ປະທານາທິບໍດີ ໂດນັນ ທຣັມ, ປະທານາທິບໍດີແຫ່ງສະຫະລັດອາເມລິກາ ໄດ້ຍົກເລີກການເຈລະຈາກັບ ທ່ານ ຄິມ ຈອງອຶນ ຜູ້ນໍາສູງສຸດຂອງເກົາຫຼີເໜືອ ທີ່ຈະຈັດຂຶ້ນທີ່ສິງກະໂປໃນວັນທີ 12 ມິຖຸນານີ້, ໂດຍອ້າງວ່າ ເກົາຫຼີເໜືອອກອາການສະແດງຄວາມບໍ່ພໍໃຈ ແລະ ສະແດງຄວາມເປັນສັດຕູຕໍ່ສະຫະລັດອາເມລິກາຢ່າງເປີດເຜີຍ ແຕ່ກໍຍັງລະບຸວ່າ ຖ້າຫາກ ຄິມ ຈອງອຶນ ປ່ຽນໃຈກ່ຽວກັບການເຈລະຈາຄັ້ງນີ້ໃຫ້ໂທຫາ ຫຼື ຂຽນຈົດໝາຍມາ. ແລະ ຍັງໄດ້ກ່າວວ່າ ການລົ້ມເລີກການເຈລະຈາຄັ້ງນີ້ ສ້າງຄວາມເສົ້າສະລົດໃຫ້ແກ່ປະຫວັດສາດຂອງໂລກອີກດ້ວຍ.
ທົ່ວໂລກຕ່າງເຝົ້າເບິ່ງຜົນຂອງການເຈລະຈາສັນຕິພາບລະຫວ່າງອາເມລິກາ ແລະ ເກົາຫຼີເໜືອ ເຊິ່ງຈະນໍາສັນຕິພາບ ແລະ ສະຖຽນລະພາບມາສູ່ຄາບສະໝຸດເກົາຫຼີ, ແຕ່ກໍຖືກຍົກເລີກ. ລາຍງານຈາກສຳນັກຕ່າງປະເທດໃນວັນທີ 24 ພຶດສະພາ ອ້າງເຖິງການເປີດເຜີຍຂອງທຳນຽບຂາວປະຈໍາສະຫະລັດອາເມລິກາວ່າ: ທ່ານ ໂດນັນ ທຣັມໄດ້ສົ່ງຈົດໝາຍເຖິງທ່ານ ຄິມ ຈອງອຶນ ເຊິ່ງມິລາຍລະອຽດວ່າບໍ່ເໝາະສົມທີ່ຈະຈັດປະຊຸມສຸດຍອດຕາມເດີມຄື ວັນທີ 12 ມິຖຸນາ 2018, ທີ່ ສິງກະໂປ.
ສາເຫດຂອງການຍົກເລີກ, ທ່ານ ທຣັມ ໄດ້ລະບຸວ່າມາຈາກຖະແຫຼງການຂອງລັດຖະບານເກົາຫຼີເໜືອ ທີ່ເຕັມໄປດ້ວຍຄວາມບໍ່ພໍໃຈ ແລະ ສະແດງຄວາມເປັນສັດຕູກັບອາເມລິກາຢ່າງເປີດເຜີຍ ເປັນເລື່ອງທີ່ເສຍໃຈຫຼາຍ ເພະາຄາດຫວັງຈະໄດ້ພົບປະກັນທີ່ສິງກະໂປ. ນອກຈາກນີ້ຖະແຫຼງການຂອງເກົາຫຼີເໜືຍັງໄດ້ກ່າວເຖິງສັກກະຍາພາບຂອງນິວເຄຼຍຂອງເກົາຫຼີເໜືອ ແຕ່ຢາກໃຫ້ຮູ້ວ່າ ນີິວເຄຼຍຂອງອາເມລິການັ້ນຍິ່ງໃຫຍ່ ແລະ ແຂງແຮງຈົນເພິ່ນພາວະນາວ່າຂໍຢ່າໃຫ້ມີມື້ທີ່ຕ້ອງໄດ້ຍິງອອກໄປ.
ໃນຈົດໝາຍ, ທ່ານ ທຣັມຍັງໄດ້ລະບຸວ່າ ມີຄວາມຮູ້ສຶກວ່າ ການເຈລະຈາມີຄວາມຈໍາເປັນທີ່ສຸດ ແລະ ຕ້ອງຂໍສະແດງຄວາມຂອບໃຈຕໍ່ ຄິມ ຈອງອຶນ ທີີ່ຕັດສິນໃຈປ່ອຍຕົວປະກັນຄົນອາເມລິກາ 3 ຄົນ ໃນວັນທີ 9 ພຶດສະພາ, ເຊິ່ງເພິ່ນເຫັນວ່າມັນເປັນການສະແດງຄວາມຈິງໃຈທີ່ດີຕໍ່ກັນ. ຖ້າຫາກທາງທ່ານ ຄິມ ຈອງອຶນ ປ່ຽນໃຈກ່ຽວກັບການເຈລະຈາຄັ້ງນີ້ ຂໍໃຫ້ຢ່າລັງເລທີ່ຈະໂທຫາຕົນ ຫຼື ຂຽນຈົດໝາຍມາ ເພາະໂລກ ແລະ ເກົາຫຼີເໜືອ ໄດ້ເສຍໂອກາດໃນການເຈລະຈາ ທີ່ຈະນໍາໄປສູ່ສັນຕິພາບ ແລະ ສະຖຽນລະພາບທີ່ໝັ້ນຄົງ.
