ຈອນ ບ່າວຂຶ້ນໃໝ່ໄວ 16 ປີ ກັບຄວາມຊົງຈຳກັບຄວາມຮັກຄັ້ງທຳອິດ ກັບສາວນ້ອຍບ້ານນອກຄົນໜ້າໃສໃຈສື່ ເຖິງຄວາມສຳພັນຈະເລີ່ມຂຶ້ນໃນເວລາອັນສັ້ນ ແຕ່ຍັງຝັງໃຈບໍ່ມີວັນລືມ ເລື່ອງລາວມີຢູ່ວ່າ:
ຫຼັງຈາກປິດພາກຮຽນສອງ ໃນໄລຍະ 3 ເດືອນ ເມື່ອ 3 ປີຜ່ານມາ ຈອນ ໄດ້ລົງໄປຢ້ຽມຍາມພໍ່ຕູ້ແມ່ຕູ້ຢູ່ທີ່ ສອງຄອນ ລະຫານ້ຳ ແຂວງ ສະຫວັນນະເຂດ ແລະ ໄດ້ໄປຮູ້ຈັກກັບສາວນ້ອຍຄົນໜຶ່ງທີ່ຢູ່ໃກ້ກັບເຮືອນຂອງພໍ່ຕູ້ແມ່ຕູ້ຂອງລາວຂັ້ນກັນພຽງ 2-3 ຫຼັງເຮືອນ, ເຮືອນຂອງພໍ່ຕູ້ແມ່ຕູ້ຂອງຈອນ ເປັນເຮືອນສອງຊັ້ນເທິງເປັນໄມ້ຊັ້ນລຸ່ມເປັນດິນກໍ່ ແລະ ເປີດເປັນຮ້ານຂາຍເຄື່ອງຍ່ອຍລະດັບກາງ ຈອນ ມັກມານັ່ງເຝົ້າຮ້ານຂາຍເຄື່ອງຊ່ວຍພໍ່ຕູ້ແມ້ຕູ້ເປັນປະຈຳທຸກມື້ ແລະ ຄືນທີ່ສາມທີ່ລາວໄດ້ໄປຢູ່ນັ້ນ ອາວສັກທີ່ອາໃສຢູ່ໃນເຮືອນດຽວກັນກັບຈອນທີ່ຍັງເປັນໂສດ ໄດ້ຊວນລາວໄປເລາະລົມສາວໄທບ້ານໃນຕອນກາງຄືນ ຈອນ ກໍ່ເລີຍຕັດສິນໃຈໄປເປັນໝູ່ ເຊິ່ງໃນໃຈລາວກໍ່ບໍ່ໄດ້ຄິດຫຍັງຫຼາຍຄິດວ່າໄປລ້າໆດີກວ່ານອນເຊັງໃນຫ້ອງ ເມື່ອໄປຮອດເຮືອນ ອາວສັກກັບສາວນ້ອຍຄົນງາມກໍ່ໄດ້ອອກມານັ່ງລົມກັນທີ່ໂຕະໜ້າເຮືອນ ເຊິ່ງມີບັນດາສາວໆຫຼາຍຄົນ ກັບມີຜູ້ຊາຍຫຼາຍຄົນມານັ່ງຫຼິ້ນເປັນວົງລົມກັນຍ່າງມ່ວນຊື່ນ ພາກັນນັ່ງລົມສາວພ້ອມດື່ມເຫຼົ້າຂາວໄປນຳ ເຊິ່ງຈອນກໍ່ນັ່ງຮ່ວມວົງ ແລະ ລົມສາວໄທບ້ານຢ່າງມ່ວນຊື່ນ ນັ່ງໄປຈັກບຶດໜຶ່ງກໍ່ຮູ້ສຶກປວດເບົາ ລາວຈິ່ງຂໍໄປເຂົ້າຫ້ອງນ້ຳ ທາງໄປຫ້ອງນ້ຳຕ້ອງຍ່າງເຂົ້າທາງຫຼັງເຮືອນ ແຕ່ກ່ອນຈະຮອດຫ້ອງນ້ຳ ລາວຕ້ອງຍ່າງຜ່ານກີ່ຕ່ຳຫູກກ່ອນ ໃນຂະນະທີ່ລາວຍ່າງກ້າວເຂົ້າປະຕູ ລາວໄດ້ເຫັນຍິງສາວຄົນໜຶ່ງຫຸ່ນບາງຮ່າງນ້ອຍ ເປັນຄົນຜິວດຳກ້ຽງໃບໜ້າຮູບໄຂ່ ຕາດຳມົນມັດຜົມເກົ້າ ກຳລັງນັ່ງຕ່ຳຫູກຄົນດຽວດ້ວຍຄວາມຕັ້ງໃຈ ໂດຍບໍ່ສົນໃຈກັບສຽງບົນແຊວທາງນອກ ຈອນ ໄດ້ຢຸດຈຶ້ງເບິ່ງຈັກຄາວໜຶ່ງດ້ວຍຄວາມສົນໃຈກ່ອນທີ່ສາວຄົນນັ້ນ (ໄກ່) ຈະຢຸດຕ່ຳຫູກແລ້ວເງີຍໜ້າແນມມາເບິ່ງໜ້າຈອຍຄືນດ້ວຍຄວາມແປກໃຈ ຈອນຮູ້ສຶກອາຍເລັກໜ້ອຍຈິ່ງຟ້າວຍ່າງກາຍໄປເຂົ້າຫ້ອງນ້ຳ ຢ່າງໄວວາ ເມື່ອເວລາຍ່າງກັບ ຈອນກໍ່ທັງຍ່າງທັງແນມເບິ່ງ (ໄກ່) ຄືເກົ່າ ແຕ່ສາວໄກ່ເຮັດບໍ່ສົນໃຈປ່ອຍໃຫ້ຈອນຍ່າງຜ່ານໄປໂດຍບໍ່ເງີຍນ້າຂຶ້ນມາເບິ່ງເລີຍ.
ເມື່ອກັບຮອດເຮືອນທີ່ຫ້ອງນອນ ເມື່ອເວລາຈອນລັບຕາກໍ່ປະກົດເຫັນພາບຂອງ ສາວຄົນໜຶ່ງທີ່ກຳລັງນັ່ງຕ່ຳຫູກລອຍເຂົ້າມາໃນສະໝອງວົນໄປວົນມາ ກວນໃຈລາວເຮັດໃຫ້ລາວນອນເກືອບບໍ່ໄດ້ ເຊິ່ງ ຈອນເອງກໍ່ບໍ່ຮູ້ວ່າເກີດຫຍັງຂຶ້ນກັບລາວ ລາວພະຍາຍາມຂົ່ມຕາໃຫ້ຫຼັບຈົນເມື່ອຍແລ້ວຫຼັບໄປເອງ, ເຊົ້າມື້ຕໍ່ມາ ຈອນກໍ່ເປີດຮ້ານ ແລ້ວຂາຍເຄື່ອງຕາມປົກ ກະຕິ ແຕ່ເປີດຮ້ານມື້ນີ້ ຄົນທຳອິດທີ່ມາຊື້ເຄື່ອງຊ່ວຍ ແມ່ນສາວຄົນທີ່ນັ່ງຕ່ຳຫູກຄືນນີ້ ຈອນຮູ້ເຂີນເລັກໜ້ອຍ ໃນຂະນະທີ່ ຈອນ ຢື່ນເງິນທອນໃຫ້ ໄກ່ ສາວນ້ອຍກໍ່ຮ້ອງມາໃສ່ນ້ອງສາວກໍ່ຄືສາວໄກ່ ໃຫ້ຊື້ເຄື່ອງໄວໆ ເພາະຟ້າວໄປດຳນາ ແລ້ວມື້ນັ້ນກໍ່ເຮັດໃຫ້ ຈອນຮູ້ຈັກຊື່ສາວທີ່ຕົນເຫັນໃນຄືນນັ້ນ ແຕ່ລະມື້ ຈອນມັກມານັ່ງທີ່ໜ້າຮ້ານຖ້າແນມເບິ່ງ ສາວໄກ່ຍ່າງກາຍໜ້າຮ້ານ ໃນເວລາໄປນາຕອນເຊົ້າ ແລະ ຍ່າງກັບມາເຮືອນໃນເວລາຕອນແລງ ດ້ວຍຄວາມສຸກໃຈ ແລະ ບາງມື້ຈອນກໍ່ຂີ່ລົດເລາະໄປທາງເຮືອນຂອງ ສາວໄກ່ ເພື່ອຫວັງຈະໄດ້ພົບກັບສາວໄກ່ ເຊິ່ງບາງມື້ກໍ່ເຫັນ ສາວໄກ່ກຳລັງເກືອເປັດ, ເກືອໄກ່ ຫຼື ຫົດຜັກໜ້າເຮືອນ ແຕ່ບາງມື້ກໍ່ຜິດຫວັງໄປແລ້ວບໍ່ພົບ ຈອນຮູ້ສຶກສົນໃຈໄກ່ເປັນພິເສດ ຢາກເຂົ້າໄປເວົ້າ ໄປລົມນຳແຕ່ກໍ່ບໍ່ກ້າ ເວລາໄດ້ຜ່ານໄປ 1 ອາທິດ ຍັງບໍ່ມີຄວາມຄືບໜ້າດ້ານຄວາມສຳພັນຂອງທັງສອງ ແລະ ເປັນອີກຄັ້ງໜຶ່ງທີ່ຈອນ ໄດ້ໂອກາດໃກ້ຊິດກັບ ໄກ່ ເພາະໃນຊ່ວງວັນເສົາ-ອາທິດ ອາວຂອງຈອນ ໄດ້ໄປດຳນາຊ່ວຍ ສາວນ້ອຍ ເອື້ອຍຂອງ ໄກ່ ໃນຊີວິດຈອນ ແມ່ນບໍ່ເຄີຍເຮັດນາຈັກເທື່ອ ເພາະແຕ່ຕອນຈົນໃຫຍ່ກໍ່ໃຊ້ຊີວິດຢູ່ແຕ່ໃນເມືອງຫຼວງ ຊີວິດມີແຕ່ຮຽນກັບໄປຫຼິ້ນ ແລະ ນີ້ກໍ່ເປັນຄັ້ງທຳອິດທີ່ໄດ້ມາໃຊ້ຊີວິດພັກແລ້ວຢູ່ເຮືອນຂອງພໍ່ຕູ້ແມ່ຕູ້ເປັນໄລຍະດົນກວ່າປົກກະຕິ ເພາະເມື່ອກ່ອນກໍ່ລົງມາຢາມພຽງ 1-2 ອາທິດກໍ່ກັບ ແຕ່ປີນີ້ຕັ້ງໃຈວ່າຈະຢູ່ຈົນໃກເປີິສົກຮຽນໃໝ່ຈິ່ງຄ່ອຍກັບ ຈອນໄດ້ໄປຢືນຢູ່ຂ້າງໆ ໄກ່ ແລະ ຄອຍສັງເກດເບິ່ງໄກ່ດຳເຂົ້າລົງໃສ່ນາ ໄກ່ມີຄວາມຊຳນານຫຼາຍໃນການດຳນາ ເພາະເປັນເຮັດມາຕັ້ງແຕ່ນ້ອຍ ໄກ່ໄດ້ດຳເຂົ້າໃສ່ນາລົງໄປໄວ່ໆ ສ່ວນຈອນກໍ່ທັງເບິ່ງທງຟ້າວດຳໃຫ້ມັນທັນກັບໄກ່ ເມື່ອດຳໄປສຸດໄຮ່ນຳ ພໍແຕ່ລາວລຽວຫຼັງກັບຄືນມາເບິ່ງເຂົ້າທີ່ຕົນເອງດຳ ກ້າເຂົ້າຂອງຈອນທີ່ປັກລົງໄປກໍ່ຟູອ່າງລ່າງທຸກຕົ້ນ ເມື່ອເຫັນແນວນັ້ນ ໄກ່ທີ່ມິດງຽບກໍ່ຫົວຂຶ້ນ ນີ້ຖືວ່າເປັນຄັ້ງທຳອິດທີ່ຈອນໄດ້ເຫັນຮອຍຍິ້ມ ແລະ ໄດ້ຍິນສຽງຫົວຂອງ ໄກ່, ໄກ່ພໍຮູ້ແລ້ວວ່າຈອນດຳນາບໍ່ເປັນຈິ່ງໄດ້ສອນໃຫ້ຈອນຮູ້ຈັກວິທີເອົາກ້າເຂົ້າປັກລົງນາ ສອນຫຼາຍຄັ້ງຫຼາຍເທື່ອຈົນຈອນດຳນາເປັນ ໃນຂະນະທີ່ດຳນາພວກເຂົາກໍ່ໄດ້ລົມກັນໄປ ຈອນຈິ່ງໄດ້ຮູ້ວ່າຄວາມຈິງແລ້ວ ໄກ່ກໍ່ເປັນຄົນທີ່ລົມເກັ່ງຄົນໜຶ່ງ ບໍ່ແມ່ນຄົນທີ່ມິດງຽບຄືທີ່ຕົນເອງຄິດ ເມື່ອດຳນາແລ້ວຕົກແລງພວກເຂົາໄດ້ຍ່າງຂ້າງກັນມາ ພໍຮອດຕອນກາງຄືນ ຈອນກໍ່ໄດ້ຊວນອາວສັກ ໄປທີ່ເຮືອນຂອງໄກ່ ຫຼັງຈາກມື້ນັ້ນມາພວກເຂົາທັງສອງ ໄກ່ ກັບ ຈອນ ກໍ່ໄດ້ລົມກັນຫຼາຍຂຶ້ນ ຮອດຍາມເຂົ້າພັນສາ ທັງສອງກໍ່ໄປໃສ່ບາດຮ່ວມກັນ ແລະ ຕອນກາງຄືນຍັງໄດ້ໄປວຽນທຽນຮ່ວມກັນອີກ ຄວາມສຳພັນຂອງທັງຄູ່ໄດ້ມີການພັດທະນາຂຶ້ນຢ່າງໄວວາ ນັບມື້ຍິ່ງເລິກເຊິ່ງ ເຖິງແມ່ນວ່າທັງສອງຈະຮູ້ດີວ່າຕ້ອງມີຈັກວັນໜຶ່ງທີ່ທັງສອງຈະຕ້ອງຫ່າງເຫີນກັນໄປ ແລະ ກໍ່ບໍ່ຮູ້ວ່າອະນາຄົດຈະມີການປ່ຽນແປງແນວໃດ ແຕ່ທັງສອງກໍ່ຕັດສິນໃຈທີ່ຈະເຮັດປັດຈຸບັນໃຫ້ດີທີ່ສຸດ ເມື່ອຮອດຍາມທີ່ຕ້ອງຈາກກັນຈິ່ງຈະເຫຼືອໄວ້ແຕ່ຄວາມຊົງຈຳທີ່ດີໃຫ້ກັນ.
