ເນື່ອງຈາກວ່າ ຮ່ອງຄວາມກົດດັນອາກາດຕໍ່າຍັງສືບຕໍ່ພາດຜ່ານເຂດພາກກາງ ແລະ ພາກໃຕ້ຂອງປະເທດລາວດ້ວຍກຳລັງແຮງປານກາງ ແລະ ປ່ອງເຂົ້າໃສ່ລົມພາຍຸ ດີເປຼ່ຊັນ, ຊຶ່ງໃນເວລາ 7 ໂມງ ເຊົ້າ ຂອງວັນທີ 04/06/2018 ມີຈຸດສູນກາງຢູ່ເສັ້ນຂະໜານທີ 15.7 ອົງສາເໜືອ ແລະ ເສັ້ນແວງທີ 110.7 ອົງສາຕາເວັນອອກ ກໍາລັງເຄື່ອນທີ່ໄປທິດເໜືອ, ພາຍຸຫົວນີ້ ຈະມີທ່າອ່ຽງເພີ່ມກໍາລັງແຮງຂື້ນໃນໄລຍະວັນທີ 05-07 ມີຖຸນາ 2018, ວົງລັດສະໝີພາຍຸຫົວດັ່ງກ່າວຈະກວມເອົາເຂດພາກກາງຫາພາກໃຕ້ຂອງປະເທດລາວ, ຊຶ່ງຈະເຮັດໃຫ້ ມີຝົນຕົກໃນລະດັບຄ່ອຍຫາປານກາງເປັນບໍລິເວນກ້ວາງໃນແຕ່ລະພາກ, ຕົກປານກາງຫາຕົກໜັກພ້ອມມີລົມພັດແຮງຢູ່ບາງທ້ອງຖິ່ນແຂວງພາກກາງຫາພາກໃຕ້. ດັ່ງນັ້ນ ຈຶ່ງຂໍແຈ້ງເຕືອນ ເຖິງພໍ່ແມ່ປະຊາຊົນບັນດາເຜົ່າ ແລະ ອຳນາດການປົກຄອງທຸກພາກສ່ວນທີ່ອາໃສໃນເຂດພາກກາງ ແລະ ພາກໃຕ້ ຈົ່ງມີສະຕິ ແລະ ກຽມພ້ອມຮັບມືກັບສະພາບຝົນຕົກໜັກ ແລະ ລົມພັດແຮງ ທີ່ອາດຈະເຮັດໃຫ້ມີຕົ້ນໄມ້ໃຫຍ່ຫັກລົ້ມ, ຫຼັງຄາເຮືອນເປ່ເພ ແລະ ນໍ້າຖ້ວມອັ່ງຢູ່ບາງທ້ອງຖິ່ນ.

ແຫລ່ງຂ່າວ: ກົມອຸຕຸນິຍົມ ແລະ ອຸທົກກະສາດ