ສຳນັກຂ່າວຕ່າງປະເທດ AFP ລາຍງານຈາກເມືອງຊານໂຮເຊ, ປະເທດສະຫະລັດອາເມລິກາ. ເມື່ອວັນທີ 2 ພຶດສະພາ ວ່າໃນງານປະຊຸມນັກພັດທະນາປະຈຳປີ F8 ຊື່ງຈັດຂື້ນທີ່ເມືອງຊານໂຮເຊ, ລັດແຄລີຟໍເນຍ. ປະທານເຈົ້າຫນ້າທີ່ບໍລິຫານ CEO ຂອງເຟສບຸກ, ມາກ ຊັກເກີເບີກ ເປີດເຜີຍລະບົບການໃຫມ່ຂອງເຟສບຸກທີ່ຈະເຮັດຫນ້າທີ່ເປັນໂປຣແກຣມນັດພົບ ທີ່ລາວຮັບປະກັນວ່າຈະຊ່ວຍສ້າງຄວາມສຳພັນໄລຍະຍາວ ແລະ ແທ້ຈິງ ບໍ່ແມ່ນພຽງແຕ່ຄວາມສຳພັນແບບຊົ່ວຄັ້ງຄາວ.
ຊັກເກີເບີກ ອ້າງເຖີງຕົວເລກທາງສະຖິຕິທີ່ຊີ້ໃຫ້ເຫັນວ່າ 1 ໃນ 3 ຂອງຄູ່ແຕ່ງງານໃນສະຫະລັດເລີ່ມຕົ້ນຄວາມສຳພັນຈາກສື່ສັງຄົມອອນລາຍ ແລະ ປະຈຸບັນຜູ້ໃຊ້ເຟສບຸກປະມານ 200 ລ້ານຄົນລະບຸສະຖານະພາບຂອງຕົນເອງແມ່ນໂສດ ດ້ວຍຄຸນສົມບັດໃຫມ່ ທີ່ຈະເພີ່ມເຂົ້າມານີ້ ຜູ້ໃຊ້ຈະສາມາດສ້າງໂປຣໄຟຣ໌ ຫລື ປະຫວັດສ່ວນຕົວສຳລັບການຫາຄູ່ນັດພົບ ທີ່ຖືກແຍກອອກມາຕ່າງຫາກ ແລະ ປິດກັ້ນບໍ່ໃຫ້ປາກົດໃນເຂື່ອຂ່າຍກຸ່ມຫມູ່ເພື່ອທົ່ວໄປ ຈະໃຫ້ຄວາມສຳຄັນອັນດັບຫນື່ງຕໍ່ກັບຄວາມປອດໄພຂອງຂໍ້ມູນ ແລະ ຄວາມເປັນສ່ວນຕົວ.
ການນັດບອດຫາຄູ່ຈະອ້າງອີງຂໍ້ມູນເຊັ່ນ: ປະຫວັດການອອກເດດ, ຄະແນນ ແລະ ຄວາມສຳພັນທີ່ເຊື່ອມໂຍງກັນ ເຖີງແມ່ນວ່າຈະຍັງບໍ່ໄດ້ເປີດເຜີຍວ່າຈະເປັນການບໍລິການທີ່ເປີດໃຫ້ໃຊ້ຟີຣ ດັ່ງການບໍລິການດ້ານອື່ນໆໃນເຟສບຸກ ແຕ່ການເປີດຕົວຄັ້ງນີ້ກໍເຮັດໃຫ້ຫຸ້ນຂອງເວັບໄຊສ໌ຫາຄູ່ຍັກໃຫຍ່ ແມສດອດຄອມ ຕົກລົງເຖີງຮ້ອຍລະ 17.
ຊັກເກີເບີກ ຍັງເປີດຕົວລະບົບ Clear History ທີ່ຈະເຮັດຫນ້າທີ່ໃຫ້ຂໍ້ມູນຜູ້ໃຊ້ກ່ຽວກັບ ແອັບພີເຄຊັນ ຫລື ເວັບໄຊສ໌ອື່ນໆທີ່ເຂົ້າເຖີງຂໍ້ມູນ ແລະ ໃຫ້ສິດທິແກ່ຜູ້ໃຊ້ໃນການລົບຂໍ້ມູນທີ່ບໍ່ຕ້ອງການໃຫ້ເກັບຮັກສາໄວ້ໃນຖານຂໍ້ມູນຂອງເຟສບຸກ. ນອກຈາກນີ້ໃນສ່ວນຂອງແອັບພີເຄຊັນ Messenger ຍັງກຽມເປີດໂຕ ຄຸນນະສົມບັດການແປຂໍ້ຄວາມແບບ Real time ໂດຍຈະເລີ່ມໃຫ້ການບໍລິການໃນສະຫະລັດໃນສ່ວນຂອງການແປພາສາອັງກິດ ແລະ ພາສາສະເປນ ໃນMarket Page ກ່ອນທີ່ຈະຂະຫຍາຍໃຫ້ຄວບຄຸມການໃຊ້ງານທົ່ວໄປຂອງ Messenger.
ແຫລ່ງຂ່າວຕ່າງປະເທດ: TDN
ຮູບພາບປະກອບຈາກ: AFP
ວີດີໂອປະກອບຈາກ: CNBC