ແລ້ວມື້ນັ້ນກໍ່ມາຮອດ ກາງເດືອນສິງຫາ ຈອນ ຕ້ອງໄດ້ມາທີ່ວຽງຈັນເພື່ອສະເໜີເຂົ້າຮຽນ ກ່ອນຈອນຈະກັບລາວໄດ້ໄປອຳລາໄກ່ທີ່ເຮືອນ ສາວໄກ່ໄດ້ນັ່ງຕ່ຳຫູກ ແລະ ຟັງຄຳອຳລາຈາກຈອນດ້ວຍຄວາມໂສກເສົ້າ ໂດຍບໍ່ປາກບໍ່ເວົ້າບໍ່ເງີຍຮອດໜ້າເບິ່ງຈອນ ເພາະຕ້ອງເກັບງຳຄວາມຮູ້ສຶກທີ່ເຈັບປວດໄວ້ ມີພຽງນ້ຳຕາທີ່ໄຫລຕົກລົງໃສ່ແຜ່ນຜ້າທີ່ຕ່ຳ ຈອນເຫັນແບບນີ້ກໍ່ຮູ້ແລ້ວວ່າໄກ່ກໍ່ຄົງຮູ້ສຶກບໍ່ຕ່າງຈາກຕົນເອງ ຈອນເວົ້າອອກມາດ້ວຍນຳສຽງສັ່ນໆ ດ້ວຍຄວາມເຈັບ ປວດໃຈ ເຖິງບໍ່ຢາກຈາກໄປກໍ່ຕ້ອງຈາກໄປ ເພາະຍັງມີສິ່ງທີ່ສຳຄັນຕ້ອງກັບໄປເຮັດ ເມື່ອຈອນເວົ້າສຸດລາວກໍ່ຍ່າງໄປຂຶ້ນລົດ ເມື່ອລົດແລ່ນອອກຈາກເຮືອນ ໄກ່ກໍ່ຟ້າວແລ່ນນຳກົ້ນລົດເພື່ອມາຢືນເບິ່ງທີ່ໜ້າບ້ານ ຈອນໄດ້ແນມຫລັງກັບມາກໍ່ເຫັນໄກ່ຢືນໂບກມືລາດ້ວຍຄວາມປວດໃຈແບບສຸດໆ ອາວຂອງຈອນໄດ້ໄປສົ່ງຈອນຂຶ້ນລົດ ສະຫວັນ-ນະຄອນ ຫຼວງວຽງຈັນທີ່ຄິວລົດ ໃນຂະນະລົດກຳລັງອອກຈາກຄິວ ສຽງຂໍ້ຄວາມກໍ່ດັງຂຶ້ນເມື່ອເປີດອ່ານກໍ່ແມ່ນຂໍ້ຄວາມຈາກໄກ່ທີ່ສົ່ງມາອຳລາ ແລະ ອວຍພອນໃຫ້ຈອນເດີນທາງປອດໄພ ພ້ອມຫວັງວ່າໂອກາດໜ້າຈະໄດ້ພົບກັນອີກ
ເມື່ອມາຮອດວຽງຈັນ ໃນໄລຍະປີໜຶ່ງພວກເຂົາຍັງຕິດຕໍ່ກັນທາງໂທລະສັບປົກກະຕິ ແຕ່ກ້າວເຂົ້າປີທີສອງ ທັງສອງຄົນກໍ່ເລີ່ມຫ່າງກັນໄປຄວາມຮູ້ສຶກຜູກພັນກໍ່ເລີ່ມຫ່າງເຫີນ ອາດເປັນເພາະຄວາມຫ່າງໄກ ເຮັດໃຫ້ໃຈທັງຄູ່ປ່ຽນໄປ ແລະ ໃນທີ່ສຸດຄວາມສຳພັນຈາກເຄີຍຮັກກັນແບບແຟນກໍ່ກາຍເປັນຮັກກັນແບບໝູ່ເພື່ອນເທົ່ານັ້ນ ແຕ່ໃນໃຈເລິກໆແລ້ວຄວາມຊົງຈຳກ່ຽວກັບຄວາມຮັກຄັ້ງນັ້ນຍັງຄົງສວຍງາມຢູ່ໃນໃຈຂອງທັງຄູ່ສະເໝີ ເພາະນັ້ນຖືເປັນຄວາມຮັກຂອງທັງຄູ່.
ແຕ່ງໂດຍ: ແອັດມິນ ປັອກເລັກ ລາວໂພສຕ໌
ຕິດຕາມເລື່ອງດີດີເພຈຊີວິດແລະຄວາມຮັກ ກົດໄລຄ໌ເລີຍ!