ຄໍາປະກາດຍົກເລີກນີ້ມີຂຶ້ນຫຼັງຈາກທີ່ ທ່ານນາງ ຊອຍ ຊອນຮຸຍ, ລັດຖະມົນຕີຊ່ວຍວ່າການກະຊວງການຕ່າງປະເທດຂອງເກົາຫຼີເໜືອ ໄດ້ອອກຖະແຫຼງການສະແດງຄວາມບໍພໍໃຈຕໍ່ຄວາມເຫັນຂອງທ່ານ ໄມຄ໌ ເພັນສ໌, ຮອງປະທານາທິບໍດີສະຫະລັດອາເມລິກາ ທີ່ໄດ້ໃຫ້ສຳພາດກັບສະຖານີໂທລະພາບ ຟ໋ອກ ນິວສ໌ວ່າ ລັດຖະບານເກົາຫຼີເໜືອຢ່າຄິດວ່າຈະມາຊັກຈູງທ່ານ ທຣັມ ໃຫ້ຫຼິ້ນຕາມເກມຂອງຕົນເອງໄດ້, ອາເມລິກາຍອມໃຫ້ເກົາຫຼີເໜືອຫຼາຍເທື່ອ ແຕ່ເກົາຫຼີເໜືອກໍຜິດສັນຍາເລື່ອງໂຄງການນິວເຄຼຍຕະຫຼອດ, ຖ້າຫາກເກົາຫຼີເໜືອບໍ່ຍິນຍອມເຈລະຈາປະຖອນອາວຸດນິວເຄຼຍ, ອາເມລິກາຈະໃຊ້ ”ໂມເດວລີເບຍ” ກັບເກົາຫຼີເໜືອ. (ລີເບຍໂມເດວຄືການທີ່ຊາດຕາເວັນຕົກຍົກເລີກຂວໍ້າບາດປະເທດລີເບຍ ແລະ ອາເມລິກາໄດ້ຖອນຊື່ລີເບຍອອກຈາກບັນຊີດຳ ເມື່ອອາດີດຜູ້ນໍາລີເບຍ ທ່ານ ໂມອໍາມັດ ກັດດາຟີ ໃຫ້ສັນຍາວ່າຈະຍົກເລີກໂຄງການພັດທະນາອາວຸດນິວເຄຼຍໃນປີ 2003-2004. ໂມເດວນີ້ຄືການທີ່ອາເມລິກາຂໍໃຫ້ລີເບຍປົດອາວຸດ ກ່ອນທີ່ອາເມລິກາຈະສົ່ງ “ບາງຢ່າງ”ກັບໄປ)
ທາງດ້ານທ່ານນາງ ຊອຍ ຊອນຮຸຍກ່າວໂຕ້ຕອບວ່າ ບໍ່ຄິດວ່າຄົນລະດັບຮອງປະທານາທິບໍດີສະຫະລັດອາເມລິກາຈະເວົ້າຫຍັງໂງ່ໆ ແລະ ບໍ່ຮູ້ຈິງແບບນັ້ນ, ເກົາຫຼີເໜືອຈະບໍ່ອ້ອນວອນ ຫຼື ຂໍຮ້ອງອາເມລິກາໃຫ້ມາເຈລະຈາ ຫາກອີກຝ່າຍບໍ່ຕ້ອງການ. ຖ້າຫາກອາເມລິກາຍັງຂົ່ມຂູ່ແບບນີ້ ຈະລາຍງານຂໍ້ສະເໜີໄປຍັງທ່ານ ຄິມ ຈອງອຶນ ໃຫ້ຍົກເລີກການເຈລະຈາກັບ ທ່ານ ທຣັມ. ເລື່ອງນີ້ຂຶ້ນຢູ່ກັບການຕັດສິນ ແລະ ພຶດຕິກຳຂອງອາເມລິກາຝ່າຍດຽວວ່າ ຢາກພົບກັນໃນຫ້ອງປະຊຸມ ຫຼື ພົບກັນດ້ວຍນິວເຄຼຍ.
ແຫຼ່ງຂ່າວ: Thairath.co.th, ຮູບ: Radio Gaumá