ເຮືອບິນຂະໜາດນ້ອຍ ພຸ່ງຕຳເອົາ 2 ພໍ່ລູກອາເມລິກັນ ລະຫວ່າງກຳລັງລົງຈອດເທິງຊາຍຫາດ ສົ່ງຜົນເຮັດໃຫ້
ພໍ່ເສຍຊີວິດຄາທີ່, ສ່ວນລູກສາວບາດເຈັບສາຫັດ.
ເມື່ອວັນຈັນທີ 28 ກໍລະກົດ ຜ່ານມານີ້ ສຳນັກຂ່າວ ຊີເອັນເອັນ ລາຍງານວ່າ ເກີດເຫດສຸດສະຫຼົດຂຶ້ນໃນສະຫະ
ລັດ ເມື່ອເຮືອບິນຂະໜາດນ້ອຍລຳໜຶ່ງ ໄດ້ແລນດິ້ງລົງຈອດເທິງຊາຍຫາດຟໍລິດ້າ ແຕ່ພາດທ່າບິນລົງໄປຕຳ
ໃສ່ພໍ່ລູກຄູ່ໜຶ່ງ ທີ່ກຳລັງຍ່າງຫຼິ້ນຢູ່ຊາຍຫາດ ສົ່ງຜົນເຮັດໃຫ້ພໍ່ເສຍຊີວິດຄາທີ່ ສ່ວນລູກສາວບາດເຈັບສາຫັດ.
ເຫດການດັ່ງກ່າວນີ້ ເກີດຂຶ້ນໃນຕອນບ່າຍຂອງວັນທີ 27 ກໍລະກົດທີ່ຜ່ານມາ ໂດຍເຮືອບິນຂະໜາດນ້ອຍ
1972 Piper Cherokee ໄດ້ຕິດຕໍ່ໄປຍັງສູນຄວບຄຸມການບິນວ່າ ນັກບິນບໍ່ສາມາດບິນໄປລົງຈອດທີ່ສະໜາມ
ບິນໄດ້ ແລະ ຈະພະຍາຍາມລົງຈອດທີ່ຊາຍຫາດຄາສເປີເຊນ ໃນລັດຟໍລິດ້າແທນ, ແຕ່ແລ້ວການລົງຈອດຂອງ
ເຮືອບິນຂະໜາດນ້ອຍຄັ້ງນີ້ ກັບກາຍເປັນໂສກນາຕະກຳ ເມື່ອເຮືອບິນໄດ້ພຸ່ງຕຳເອົາ ທ້າວ ໂອມມີ ເອີຣິແຊຣີ່
ພໍ່ອາຍຸ 36 ປີ ແລະ ລູກສາວຊື່ ນາງ ໂອເຊຍນາ ອາຍຸ 9 ປີ ເຊິ່ງພໍ່ລູກຈາກລັດຈໍເຈຍ ກຳລັງຍ່າງຫຼິ້ນຢູ່ຊາຍຫາດ
ເຮັດໃຫ້ທ້າວ ເອີຣິແຊຣີ່ ເສຍຊີວິດໃນບ່ອນເກີດເຫດ, ສ່ວນນາງ ໂອເຊຍນາ ໄດ້ຖືກນຳໂຕສົ່ງໂຮງໝໍເດັກຢ່າງ
ຮີບດ່ວນ ດ້ວຍອາການບາດເຈັບສາຫັດ ໂດຍໃນຂະນະທີ່ນັກບິນ ແລະ ຜູ້ໂດຍສານ 1 ຄົນ ເທິງເຮືອບິນລຳນັ້ນ
ບໍ່ໄດ້ຮັບບາດເຈັບໃດໆ.
ນອກຈາກນີ້ ຍັງມີຜູ້ບາດເຈັບອີກ 3-4 ລາຍ ຫຼັງຈາກຖືກເຮືອບິນດາດ ໂດຍທາງການລະບຸວ່າ ຈຸດທີ່ເຮືອບິນ
ພະຍາຍາມລົງຈອດນັ້ນ ບໍ່ແມ່ນຊາຍຫາດຮ້າງຜູ້ຄົນ ແຕ່ກັບເປັນຊາຍຫາດທີ່ມີນັກທ່ອງທ່ຽວຢູ່ຈຳນວນໜຶ່ງ.