spot_img
Homeຂ່າວພາຍ​ໃນປະທານປະເທດ ລົງຊຸກຍູ້ການພັດທະນາເມືອງສັງທອງ

ປະທານປະເທດ ລົງຊຸກຍູ້ການພັດທະນາເມືອງສັງທອງ

Published on

ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແລະ ທ່ານ ສິນລະ​ວົງ ຄຸດ​ໄພທູນ ເຈົ້າ​ຄອງ​ນະຄອນ​ຫຼວງ​ວຽງ​ຈັນ ພ້ອມ​ດ້ວຍຄະນະ ​ໄດ້​ລົງ​ເຄື່ອນ​ໄຫວ​ຢ້ຽມຢາມພົບ​ປະ​ອຳນາດ​ການ​ປົກຄອງ ແລະ ປະຊາຊົນຢູ່​ເມືອງ​ສັງ​ທອງ ນະຄອນຫຼວງ​ວຽງ​ຈັນ ໃນ​ວັນ​ທີ 13 ຕຸລາ 2017 ທີ່​ເມືອງ​ສັງ​ທອງ ເພື່ອ​ຊຸກຍູ້​ການຈັດຕັ້ງ​ປະຕິບັດແຜນ​ພັດທະນາເສດຖະກິດ-ສັງຄົມ​ຂອງ​ເມືອງ​ ໃຫ້​ມີ​ການເຕີບ​ໃຫຍ່​ຂະຫຍາຍຕົວ ແລະ ສາມາດ​ຕອບ​ສະໜອງ​ໄດ້​ຕາມຄວາມ​ຮຽກຮ້ອງ​ຕ້ອງການ​ໃນ​ໄລຍະ​ໃໝ່​ຂອງ​ພັກ-ລັດຖະບານ​ວາງອອກ​ໃຫ້​ປະສົບ​ຜົນ​ເປັນ​ຈິງ.

ທ່ານ ຄຳ​ໝູນ ຕຽງ​ທະ​ລາດ ເຈົ້າເມືອງ​ສັງ​ສອງ ໄດ້​ລາຍ​ງານກ່ຽວ​ກັບ​ການຈັດຕັ້ງ​ປະຕິບັດແຜນ​ພັດທະນາ​ເສດຖະ ກິດ-ສັງຄົມຂອງ​ເມືອງ​ໂດຍ​ຫຍໍ້​ວ່າ: ເມືອງ​ສັງ​ທອງ ໄດ້​ຖື​ເອົາ​ວຽກ​ງານເສດຖະກິດ ​ໃນ​ການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ເປັນ​ບັນຫາ​ສຳຄັນ ແລະ ເປັນ​ບຸລິມະສິດອັນ​ດັບ​ໜຶ່ງ​ຂອງ​ເມືອງ ຈຶ່ງ​ໄດ້​ກຳນົດ​ເອົາ​ວຽກ​ງານ​ກະສິກຳ​ເປັນ​ທ່າແຮງ ໂດຍ​ຕິດ​ພັນ​ກັບ​ການ​ບໍ​ລິການທ່ອງທ່ຽວ ເພື່ອ​ຍູ້​ແຮງ​ການພັດທະນາ​ເສດຖະກິດ-ສັງຄົມ ຕາມ​ກົນ​ໄກເສດຖະ ກິດ​ຕະຫຼາດ ທີ່​ມີ​ການ​ນຳພາ​ຂອງ​ພັກ ແລະ ການ​ຄຸ້ມ​ຄອງ​ດັດສົມ​ຂອງ​ລັດ ຕັ້ງໜ້າ​ຂຸດ​ຄົ້ນ​ທ່າແຮງ​ບົ່ມ​ຊ້ອນ​ຂອງເມືອງ ເຮັດ​ໃຫ້​ເສດຖະກິດ​ຂອງເມືອງ​ຂະຫຍາຍຕົວ​ຕໍ່​ເນື່ອງ​ໃນ​ລະດັບ 12% ຕໍ່​ປີ ລວມ​ຍອດ​ຜະລິດຕະ​ພັນ​ພາຍ​ໃນ​ບັນລຸ​ໄດ້ 574,08 ຕື້​ກີບ ສະເລ່ຍ​ລາຍ​ຮັບ​ຕໍ່​ຫົວ​ຄົນ ປະຕິບັດ​ໄດ້ 16 ລ້ານ​ກວ່າ​ກີບຕໍ່ຄົນ​ຕໍ່​ປີ ສ່ວນ​ຄອບຄົວ​ທຸກ​ຍາກແກ້​ໄຂ​ໄດ້​ໂດຍ​ພື້ນຖານ.

ພ້ອມ​ນັ້ນ ໄດ້​ສະເໜີ​ຂໍ​ທິດ​ຊີ້ນຳ​ຕໍ່​ການ​ນຳ ເປັນຕົ້ນ​ແມ່ນ: ໃຫ້ການ​ນຳ​ພັກ-ລັດຂັ້ນ​ນະຄອນຫຼວງ ແລະ ສູນ​ກາງ ສືບຕໍ່​ໃກ້ຊິດຕິດ​ແທດ ແລະ ໃຫ້​ທິດ​ຊີ້​ນຳ​ແກ່ເມືອງ​ສັງ​ທອງ​ເປັນ​ປະຈຳ ແລະ ຕໍ່​ເນື່ອງ ຂໍ​ທຶນຮອນ​ໃນ​ການ​ກໍ່ສ້າງ​ພື້ນຖານ​ໂຄງ​ລ່າງ ການ​ພັດທະ​ນາ​ຊັບພະຍາກອນ​ມະນຸດ​ໃນແຕ່​ລະ​ປີ ເພື່ອ​ເຮັດ​ໃຫ້​ເມືອງ​ສັງທອງ​ມີ​ການ​ພັດທະນາ​ຢ່າງ​ຕໍ່ເນື່ອງ ​ທຽບ​ເທົ່າ​ກັບ​ບັນດາ​ເມືອງໃນ​ນະຄອນຫຼວງ ໃຫ້​ພະ​ແນກການ​ກ່ຽວຂ້ອງ​ນະຄອນຫຼວງ ແລະ ສູນ​ກາງ ສະໜັບ​ສະ​ໜູບ ແລະ ວາງ​ນະໂຍບາຍ​ໃຫ້​ສອດຄ່ອງ​ກັບ​ທິດ 3 ສ້າງ ເພື່ອ​ເປັນບ່ອນ​ອີງ​ໃຫ້​ເມືອງ​ໃນ​ການ​ປະຕິບັດ​ຕົວ​ຈິງ ກ່ຽວ​ກັບ​ການ​ສ້າງເມືອງ​ເຂັ້ມແຂງ​ຮອບດ້ານ ແລະ ສະເໜີ​ຂັ້ນ​ເທິງ​ສະໜັບສະໜູນ ແລະ ສ້າງ​ເງື່ອນໄຂ​ເພື່ອ​ອຳນວຍຄວາມ​ສະດວກ​ໃຫ້​ແກ່​ການ​ດຶງດູດ​ການ​ລົງທຶນ​ຈາກ​ພາຍ​ໃນ ແລະ ຕ່າງປະເທດ ໂດຍ​ທຶນ​ຊ່ວຍເຫຼືອ​ລ້າ ຫຼື ທຶນ​ເຂົາເຈົ້າ​ເອງ ເພື່ອຫຼຸດຜ່ອນ​ການ​ນຳ​ໃຊ້​ງົບປະມານຂອງ​ລັດ ແນໃສ່​ພັດທະນາ​ເມືອງສັງ​ທອງ ທີ່​ເປັນ​ເຂດ​ພື້ນຖານ​ການປະຕິວັດ ໃນ​ສະໄໝ​ຕໍ່ສູ້​ກູ້​ຊາດ​ມີ​ໃບ​ໜ້າ​ໃໝ່ ແລະ ຜົນງານ​ຍິ່ງ​ໃຫຍ່ກວ່າ​ເກົ່າ.

