ວັນທີ 17 ກໍລະກົດທີ່ຜ່ານມານີ້ ສຳນັກຂ່າວຕ່າງປະເທດ ໄດ້ເຜີຍແຜ່ພາບທາງຍົກລະດັບວົງແຫວນຮອບ 2 ຢູ່ເມືອງເສິງຕູ ແຂວງເສສວນ ທາງພາກຕາເວັນຕົກສຽງໃຕ້ຂອງປະເທດຈີນ ໄດ້ຖືກປ່ຽນທິວທັດໃຫ້ກາຍເປັນລະບຽງທາງສີຂຽວຢ່າງສວຍງາມ ໂດຍຖະໜົນສາຍນີ້ ສ້າງສຳເລັດເມື່ອປີ 2013 ຜ່ານມາ ດ້ວຍຄວາມຍາວ 28 ກິໂລແມັດ ເປັນຖະໜົນທີ່ມີລົດໂດຍສານດ່ວນພິເສດ ຊຶ່ງແຕ່ລະມື້ມີຄົນມາໃຊ້ບໍລິການກວ່າ 3 ແສນຄົນ.

ການປະດັບປະດາຖະໜົນສາຍດັ່ງກ່າວ ໄດ້ມີການປູກຕົ້ນໄມ້ແບບທີ່ເປັນເຄືອເລືອຈັບໄປຕາມຝາຜະນັງດ້ານລຸ່ມຂອງທາງ ເຮັດໃຫ້ເມື່ອເວລາຜ່ານໄປຫລາຍປີ ເຄືອໄມ້ດັ່ງກ່າວໄດ້ຈະເລີນເຕີບໂຕຂຶ້ນເລື້ອຍໆ ຈົນປົກຄຸມເສົາຂອງທາງຍົກລະດັບ ເຮັດໃຫ້ບໍລິເວນດັ່ງກ່າວນີ້ ມີທັດສະນິຍະພາບສີຂຽວທີ່ສວຍສົດງົດງາມ.