ໃນວັນທີ 31 ພຶດສະພາທີ່ຜ່ານມາ, ລັດຖະສະພາຂອງຟີລິບປິນໄດ້ອະນຸມັດ ເຫັນດີຮ່າງກົດໝາຍວ່າດ້ວຍການຈັດສ້າງລະບົບບັດປະຈໍາຕົວແບບໃໝ່ ແຕ່ກໍຍັງມີສຽງວິພາກວິຈານວ່າກົນໄກໃໝ່ນີ້ມີແນວໂນ້ມທີ່ຈະເຮັດໃຫ້ເກີດການລະເມີດ ແລະ ການໃຊ້ຂໍ້ມູນໃນທາງບໍ່ຖືກບໍ່ຄວນໄດ້.
ບັດປະຈໍາຕົວແບບໃໝ່ນີ້ຈະລວມເອົາຂໍ້ມູນບັດຕ່າງໆລວມໃນໃບດຽວ ສາມາດໃຊ້ໃນການຕິດຕໍ່ ແລະ ເປັນຫຼັກຖານການດຳເນີນທຸລະກໍາຕ່າງໆ ໄດ້ທຸກໜ່ວຍງານຂອງລັດຖະບານ ແລະ ພາກເອກະຊົນ ເຊິ່ງເປັນລະບົບດຽວກັບບັດປະຈໍາຕົວປະຊາຊົນຂອງສິງກະໂປ. ລະບົບບັດປະຊາຊົນໃໝ່ນີ້ເອີ້ນວ່າ Philippines Identification System (PhilSys) ຫຼື ທີ່ເພິ່ນເອີ້ນວ່າ ຟິວຊີສ.
ຟິວຊີສປະກອບໄປດ້ວຍຊຸດຂໍ້ມູນທັງໝົດ 13 ຊຸດ ເຊິ່ງລວມເຖິງຂໍ້ມູນປະຈໍາຕົວທາງຊີວະພາບ (Bio Metrix), ເລກປະຈໍາຕົວຜູ້ເສຍພັນທະອາກອນ, ໜັງສືເດີນທາງ (Passport), ໝາຍເລກປະກັນສຸຂະພາບ, ໝາຍເລກໃບຂັບຂີ່ ແລະ ຂໍ້ມູນສ່ວນຕົວຂອງເຈົ້າຂອງບັດ ເຊັ່ນ ທີ່ຢູ່, ກຸ່ມເລືອດ ແລະ ສະຖານະພາບ. ບັດນີ້ຍັງຈະຖືກໃຊ້ເປັນຫຼັກຖານຢັ້ງຢືນສຳຄັນສຳລັບທຸລະກໍາຕ່າງໆດ້ານທະນາຄານ, ການສະໝັກງານ ແລະ ການບັນທຶກຄະດີອາດຊະຍາກຳຂອງຜູ້ກ່ຽວ.
ຄາດການວ່າທ່ານ ໂຣດຣິໂກ ດູແຕເຕ, ປະທານາທິບໍດີຟິລິບປິນ, ຈະລົງນາມເພື່ອໃຫ້ຮ່າງກົດໝາຍສະບັບນີ້ມີຜົນສັກສິດ ແລະ ສາມາດເປີດເຜີຍລາຍລະລຽດກ່ຽວກັບລະບົບຟິວຊີສຕໍ່ສາທາລະນະຊົນໄດ້ໃນຊ່ວງຕົ້ນເດືອນມິຖຸນານີ້. ຄາດການວ່າໂຄງການນີ້ຈະໃຊ້ເວລາປະມານ 5 ປີຈຶ່ງຈະສຳເລັດສົມບູນພາຍໃຕ້ງົບປະມານບໍ່ຕໍ່າກວ່າ 30 ຕື້ປີໂຊ (ປະມານ 4,763 ຕື້ກີບ).
ຢ່າງໃດກໍດີຝ່າຍທີ່ບໍ່ເຫັນດີໄດ້ອອກມາສະແດງຄວາມກັງວົນວ່າລະບົບນີ້ອາດຈະຖືກນໍາໄປໃຊ້ໃນການສອດແນມຂໍ້ມູນຂອງລັດຖະບານ ທັງຍັງມີຄວາມເປັນໄປໄດ້ທີ່ຈະຖືກແຮັກເອົາຂໍ້ມູນ ເຮັດໃຫ້ຂໍ້ມູນຮົ່ວໄຫຼໄປຍັງມືທີ່ສາມໄດ້.
ແຫຼ່ງຂ່າວ: Straitimes