ຈາກ​ນັ້ນ ສະຫາຍ ບຸນ​ຍັງ ວໍລະ​ຈິດ ໄດ້​ໃຫ້​ກຽດ​ໂອ້​ລົມ ເຊິ່ງທ່ານ​ໄດ້​ຍ້ອງຍໍ​ຊົມເຊີຍ​ຕໍ່​ກັບ​ຜົນສຳເລັດ​ທີ່​ອົງການ​ປົກຄອງ​ເມືອງ ແລະ ອຳນາດ​ການ​ປົກຄອງ​ບ້ານພາຍ​ໃນ​ເມືອງ ສາມາດ​ຍາດ​ມາໄດ້​ດ້ວຍ​ຄວາມ​ຮັບຜິດຊອບ​ສູງ ສະແດງ​ອອກ​ໃນ​ການ​ພັດທະນາພື້ນຖານ​ໂຄງ​ລ່າງ ມີ​ເສັ້ນທາງ​ໄປມາ​ສະດວກ​ສະບາຍ ປະຊາຊົນຢູ່​ດີ​ກິນ​ດີ​ ມີ​ຄວາມ​ຜາ​ສຸກ ແຕ່​ເຖິງຢ່າງໃດ​ກໍ່​ດີ ເມືອງ​ຍັງ​ມີ​ຂໍ້ຄົງຄ້າງທີ່​ຈະ​ຕ້ອງ​ເອົາໃຈໃສ່​ແກ້​ໄຂ ເມື່ອທຽບໃສ່​ຄວາມ​ຮຽກຮ້ອງ​ຕ້ອງການ​ທາງ​ດ້ານ​ການເມືອງ​ໃນ​ໄລຍະ​ໃໝ່ ເປັນຕົ້ນແມ່ນ​ວຽກ​ງານ ​ປກຊ-​ປກສ ປາກົດການ​ຫຍໍ້ທໍ້ ຢາ​ເສບ​ຕິດ ໃຫ້​ຊອກ​ຫາ​ເຫດຜົນ ພ້ອມ​ທັງ​ຄຸ້ມ​ຄອງ ແລະ ແກ້​ໄຂ ເພື່ອ​ຮັບປະກັນ​ໃຫ້​ບ້ານ​ເມືອງ​ມີຄວາມ​ສະຫງົບ ວຽກ​ງານ​ນະ​ໂຍບາຍ​ການ​ເບິ່ງແຍງ​ຊີວິດ​ການເປັນ​ຢູ່​ຂອງ​ພະນັກງານ​ບຳນານ ຕ້ອງ​ປະຕິບັດ​ຕາມ​ລະບຽບ ເອົາໃຈ​ໃສ່​ເປັນ​ເຈົ້າ​ການ ແລະ ການປະຕິບັດ​ນະໂຍ ບາຍ​ອື່ນໆ ຕ້ອງ​ມີມາດຕະຖານ ມີ​ລະບຽບ​ປະຕິບັດໃຫ້​ໄດ້​ຕາມ​ກຳນົດ ນະໂຍບາຍຊົນເຜົ່າ ເປັນຕົ້ນແມ່ນ​ການ​ຮ່ຳຮຽນ ຕ້ອງ​ມີ​ຄວາມ​ສາມັກຄີ ການ​ສ້າງ​ພະນັກງານ ເພດ​ໄວ ເຜົ່າ​ຊົນ ບັນຫາ​ສະເພາະ ໃຫ້​ປະຕິ​ບັດ​ລະບຽບ​ກົດໝາຍ ກຳ​ໃຫ້ແໜ້ນ ແກ້​ໄຂ​ໃຫ້​ຖືກ ສຶກ​ສາ​ອົບຮົມ​ໃຫ້​ສະມາຊິກ​ພັກ ໃຫ້​ເອົາໃຈໃສ່​ຊີ້​ນຳພາ​ອົງ​ການຈັດຕັ້ງ​ມະຫາຊົນ ໂດຍ​ສະເພາະແມ່ນ​ຊາວໜຸ່ມ​ທົ່ວ​ໄປ ສຶກ​ສາ​ອົບຮົມ​ແຍກໃຫ້​ໄດ້​ບັນຫາ​ຕ່າງໆ ແກ້​ໄຂ​ປາກົດ​ການ​ຫຍໍ້ທໍ້​ໃນ​ເອື້ອຍ​ນ້ອງ​ແມ່ຍິງ ພ້ອມ​ນີ້ ​ປະທານ​ປະເທດຮຽກຮ້ອງ​ໃຫ້​ສະມາຊິກ​ພັກ​ ສືບຕໍ່ຮັກສາ​ມູນເຊື້ອ​ເມືອງ​ວິລະ​ຊົນ ໃຫ້​ສືບ​ທອດ​ໄປ​ຮຸ່ນ​ຕໍ່​ຮຸ່ນ ຄ່ຽງ​ຄູກັບ​ການ​ພັດທະນາ ໃຫ້​ສຸມ​ໃສ່​ຈັດຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມໃຫຍ່ ຄັ້ງ​ທີ X ຂອງ​ພັກ ມະຕິກອງ​ປະຊຸມ​ໃຫຍ່ ຄັ້ງ​ທີ VI ຂອງອົງຄະ​ນະ​ພັກ​ນະຄອນຫຼວງ​ວຽງຈັນ (ເປັນຕົ້ນ 6 ວິໄສ​ທັດ 6 ຍຸດທະ​ສາດ 18 ຄາດໝາຍ​ໃຫຍ່ 6 ໂຄງການ​ບຸກ​ທະລຸ 16 ໂຄງການໃຫຍ່​ລະດັບ​ຊາດ) ຢູ່​ນະຄອນຫຼວງ​ວຽງ​ຈັນ ແລະ ມະຕິ​ກອງປະຊຸມ​ໃຫຍ່ ຄັ້ງ​ທີ IV ຂອງ​ອົງຄະນະ​ພັກ​ເມືອງ​ສັງ​ທອງ ໃຫ້​ບັນລຸ​ຕາມ​ຄາດໝາຍ​ທີ່​ວາງ​ໄວ້.

