ຈາກສະພາບຝົນຕົກຕໍ່ເນື່ອງເປັນເວລາຫຼາຍວັນໃນອາທິດແລ້ວນີ້, ໄດ້ເປັນເຫດໃຫ້ຫຼາຍພື້ນທີ່ໃນແຂວງຈຳປາສັກ
ຈົມຢູ່ພື້ນນ້ຳ ພື້ນທີ່ການຜະລິດ ສັດລ້ຽງ ຕະຫຼອດຮອດທີ່ຢູ່ອາໄສຂອງປະຊາຊົນຫຼາຍພັນຄອບຄົວໄດ້ຮັບຜົນກະທົບ
ແລະ ມີຜູ້ເສຍຊີວິດແລ້ວໜຶ່ງຄົນ.
ຕາມການໃຫ້ສຳພາດທາງໂທລະສັບຂອງ ທ່ານ ກິຕັນ ກິດທິໄຊ ຮອງຂະແຫນງປູກຝັງພະແນກກະສິກຳ ແລະ ປ່າໄມ້
ແຂວງຈຳປາສັກຕໍ່ທີມຂ່າວສັງຄົມໃຫ້ຮູ້ວ່າ: ສະພາບນ້ຳຖ້ວມໄດ້ເລີ່ມມາແຕ່ວັນທີ 29 ເດືອນກໍລະກົດຍ້ອນເກີດມີ
ຝົນຕົກຕິດຕໍ່ກັນຫຼາຍວັນ ໂດຍທົ່ວແຂວງມີບໍ່ຕ່ຳກວ່າ 5 ເມືອງທີ່ໄດ້ຮັບຜົນກະທົບເປັນຕົ້ນແມ່ນເມືອງສຸຂຸມາ,
ມຸນລະປະໂມກ, ຈຳປາສັກ, ໂພນທອງ ແລະ ເມືອງປາກເຊ ແຕ່ເມືອງທີ່ໜັກກວ່າໝູ່ແມ່ນເມືອງສຸຂຸມາ, ທ່ານ ກິຕັນ
ກິດທິໄຊ ລະບຸ.
ທ່ານ ສິດທິສອນ ມະນີບົດ ກອງເລຂາຄະນະຄຸ້ມຄອງໄພພິບັດຂັ້ນເມືອງຂອງເມືອງສຸຂຸມາເປີດເຜີຍ ຕໍ່ທີມຂ່າວ
ໃນເວລາຕໍ່ມາຂອງວັນດຽວກັນວ່າ: ໄພທຳມະຊາດນ້ຳຖ້ວມຄັ້ງນີ້ໄດ້ສ້າງຄວາມເດືອດຮ້ອນໃຫ້ປະຊາຊົນ 2,1 ພັນ
ກວ່າຄອບຄົວພົນລະເມືອງ 11,5 ພັນກວ່າຄົນ ພ້ອມດຽວກັນນັ້ນກໍຍັງມີເນື້ອທີ່ນາ 3,5 ພັນກວ່າເຮັກຕາ, ຫນອງ
ປາ 21 ຫນອງມີປາ 25 ພັນກວ່າໂຕ ຮ້ານຄ້າ 77 ຮ້ານ ໂຮງສີເຂົ້າ 8 ແຫ່ງ ສາງນ້ຳມັນ 4 ປ້ຳໂຮງງານນ້ຳດື່ມ 2 ແຫ່ງ
ໝໍ້ແບ່ງໄຟຟ້າ 13 ເຄື່ອງຖືກນ້ຳຖ້ວມ ແລະ ໄດ້ຮັບຄວາມເສຍຫາຍ.
ທ່ານ ສິດທິສອນ ຍັງລາຍງານໃຫ້ ຮູ້ອີກວ່າຢູ່ໃນເມືອງສຸຂຸມາມີຜູ້ເສຍຊີວິດຍ້ອນນ້ຳຖ້ວມແລ້ວ 1 ຄົນ (ໃນເວລາ
ປະມານ 7:00 ໂມງຂອງວັນທີ 2 ສິງຫາ) ເປັນເພດຊາຍອາຍຸປະມານ 2 ປີ ກວ່າຢູ່ບ້ານສຸຂຸມາເຫນືອ.
ຢ່າງໃດກໍຕາມ ທາງການຈັດຕັ້ງພັກລັດ ແລະ ສັງຄົມແມ່ນມີຄວາມເປັນຫ່ວງ ແລະ ໄດ້ໃຫ້ການຊ່ວຍເຫຼືອຊຶ່ງ
ແລງວານນີ້ມີແລ້ວສອງພາກສ່ວນທີ່ຢື່ນ ມືເຂົ້າມາຊ່ວຍເປັນປະເພດນ້ຳດື່ມ, ສ່ວນສະພາບຝົນຕົກ ແລະ ລະ
ດັບນ້ຳໄດ້ສືບຕໍ່ຫຼຸດລົງຕາມລາຍງານຮອດແລງວັນທີ 3 ສິງຫາ.
ແຫຼ່ງຂ່າວ: http://www.sedthakid.la/home/khao/19759.html