ຕອນບ່າຍມື້ນີ້, ວັນທີ 4 ເມສາ 2018 ໄດ້ເກີດເຫດພາຍຸພັດຖະຫຼົ່ມ ເມືອງໄຊ ແຂວງອຸດົມໄຊ ໂດຍເຫດດັ່ງກ່າວໄດ້ມີໝາກເຫັບຂະໜາດໃຫຍ່ຕົກລົງມາຢ່າງຫຼວງຫຼາຍແລະສ້າງຄວາມເສຍຫາຍໃຫ້ແກ່ປ້າຍແລະສິ່ງປຸກສ້າງທີ່ບໍ່ແໜ້ນໜາ ພ້ອມກັບເຄື່ອງປູກຂອງປະຊາຊົນເສຍຫາຍຫຼາຍພໍສົມຄວນ.
ພາຍຸພັດດັ່ງກ່າວເກີດຂຶ້ນພາຍຫຼັງທີ່ ກົມອຸຕຸນິຍົມແລະອຸທົກກະສາດໄດ້ອອກແຈ້ງເຕືອນໃຫ້ລະວັງພາຍຸລະດູຮ້ອນ ບໍ່ພໍທໍ່ໃດຊົ່ວໂມງ ໂດຍແຈ້ງເຕືອນດັ່ງກ່າວລະບຸວ່າ ພາຍໃນວັນທີ 5-7 ນີ້ ຈະມີລົມພາຍຸເຂດຮ້ອນພັດເຂົ້າເຂດພາກເໜືອຫາພາກກາງຂອງລາວ ເຊິ່ງຈະເຮັດໃຫ້ມີລົມພັດ, ຟ້າຮ້ອງ, ຟ້າເຫຼື້ອມ, ຝົນຕົກ ແລະໝາກເຫັບຕົກແຮງ ແລະສາມາດສ້າງຄວາມເສຍຫາຍໃຫ້ແກ່ວັດຖຸແລະຊີວິດໄດ້.