ໂອກາດ​ນີ້ ປະທານ​ປະເທດ ພ້ອມ​ດ້ວຍ​ຄະນະ ໄດ້​ໄປ​ຢ້ຽມ​ຊົມສວນ​ຢາງພາລາ​ຂອງ​ທ່ານ ດາວພອນ ພິລາ​ວົງ ຢູ່​ບ້ານ​ສະ​ນ໋ອດ ຈາກ​ນັ້ນ ກໍ່​ໄດ້​ໄປ​ຢ້ຽມຢາມ​ຟາມທະວີ​ໂຊກຂອງ​ທ່ານ ບຸນ​ທະໜອມ ວັນ​ນຸ​ວົງ ຢູ່​ບ້ານ​ໜອງ​ບົວ ເມືອງ​ສັງ​ທອງ ເພື່ອ​ຊຸກຍູ້​ສົ່ງເສີມ ແລະ ໃຫ້​ທິດ​ຊີ້​ນຳ​ໃນ​ການ​ພັດ​ທະນາ​ວຽກ​ງານ​ດັ່ງກ່າວ ​ໃຫ້​ໄດ້ໝາກຜົນ​ທີ່​ດີ​ຂຶ້ນ​ເລື້ອຍໆ.

 

ແຫລ່ງຂ່າວ: ໜັງສືພິມ ວຽງຈັນໃໝ່

ບົດຄວາມຫຼ້າສຸດ

ລາວເປັນປະເທດທີ່ມີຄວາມສະຫງົບ ໂດຍຖືກຈັດຢູ່ອັນດັບທີ 10 ປະເທດທີ່ສະຫງົບສຸກ ແລະ ສັນຕິພາບທີ່ສຸດໃນອາຊີ ປະຈຳປີ 2025

ລາວຖືກຈັດຢູ່ ອັນດັບທີ່ 10 ປະເທດທີ່ສັນຕິພາບທີ່ສຸດໃນອາຊີ ຕາມລາຍງານ ດັດຊະນີສັນຕິພາບໂລກ (GPI) 2025 ສະບັບລ້າສຸດ ທີ່ອອກໂດຍ ສະຖາບັນເສດຖະກິດແລະສັນຕິພາບ (IEP). (GPI) 2025 ສະບັບລ້າສຸດ...

ສາຍກິນດິບໃຫ້ລະວັງ! ພະຍາດໃບໄມ້ໃນປອດທີ່ເກີດຈາກການກິນດິບ ໂດຍສະເພາະເມນູກຸ້ງເຕັ້ນ ແລະ ປູດິບຈາກແຫຼ່ງນໍ້າຈືດ

ພະຍາດໃບໄມ້ໃນປອດ ເກີດຈາກການກິນອາຫານດິບ ແລະ ສຸຂະອະນາໄມໃນການປຸງແຕ່ງອາຫານ ສາຍກິນດິບຄວນລະວັງ, ເມື່ອບໍ່ດົນມານີ້,ມີກໍລະນີເດັກນ້ອຍອາຍຸ 14 ປີ ຈາກ ສ.ເກົາຫຼີ ທີ່ມັກກິນກຸ້ງສົດ ແລະ ປູສົດນໍ້າຈືດ ມີອາການຫາຍໃຈລໍາບາກ, ໄອມີເສມຫະ...

ເກີດຂຶ້ນ 1 ໃນ 8 ລ້ານ ຕ້ອງໄດ້ທຳການຜ່າອອກດ່ວນ ຍິງຊາວອິນເດຍພົບໂຕອ່ອນມາຢູ່ໃນຕັບ

ຍິງຊາວອິນເດຍມີອາການເຈັບທ້ອງ ຜົນສະແກນ MRI ພົບວ່າມີໂຕອ່ອນມາຢູ່ໃນຕັບ ເຊິ່ງເກີດຂຶ້ນໄດ້ຍາກມີພຽງ 45 ກໍລະນີ ໃນທົ່ວໂລກ ຈາກກໍລະນີຍິງຊາວອິນເດຍ ອາຍຸ 35 ປີ, ທີ່ກຳລັງຖືພາ 12 ອາທິດ...

ຍອດຜູ້ເສຍຊີວິດທະລຸ 1,400 ຄົນ ຈາກເຫດແຜ່ນດິນໄຫວໃນອັບການິສຖານ

ອັບເດດຍອດຜູ້ເສຍຊີວິດຈາກເຫດການແຜ່ນດິນໄຫວໃນອັບການິສຖານ ຄວາມຮຸນແຮງ 6.0 ຣິກເຕີ ຫຼ້າສຸດມີລາຍງານການເສຍຊີວິດເພີ່ມຂຶ້ນເປັນ 1,400 ຄົນ ແລະ ບາດເຈັບອີກຫຼາຍພັນຄົນ. ອີງຕາມສຳນັກຂ່າວຮອຍເຕີລາຍງານໃນວັນທີ 2 ກັນຍາ 2025, ກ່ຽວກັບເຫດການແຜ່ນດິນໄຫວໃນອັບການິສຖານ ເຮັດໃຫ້ມີຍອດຜູ້ເສຍຊີວິດເພີ່ມຂຶ້ນເປັນ...