ສຳນັກຂ່າວຕ່າງປະເທດລາຍງານຈາກເມືອງໂຕກຽວ, ປະເທດຍີ່ປຸ່ນ ເມື່ອວັນທີ 31 ພຶດສະພາ ວ່າອົງການມະນຸດທຳສັງຄົມນານາຊາດ (SHI) ຫນື່ງໃນອົງການບໍ່ສະແຫວງຫາຜົນກຳໄລລະຫວ່າງປະເທດຂະຫນາດໃຫຍ່ ຊື່ງມີສຳນັກງານໃຫຍ່ຢູ່ໃນສະຫະລັດ ແລະ ມີຫນ້າທີ່ຕໍ່ຕ້ານການກະທຳອັນຖືວ່າເປັນການທໍາຮ້າຍສັດ ອອກຖະແຫລງການໃນອາທິດນີ້ ວິຈານສະຖິຕິການລ່າປາວານຂອງຍີ່ປຸ່ນໃນມະຫາສະຫມຸດແອນຕາກຕິກເມື່ອຊ່ວງລະດູຮ້ອນທີ່ຜ່ານມາ ຊື່ງເຜີຍວ່າມີການລ່າວານທີ່ກຳລັງຖືພາລູກນ້ອຍເຖີງ 122 ໂຕ ນີ້ແມ່ນເປັນຂໍ້ມູນອັນສະເທືອນໃຈເປັນຢ່າງຍີ່ງ ແລະ ສະແດງເຖີງຄວາມໂຫດຮ້າຍປ່າເຖື່ອນຂອງອຸດສາຫະກຳລ່າວານຍີ່ປຸ່ນ.
ຖະແຫລງການຂອງ SHI ລະບຸຕື່ມອີກວ່າ ພາລະກິດດັ່ງກ່າວ ແມ່ນບໍ່ມີຄວາມຈຳເປັນຂອງການລ່າວານ ຕາມຂໍ້ອ້າງແມ່ນເພື່ອການວິໄຈທາງວິທະຍາສາດ ທັງທີຫລາຍຝ່າຍແມ່ນໄດ້ນຳສະເຫນີລາຍງານວິໄຈອອກມາຢ່າງຕໍ່ເນື່ອງແລ້ວວ່າການລ່ອງເຮືອສຳຫລວດພຶດຕິກຳຂອງປາວານ ມີຄວາມພຽງພໍແລ້ວຖ້າຫາກຕ້ອງການເຮັດການວິໄຈກ່ຽວກັບວານຢ່າງແທ້ຈິງ ການຂ້າປາວານຢ່າງໂຫດຮ້າຍແມ່ນບໍ່ມີຄວາມຈຳເປັນເລີຍ.
ທ່າທີດັ່ງກ່າວຂອງ SHI ມີຂື້ນຫລັງລັດຖະບານຍີ່ປຸ່ນສົ່ງລາຍງານຕໍ່ຄະນະກຳມະການ ການລ່າປາວານລະຫວ່າງປະເທດ (IWC) ເມື່ອເດືອນ ເມສາ ທີ່ຜ່ານມາ ວ່າໂຄງການລ່າປາວານເພື່ອນຳມາເຊື່ງການວິໄຈທາງວິທະຍາສາດໃນຊີກໂລກໃຕ້ ຫລື ໃນມະຫາສະຫມຸດແອນຕາກຕິກ ລະຫວ່າງເດືອນພຶດສະພາ ປີທີ່ແລ້ວເຖີງເດືອນມີນາ ປີນີ້ ມີການລ່າປາວານໄດ້ທັງຫມົດ 333ໂຕ ໃນຈຳນວນນີ້ເປັນເພດເມຍ 128 ໂຕ ແລະ ກຳລັງຖືພາຢູ່ 122 ໂຕ.
ທັງນີ້ ຄະນະຕຸລາການສານຍຸຕິທຳລະຫວ່າງປະເທດ (ICJ) ຫລື ສານໂລກ ມີຄຳເຫັນເມື່ອປີ 2014 ວ່າໃຫ້ຍີ່ປຸ່ນຍຸຕິການລ່າປາວານໃນມະຫາສະຫມຸດແອນຕາກຕິກ ເນື່ອງຈາກບໍ່ແມ່ນການລ່າວານດ້ວຍວັດຖຸປະສົງເພື່ອການວິໄຈທາງວິທະຍາສາດຢ່າງແທ້ຈິງ, ເຖີງແມ່ນວ່າຍີ່ປຸ່ນຍອມຮັບຄຳຕັດສິນດ້ວຍການຍົກເລີກລະດູການລ່າປາວານລະຫວ່າງປີ 2014-2015 ແຕ່ກຳຍັງມາດຳເນີນການຕໍ່ອີກຫລັງຈາກນັ້ນ.
ແຫລ່ງຂ່າວຕ່າງປະເທດ: TDN