ສຳນັກຂ່າວຕ່າງປະເທດ ລາຍງານໃນວັນທີ 18 ກໍລະກົດນີ້ວ່າ ພາຍຸເຂດຮ້ອນທາລາສ ຊຶ່ງພັດເຂົ້າຊາຍຝັ່ງພາກກາງຂອງຫວຽດນາມ ເມື່ອຕອນເຊົ້າຂອງວັນຈັນທີ 17 ກໍລະກົດຜ່ານມານີ້ ໄດ້ສ້າງຄວາມເສຍຫາຍມະຫາສານຢູ່ຫລາຍແຂວງ ເປັນຕົ້ນແມ່ນແຂວງຮາຕິ່ງ, ແທັງຮວ່າ, ເຫງະອານ, ກວາງບິ່ງ ແລະ ແຂວງເທືອທຽນເຫວ້ ໂດຍປັດຈຸບັນມີລາຍງານວ່າ ພົບຜູ້ເສຍຊີວິດແລ້ວ 1 ຄົນ, ບາດເຈັບອີກຫລາຍຄົນ, ຍັງມີຜູ້ສູນຫາຍອີກຢ່າງໜ້ອຍ 13 ຄົນ, ເຮືອຂະໜາດໃຫຍ່ນ້ອຍຫລາຍສິບລຳ ຖືກລົມພາຍຸພັດຈົມ ຫລື ພັດຂຶ້ນມາຄ້າງນ້ຳຕື້ນ, ເຮືອນຊານປະຊາຊົນ ເສຍຫາຍຫລາຍກວ່າ 5,000​ ຫລັງຄາ ແລະ ພືດສວນເສຍຫາຍອີກຫລາຍຮ້ອຍເຮັກຕາ.

ແຮງພາຍຸເຂດຮ້ອນດັ່ງກ່າວນີ້ ຍັງສົ່ງຜົນກະຈາຍໄປຍັງບັນດາແຂວງທາງພາກເໜືອອີກເຊັ່ນ ແຂວງກວາງນິງ, ນະຄອນຮາຍຟອງ, ແຂວງຖ້າຍບິ່ງ, ນາມດິ່ງ ແລະ ແຂວງນິ່ງບິ່ງ ຊຶ່ງມີຝົນຕົກຟ້າຄະນອງຢ່າງໜັກໃນຫລາຍພື້ນທີ່.