ຊຳຊຸງ ສະຫລຸບຜົນການກວດສອບສາເຫດກາແລັກຊີ່ໂນ໊ດ 7 ລະເບີດວ່າເປັນເພາະໂຕແບັດເຕີລີ ບໍ່ແມ່ນການອອກແບບ ຫລື ຊອ໋ບແວຂອງສະມາດໂຟນ

ຊຳຊຸງ ອີເລັກໂທຣນິກ ຜູ້ຜະລິດສະມາດໂຟນລາຍໃຫຍ່ທີ່ສຸດຂອງໂລກອອກຖະແຫລງການລະບຸວ່າ: ຈາກຜົນການກວດສອບພາຍໃນຂອງທັງບໍລິສັດ ແລະ ຈາກອົງກອນອິດສະຫລະ 3 ແຫ່ງ ໃນພາກອຸດສາຫະກຳບົ່ງຊີ້ວ່າ: ແບັດເຕີລີ ເປັນຕົ້ນເຫດຂອງບັນຫາໃນສະມາດໂຟນກາແລັກຊີໂນ໊ດ 7 ລະເບີດ ແລະ ຂໍຮັບຜິດຊອບຕໍ່ຄວາມຫລົ້ມເຫລວໃນການລະບຸ  ແລະ ກວດສອບບັນຫາທີ່ອາດເກີດຂື້ນຈາກການອອກແບບຂອງແບັດເຕີລີ ແລະ ຂະບວນການຜະລິດແບັດເຕີລີ ກ່ອນການວາງຈຳຫນ່າຍໂນ໊ດ7

ໂກ ດອງ-ຈິນ ປະທານທຸລະກິດໂທລະຄົມມະນາຄົມຂອງຊໍາຊຸງກ່າວຂໍອາໄພຍ່າງຈິງໃຈສຳລັບຄວາມວິຕົກກັງວົນ ແລະ ຄວາມບໍ່ສະດວກສະບາຍທີ່ເກີດຂື້ນກັບລູກຄ້າ

ການກວດສອບດຳເນີນການໂດຍທີມນັກວິໄຈ ແລະ ວິສະວະກອນຂອງຊຳຊຸງຫລາຍກວ່າ 700ຄົນ ຈຳລອງສະຖານະການຂື້ນເພື່ອທົດລອງອຸປະກອນລຸ້ນນີ້ໃນສະພາບທີ່ປະກອບສຳເລັດແລ້ວກວ່າ 200,000ເຄື່ອງ ແລະ ແບັດເຕີລີອີກ ຫລາຍກວ່າ 30,000 ກ້ອນ ນອກຈາກນີ້ຊຳຊຸງຍັງຂໍໃຫ້ອົງກອນອິດສະຫລະທັງ 3 ແຫ່ງດຳເນີນການວິເຄາະຫາສາເຫດຍ່າງເປັນກາງ ແລະ ກົງໄປກົງມາ ແລະ ໄດ້ຂໍ້ສະຫລຸບຮ່ວມກັນວ່າ: ສາເຫດມາຈາກການອອກແບບແບັດເຕີລີ ແລະ ການຜະລິດແບັດເຕີລີ

ນອກຈາກນີ້ ຊຳຊຸງເຜີຍມາດຕະການປ້ອງກັນເພື່ອບໍ່ໃຫ້ເກີດບັນຫາຊ້ຳອີກ ໂດຍຈະມີມາດຕະຫານຫວດສອບຄວາມປອດໄພຫລາຍຊັ້ນຫລາຍຕອນ ການວາງແຜນການຜະລິດ ແລະ ການໃຊ້ຂະບວນການກວດສອບຄວາມປອດໄພ ຂອງແບັດເຕີລີທັງ 8 ຈຸດ

ຊຳຊຸງຕ້ອງເອິ້ນຄືນກາແລັກຊີໂນ໊ດ7 ເຖິງ 2.5ລ້ານເຄື່ອງເມື່ອເດືອນກັນຍາປີທີ່ຜ່ານມາ ຫລັງມີເຫດແບັດເຕີລີຮ້ອນຈັດແລ້ວລຸກໄຫມ້ ຫລື ລະເບີດ ເຊິ່ງເບື້ອງຕົ້ນເຊື່ອວ່າສາເຫດເກີດຈາກແບັດເຕີລີ ແຕ່ເມື່ອປ່ຽນແບັດເຕີລີ ຈາກລູກຄ້າອີກຄົນ ກໍ່ຍັງເກີດບັນຫາອີກ ເລີຍຕ້ອງເຮັດໃຫ້ຕ້ອງຍຸດຕິຜະລິດກາແລັກຊີໂນ໊ດ7ເປັນການຖາວອນໃນເດືອນຕຸລາຂອງປີທີ່ຜ່ານມາ ການເອິ້ນຄືນໂນ໊ດ7 ສ້າງຄວາມເສຍຫາຍເກືອບ 5,300ລ້ານໂດລາສະຫະລັດ ແລະ ທຳລາຍພາບລັກຂອງບໍລິສັດຍ່າງຫລາຍ ແລະ ຊຳຊຸງຈະເຜີຍຜົນປະກອບການໄຕມາດ 4 ແລະ ຕະຫລອດທັງປີໃນມື້ວັນອັງຄານທີ່ຈະມາຮອດນີ້ (ມື້ອື່ນ) ຂະນະທີ່ຫຸ້ນຂອງບໍລິສັດປັບໂຕຂື້ນເລັກຫນ້ອຍໃນຕອນເຊົ້າຂອງມື້ນີ້ຫລັງການຖະແຫລງຂ່າວ

ຂ່າວຈາກ: komchadluek, http://www.news.com.la/
ຕິດຕາມນານາສາລະ ກົດໄລຄ໌ເລີຍ!