ຂປລ. ທ່ານ ພົນຕີ ສິນລະວົງ ໄຊຍະກອນ ຮອງລັດຖະມົນຕີ ກະຊວງປ້ອງກັນຄວາມສະຫງົບໄດ້ລາຍງານຕໍ່ກອງປະ ຊຸມ ສະຫລຸບວຽກງານປ້ອງກັນຄວາມສະຫງົບ ປະຈໍາປີ 2016 ແລະ ທິດທາງປີ 2017 ເຊິ່ງໄດ້ຈັດຂຶ້ນແຕ່ວັນທີ 26-27 ມັງກອນ 2017 ນີ້ ທິ່ກະຊວງປ້ອງກັນຄວາມສະຫງົບວ່າ:ຕະຫລອດໄລຍະ 1 ປີຜ່ານມາ ກະຊວງປ້ອງກັນຄວາມສະຫງົບ ສາມາດດໍາເນີນຄະດີຢ່າເສບຕິດໄດ້ 2.508 ລາຍ ໃນນັ້ນໄດ້ກັກຕົວຜູ້ຖືກຫາ 3.700 ຄົນ,ຍິງ 558 ຄົນ, ທຽບໃສ່ປີ 2015 ຄະດີເພີ່ມຂຶ້ນ 250 ຄະດີ, ຢຶດຂອງກາງຢ່າເສບຕິດປະເພດຕ່າງໆ: ຢາບ້າ 1.862,87 ກິໂລກະ ລາມ, ເຮໂລອິນ 188,39 ກິໂລກະລາມ, ຢາໄອສ໌ 144,66 ກິໂລກະລາມ, ກັນຊາແຫ້ງ 425,46 ກິໂລກະ ລາມ, ແປ້ງຝຸ່ນເພື່ອປະສົມຢາເສບຕິດ 6.831,16 ກິໂລກະລາມ, ແກ່ນຝິ່ນ 25ກິໂລ, ເຄື່ອງອັດຢາບ້າ 7 ເຄື່ອງ, ເຄື່ອງອົບຢາບ້າ 1 ເຄື່ອງ, ເຄື່ອງຂົ້ວຢາບ້າ 3 ເຄື່ອງ, ເຄື່ອງບົດຢາບ້າ 1 ເຄື່ອງ, ຫົວເຊື່ອມນ້ຳຫອມ 560 ກັບ, ລົດໂຫຍ່97 ຄັນ, ລົດຈັກ 136 ຄັນ ແລະ ອື່ນໆ.

ທ່ານ ພົນຕີ ສິນລະວົງ ໄຊຍະກອນ ຍັງໃຫ້ຮູ້ຕື່ມອີກວ່າ: ໄດ້ເອົາໃຈໃສ່ປັບປຸງ ຕາໜ່າງສືບຂ່າວໃຫ້ມີຄຸນນະພາບ ສາມາດກໍາແໜ້ນເປົ້າໝາຍ ແລະ ການແກ້ໄຂ ຕ້ອງຮັບປະກັນຕາມຫລັກການວິຊາສະເພາະ ພ້ອມນີ້ ໄດ້ເພີ່ມທະວີກໍ່ສ້າງຍົກລະດັບ ພະນັກງານສືບສວນ-ສອບສວນໃຫ້ມີຄວາມຮູ້ຄວາມສາມາດຊໍານິຊໍານານ ທາງດ້ານວິຊາສະເພາະດໍາເນີນຄະດີໃຫ້ຖືກຕ້ອງ ຕາມລະບຽບກົດໝາຍທັງຮັບປະກັນ ຄວາມຍຸຕິທໍາໃນສັງຄົມ ແລະ ເອົາໃຈໃສ່ຂອດຄຸ້ມ ຄອງວັດຖຸຂອງກາງ ໃຫ້ເຂັ້ມງວດກວ່າເກົ່າ, ເອົາໃຈໃສ່ປ້ອງກັນເວນຍາມຄ້າຍຄຸມຂັງ, ຄ້າຍດັດສ້າງ, ຄ້າຍກັກຂັງຊົ່ວຄາວ ໃຫ້ຮັບປະກັນຄວາມສະຫງົບປອດໄພ ໂດຍພື້ນຖານ, ທັງສືກສາອົບຮົມນັກໂທດ, ຜູ້ຖືກດັດສ້າງ ແລະ ຜູ້ຖືກຫາໃຫ້ເຂົ້າໃຈຕໍ່ແນວທາງ ນະໂຍບາຍຂອງພັກ, ລະບຽບກົດໝາຍຂອງລັດ ໃນເມື່ອພົ້ນໂທດອອກໄປສູ່ສັງຄົມ, ບໍ່ກ້າກະທໍາຜິດອີກ ພ້ອມດຽວກັນນັ້ນ ກໍຍັງໄດ້ເອົາໃຈໃສ່ຄຸ້ມຄອງ ພາຍໃນກໍາລັງຢ່າງເຂັ້ມງວດ ແລະ ເດັດຂາດຮັບປະກັນບໍ່ໃຫ້ເກີດ ປະກົດການຫຍໍ້ທໍ້ຢູ່ພາຍໃນ ຫລື ເຄື່ອນໄຫວຜິດຕໍ່ລະບຽບກົດໝາຍອື່ນໆ.