ຫຼ້າສຸດຜ່ານໄປ1ປີເຕັມ ສານໄດ້ຕັດສິນຄະດີອອກມາເປັນທີ່ຮຽບຮ້ອງແລ້ວ, ອີງຕາມການລາຍງານຂອງໜັງສືພິມລາວພັດທະນາໃຫ້ຮູ້ວ່າ: ຄະດີຮັກສາມເສົ້າທີ່ແຟນສາວຮ່ວມກັບແຟນເກົ່າ ຄາດຕະກຳແຟນໃໝ່ ຄະດີດັງກາງປີ2017 ເຫດການເກີດຂື້ນ ໃນວັນທີ່ 09 ເມສາ 2017 ຜ່ານການດຳເນີນຄະດີຂັ້ນ ສືບສວນ – ສອບສວນ ຂອງເຈົ້າໜ້າທີ່ ປກສ ເປັນເວລາປີກ່ວາກໍໄດ້ ສະຫຼຸບ ສຳນວນຄະດີສົ່ງໃຫ້ອົງການໄອຍະການປະຊາຊົນ ນະຄອນຫຼວງ ວຽງຈັນ ສັ່ງຟ້ອງສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຕັດສິນໃນອາທິດທີ່ຜ່ານ ໂດຍຈຳເລີຍທັງສອງຊື່: ນາງ ອ້ອມໃຈ ອາຍຸ 20 ປີ ແລະ ທ້າວ ເພັດສາຄອນ ອາຍຸ 24 ປີ.

ຜ່ານການຄົ້ນຄ້ວາບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີໃນສຳນວນຄະດີຢ່າງລະອຽດຖີ່ຖ້ວນ, ຮອບດ້ານ ແລະ ພາວະ ວິໄສ ແລ້ວເຫັນວ່າ: ຈຳເລີຍທັງສອງຄົນ ໄດ້ກະທຳຜິດຕໍ່ກົດໝາຍ ອາຍາທີ່ແຕະຕ້ອງຊີວິດກຽດສັກສີ ແລະ ຄວາມຍຸຕິທຳຂອງ ສາທາ ລະນະລັດ ປະຊາທິປະໄຕ ປະຊາຊົນລາວ ຕາມກົດໝາຍອາຍາຢ່າງ ແທ້ຈິງ: ສະນັ້ນ ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ເຫັນຄວນຕັດອິດສະລະພາບ ທ້າວ ເພັດສາຄອນ ໃຫ້ ຈຳຄຸກ 12 ປີ, ປັບໃໝ່ ເງິນ 4.500.000 ກີບ ແລະ ຕັດອິດສະລະພາບ ນາງ ອ້ອມໃຈ ໃຫ້ຈຳຄຸກ 11 ປີ, ປັບໃໝ່ເງິນ 3.500.000 ກີບ.

ແຫລ່ງຂ່າວ: ລາວອັບເດດ ແລະ ໜັງສືພິມລາວພັດທະນາ