ນັກວິເຄາະຊີ້ວ່າ ລາຄານໍ້າມັນດິບ 1ບາເລຣ ທຽບເທົ່າ 159ລິດ ທີ່ໃກ້ຈະທະລຸລາຄາ 80ໂດລາ ຫລື 657.000ກີບ ອາດເຮັດໃຫ້ເຂດອາຊີທີ່ມີຄວາມຕ້ອງການໃຊ້ນໍ້າມັນຫລາຍຕ້ອງຈ່າຍຄ່ານຳເຂົ້ານໍ້າມັນດິບໃນປີນີ້ຫລາຍກວ່າ 1 ລ້ານໂດລາສະຫະລັດ (ຫລືປະມານ 8.314.000.000 ກີບ) ຖືວ່າເທົ່າກັບສອງທົບຂອງຊ່ວງຕະຫລາດປີ 2015-2016.
ປັດຈຸບັນລາຄານໍ້າມັນດິບແມ່ນປັບຂື້ນແລ້ວ 1 ໃນ 5 ຈາກເດືອນມັງກອນ ສູງສຸດນັບຕັ້ງແຕ່ເດືອນ ພຶດສະພາ 2014 ປະກອບກັບຄ່າສະກຸນເງີນໂດລາທີ່ແຂງຕົວຂື້ນ ເຮັດໃຫ້ເສດຖະກິດຕ່າງໆອາດໄດ້ຮັບຜົນກະທົບ ໂດຍສະເພາະເຂດອາຊີທີ່ນຳເຂົ້ານໍ້າມັນ ລາຄານໍ້າມັນທີ່ເພີ່ມຂື້ນແມ່ນຈະເຮັດໃຫ້ອັດຕາເງີນເຟີ້ເພີ່ມຂື້ນ ສົ່ງຜົນເສຍຕໍ່ທັງຜູ້ບໍລິໂພກ ແລະ ພາກພື້ນທຸລະກິດ.
ນັກເສດຖະສາດເຜີຍວ່າ ຮອດເວລາແລ້ວທີ່ເຂດອາຊີຕ້ອງພິຈາລະນາເລື່ອງຫລຸດຜ່ອນການນຳໃຊ້ນໍ້າມັນ ແລະ ເພີ່ມສັກກາຍະພາບ ດ້ານພະລັງງານຂອງຕົນເອງຢ່າງຈິງຈັງເພື່ອບໍ່ໃຫ້ເສດຖະກິດໄດ້ຮັບການກະທົບຫນັກຈາກລາຄານໍ້າມັນທີ່ປັບຂື້ນຢ່າງກະທັນຫັນ.
ຕາມການກວດສອບຂໍ້ມູນອ້າງອີງແມ່ນທົ່ວໂລກໃຊນໍ້າມັນມື້ລະ 100 ລ້ານບາເລຣ ຫລື ເທົ່າກັບ 15900 ລ້ານລິດ. ປັດຈຸບັນຈີນເປັນຜູ້ນຳເຂົ້ານໍ້າມັນດິບຫລາຍທີ່ສຸດຂອງອາຊີ ສະເລ່ຍມື້ລະ 9,6 ລ້ານບາເລຣ ເຮັດໃຫ້ຈີນຕ້ອງຈ່າຍຄ່ານໍ້າມັນມື້ລະ 768ລ້ານໂດລາສະຫະລັດ ຫລື ປະມານ 6,385,152,000,000 ກີບ. ຂະນະທີ່ປະເທດລາຍໄດ້ຫນ້ອຍແຕ່ຕ້ອງເພີ່ງພານໍ້າມັນໃນກນນຳໃຊ້ພາຫະນະຄືອິນເດຍ ແລະ ຫວຽດນາມແມ່ນຍີ່ງເດືອດຮ້ອນຫນັກ ເພາະເສດຖະກິດບໍ່ສາມາດດູດຊັບລາຄານໍ້າມັນທີ່ປັບຂື້ນກະທັນຫັນໄດ້.
ແຫລ່ງຂ່າວຕ່າງປະເທດ: TNA