ອອກເຕີບໂຕຢ່າງວ່ອງໄວ. ດ້ວຍນະໂຍບາຍການລົງທຶນທີ່ສະໜັບສະໜູນຂະແໜງຊັບພະຍາກອນທຳມະຊາດທີ່ເປັນ
ຫລັກຂອງປະເທດລາວ ຈະຊຸກຍູ້ໃຫ້ການຄ້າມີມູນຄ່າສູງ ພ້ອມທັງສ້າງວຽກເຮັດງານທຳຢ່າງກວ້າງຂວາງໃນ ສປປ ລາວ.
ຄຽງຄູ່ກັນນັ້ນ ສປປ ລາວ ກໍຕ້ອງລົງທຶນໃສ່ຊັບພະຍາກອນມະນຸດ ໃຫ້ມີສີມືແຮງງານດີຂຶ້ນ ຜ່ານການປັບປຸງລະບົບ
ການສຶກສາ ແລະ ສາທາໃຫ້ດີຂຶ້ນກວ່າເກົ່າ. ແຕ່ການເຕີບໂຕທີ່ວ່ອງໄວ ກໍຈະຕິດຕາມມາດ້ວຍສິ່ງທ້າທາຍຄືກັບປະ
ເທດອື່ນໆໃນອາຊີ. ດັ່ງນັ້ນ ຈຳເປັນ ຕ້ອງມີມາດຕະການເພື່ອຄຸ້ມຄອງຄວາມສ່ຽງ ແລະ ຮຽນຮູ້ປະສົບການຈາກປະເທດ
ເພື່ອນບ້ານ.
ແຫຼ່ງຂ່າວ: ສຳນັກຂ່າວສານປະເທດລາວ