ເລື່ອງຂອງຄວາມຮັກ ແລະ ຊີວິດຄູ່ມັນບໍ່ມີສິ່ງໃດທີ່ແນ່ນອນບາງຄູ່ອາດຄິດວ່າຈະຢູ່ກັນຍືນຍາວແຕ່ສຸດທ້າຍກໍ່ໄປກັນບໍ່ລອດເຖິງວ່າຈະເຖົ້າແກ່ມີລູກມີຫຼານແລ້ວກໍ່ຕາມ ແຕ່ບາງຄູ່ເບິ່ງຄືວ່າຈະໄປກັນບໍ່ລອດແຕ່ກໍ່ຢູ່ນຳກັນຈົນຮອດແກ່ເຖົ້າຕາຍຈາກກັນໄປກໍ່ມີ  ໃນຄໍລຳ ຊີວິດ ກັບ ຄວາມຮັກ ມື້ນີ້ແອັດມິນຈະມາເວົ້າກ່ຽວກັບ 5 ເລື່ອງສຳຄັນໃຫ້ຄິດກ່ອນຕັດສິນໃຈແຍກທາງກັນ ສຳລັບຄູ່ໃດທີ່ມີບັນຫາກັນຂັ້ນຮຸນແຮງຈົນເຖິງຂັ້ນຄິດຢາກແຍກທາງກັນລອງອ່ານບົດຄວາມນີ້ເບິ່ງກ່ອນ ບາງເທື່ອມັນອາດຈະໄດ້ສະຕິຫຼາຍຂຶ້ນ ສຳລັບເລືອງສຳຄັນທີ່ວ່ານີ້ຈະມີຫຍັງແນ່ເຮົາມາຮູ້ຈັກໄປພ້ອມກັນເລີຍ

1. ລູກ ແລະ ຜົນກະທົບທີ່ຈະຕາມມາ ແນ່ນອນວ່າຄົນທີ່ແຕ່ງງານກັນແລ້ວມີລູກແມ່ນຕ້ອງຄິດທົບທວນໃຫ້ຫຼາຍໆກ່ຽວກັບເລື່ອງການຢ່າຮ້າງ ເພາະນອກຈາກທ່ານຈະໄດ້ຮັບຜົນກະທົບແລ້ວ ລູກຂອງທ່ານກໍ່ຈະກາຍເປັນເດັກທີ່ມີປົມດ້ອຍ ຮູ້ສຶກວ່າຂາດຄວາມອົບອຸ່ນ
2. ຄິດເຖິງການລ້ຽງດູລູກ ຫາກລູກຍັງນ້ອຍທ່ານຕ້ອງຄິດໃຫ້ຫຼາຍໆ ເພາະການລ້ຽງລູກຄົນໜຶ່ງກວ່າຈະໃຫຍ່ມັນບໍ່ແມ່ນເລື່ອງງ່າຍ ການລ້ຽງລູກຄົນດຽວມັນລຳບາກກວ່າທີ່ຄິດ
3. ບົດບາດທາງດ້ານສັງຄົມ ຄອບຄົວທີ່ອົບອຸ່ນ ມີຄວາມສຸກມັນສະແດງໃຫ້ເຫັນຄວາມສົມບູນແບບຂອງຊີວິດຄູ່ ມີພໍ່ແມ່ລູກ ການຢ່າຮ້າງແນ່ນອນວ່າຄົງຈະຫຼີກລ່ຽງການຖືກກ່າວຂວັນນິນທາງຈາກຄົນຮອບຂ້າງບໍ່ໄດ້ ສະນັ້ນ ທ່ານໃດທີ່ຄິດຈະຢ່າຮ້າງຕ້ອງທຳໃຈຮັບເລື່ອງນີ້ໃຫ້ໄດ້ກ່ອນ
4. ຄິດຮອດຊີວິດຕອນເປັນໂສດຄິດຮອດຊ່ວງເວລາທີ່ເຫງົາໃຈບໍ່ມີໃຜຄຽງຂ້າງ ທັງເຫງົາກາຍ, ເຫງົາໃຈ, ທັງອິດສາຄົນອື່ນທີ່ເຂົາມີຄູ່ ນັ້ນມັນເປັນຊ່ວງເວລາໜຶ່ງທີ່ທໍລະມານ ເພາະຕ້ອງການມີຄູ່ຄິດຄູ່ສ້າງຄືກັບຄົນອື່ນ ຄວາມຮູ້ສຶກນີ້ຄົງບໍ່ຕ້ອງໃຫ້ອະທິບາຍຫຍັງຫຼາຍເພາະເຊື່ອວ່າຫຼາຍທ່ານຄົງມີປະສົບການແບບນີ້ມາແລ້ວ
5. ຄິດຮອດຕອນຮັກກັນ, ຄິດນອດຄວາມດີທີ່ເຄີຍມີໃຫ້ກັນເຂົ້າ, ຄິດຮອດເວລາທີ່ເຄີຍຜ່ານສຸກຜ່ານທຸກນຳກັນມາ ຄິດທົບທວນຊ່ວງເວລາທີ່ພວກທ່ານມີຄວາມສຸກນຳກັນຫຼາຍໆ ເພື່ອຈະເຮັດໃຫ້ທ່ານມີສະຕິ ແລະ ເຫັນທາງອອກທີ່ດີກວ່າການຢ່າຮ້າງກັນ

ເລື່ອງລາວຂອງຄວາມຮັກແນ່ນອນວ່າມັນບໍ່ໄດ້ຫອມຫວານສະເໝີໄປ ເສັ້ນທາງທີ່ກ້າວຜ່ານແຕ່ລະຊ່ວງຂອງຊີວິດຄູ່ມັນຍ່ອມມີອຸປະສັກຜ່ານເຂົ້າມາເພື່ອໃຫ້ທ່ານຝ່າຝັນ ແລະ ກ້າວຜ່ານມັນໄປໃຫ້ໄດ້ ຄູ່ທີ່ມີຫົວໃຈເຂັ້ມແຂງ, ມີສະຕິ ແລະ ມີຄວາມຮັກທີ່ຈິງໃຈໝັ້ນຄົງເທົ່ານັ້ນ ຈິ່ງຈະສາມາດເອົາຊະນະບົດທົດສອບທັງໝົດ ແລະ ຄອງຄູ່ກັນໄປຈົນແກ່ເຖົ້າໄດ້ ແລະ ເຮົາຫວັງວ່າຄູ່ຂອງທ່ານຈະສາມາດຜ່ານມັນໄປໄດ້ຄືກັນ.