ນາງ ສົມພູ ແກ້ວບໍລະກົດ ນັກກິລາສະໂມສອນຈ້ອງເວີນລາວ ຄວ້າຂັນລາງວັນຊະນະເລີດ ປະເພດແຂ່ງບິນລົງເປົ້າແມ້ນ ໃນການແຂ່ງຂັນຈ້ອງເວີນ ຊີງແຊ໋ມນາໆຊາດ ຕາດໝອກ ປະຈຳປີ 2016 ຫຼື ພາຣາລິດິງອິນເຕີເນຊັນນອລ 2016
ທີ່ແຂວງເພັດສະບູນ ຣາຊະອານາຈັກໄທ ລະຫວ່າງວັນທີ 23-25 ທັນວາ ຜ່ານມາ.ຕາມການລາຍງານຂອງທ່ານ ສຸລິສັກວິໄລອະດີດນັກກິລາແລ່ນ-ລານທີມຊາດລາວ ທັງເປັນນັກກິລາສະໂມສອນຈ້ອງເວີນລາວ ໃນຕອນເຊົ້າວັນທີ 27 ທັນວາ ຜ່ານມາ ໃຫ້ຮູ້ວ່າ: ພາຍຫຼັງທີ່ໄດ້ເອົາໃຈໃສ່ໃນການເຝິກແອບກິລາດັ່ງກ່າວຢ່າງເປັນປົກກະຕິ ໂດຍພວກເຮົາ 4 ຄົນ ໄດ້ມີການ ເດີນທາງໄປທົດສອບຄວາມສາມາດຢູ່ປະເທດໄທ ແລະ ເຝິກຊ້ອມພາຍໃນນະຄອນຫຼວງວຽງຈັນເພື່ອສ້າງປະສົບການໃຫ້ຕົນເອງມີຄວາມຊຳນິຊຳນານຂຶ້ນກວ່າເກົ່າ ພ້ອມທັງໃຊ້ງົບປະມານສ່ວນຕົວທີ່ສູງ ເພື່ອທຸ້ມເທສຸມໃສ່ການພັດທະນາໃຫ້ໄດ້ຕາມເປົ້າໝາຍແນໃສ່ປະກອບສ່ວນສ້າງຜົນງານ ແລະ ກຽດຊື່ສຽງໃຫ້ແກ່ປະເທດຊາດ ໃນການເຂົ້າຮ່ວມແຂ່ງຂັນກິລາຈ້ອງເວີຍຊີງແຊ໋ມນາໆຊາດ ຕາດໝອກ ປະຈຳປີ 2016ທີ່ແຂວງເພັດສະບູນ ປະເທດໄທ ລະຫວ່າງວັນທີ 23-25 ທັນວາ 2016.
ການເຂົ້າຮ່ວມແຂ່ງຂັນດັ່ງກ່າວ, ກໍ່ເປັນໄປຕາມເປົ້າໝາຍທີ່ວາງໄວ້, ໂດຍມີບັນດາປະເທດໃນຂົງເຂດເອເຊຍ ແລະ ຢູໂຣບເຂົ້າຮ່ວມ ປະກອບມີ ລາວ, ຍີ່ປຸ່ນ, ເຢຍລະມັນ, ເບວຢຽມ, ນອກແວ, ອັງກິດ, ສະວີເດັນ, ຝຣັ່ງ ແລະ ໄທເຈົ້າພາບ ລວມ70 ກວ່າຄົນ. ໃນນັ້ນ, ມີການຊີງໄຊກັນທັງໝົດ 6 ລາຍການ ຈາກ 3 ຮຸ່ນ ຄື: ແຂ່ງບິນເດີນທາງໄລຍະໄກ ຮຸ່ນທົ່ວໄປ, ແຂ່ງຂັນບິນລົງເປົ້າແມ້ນ ຮຸ່ນທົ່ວໄປ ແລະ ແຂ່ງບິນເປົ້າແມ້ນ ຮຸ່ນເຍົາວະຊົນ ທັງຊາຍ ແລະ ຍິງ ສະເພາະສະໂມສອນກິລາຈ້ອງເວີນລາວສົ່ງນັກກິລາເຂົ້າຮ່ວມແຂ່ງຂັນ 4 ຄົນ ຊາຍ 2 ຄົນ, ຍິງ 2 ຄົນ ປະກອບມີ ທ້າວ ສຸລະສັກ ວິໄລ, ທ້າວ ວິນລີ້ ພູນສະຫວັດ ນາງສົມພູ ແກ້ວບໍລະກົດ ແລະ ນາງ ເຟືອງ.
ສຳລັບ ສຸລະສັກ ວິໄລ ລົງແຂ່ງຂັນລາຍການ ບິນເດີນທາງໄກ ໂດຍມີນັກກິລາເຂົ້າຮ່ວມທັງໝົດ 20 ກວ່າຄົນ, ບິນລີ້ ພູນສະຫວັດ ລົງແຂ່ງຂັນ ລາຍການ ບິນລົງເປົ້າແມ້ນ ມີນັກກິລາເຂົ້າຮ່ວມ 28 ຄົນ ແລະ ລາຍການທີ່ນັກກິລາຍິງລາວ 2 ຄົນ ລົງແຂ່ງຂັນລາຍການ ບິນລົງເປົ້າແມ້ນ ມີນັກກິລາເຂົ້າຮ່ວມ 22 ຄົນ.
ຜ່ານການແຂ່ງຂັນໃນໄລຍະ 3 ວັນ ປາກົດວ່າ ນັກກິລາຈ້ອງເວີນລາວ ສາມາດກວາດແຊ໋ມໄດ້ 1 ລາຍການ ຈາກນາງ ສົມພູ ແກ້ວບໍລະກົດ, ທ້າວ ສຸລະສັກ ວິໄລ ແລະ ນາງ ເຟືອງ ຄວ້າອັນດັບທີ 2 ແລະ ທ້າວ ບິນລີ້ ພູນສະຫວັດ ຄວ້າອັນດັບທີ 3.
ຂ່າວຈາກ: http://www.moe.gov.la/index.php/lang-la/news/2079—–2016
ຕິດຕາມຂ່າວເສດຖະກິດລາວ ກົດໄລຄ໌ເລີຍ!