Homeຍ້ອງຍໍຄົນດີເດັ່ນສຕລ ມອບໃບຍ້ອງຍໍໃຫ້ກັບ ຄະນະຄູຝຶກ-ນັກເຕະທີມຊາດລາວຊຸດໃຫຍ່ ແລະ ທີມຊາດຍິງ ຢູ 16

ສຕລ ມອບໃບຍ້ອງຍໍໃຫ້ກັບ ຄະນະຄູຝຶກ-ນັກເຕະທີມຊາດລາວຊຸດໃຫຍ່ ແລະ ທີມຊາດຍິງ ຢູ 16

Published on

ສະຫະພັນບານເຕະແຫ່ງຊາດລາວ (ສຕລ) ຈັດພິທີມອບໃບຍ້ອງຍໍໃຫ້ກັບ ບັນດາຄະນະຄູຝຶກ ແລະ ນັກກີລາຂອງ ທີມຊາດລາວ ຊຸດໃຫຍ່ ແລະ ທີມຊາດຍິງ ລຸ້ນອາຍຸບໍ່ເກີນ 16 ປີ ເມື່ອວັນທີ 26 ພະຈິກທີ່ຜ່ານມາ ເພື່ອເປັນການຍ້ອງຍໍສັນລະເສີນ ແລະ ມອບກໍາລັງໃຈອັນສໍາຄັນນັກກີລາ ສືບຕໍ່ສ້າງຜົນງານອັນໂດດເດັ່ນມາສູ່ວົງການບານເຕະລາວ ຂະນະທີ່ ບໍລິສັດ ເອັສເອັນຈີ (SNG) ມອບເງິນອັດສີດໃຫ້ກັບທີມຊາດຍິງ ຢູ 16 ຈໍານວນເງິນ 20 ລ້ານກີບ.
ເມື່ອວັນທີ 26 ພະຈິກທີ່ຜ່ານມາ ທີ່ສະຫະພັນບານເຕະແຫ່ງຊາດລາວ (ສຕລ) ເຊິ່ງໃຫ້ກຽດມອບໃບຍ້ອງຍໍໂດຍ ທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກີລາ, ທ່ານ ປະສາດໄຊ ພິລາພັນເດຊ ຮັກສາການປະທານ ສຕລ, ທ່ານ ສີຈັນ ຈິດຕະປັນຍາ ຕົວແທນຈາກ ກະຊວງສຶກສາທິການ ແລະ ກີລາ ແລະ ຕົວແທນຈາກບໍລິສັດ ເອັສເອັນຈີ ພ້ອມດ້ວຍຄະນະນໍາ, ຄູຝຶກ, ນັກກີລາ, ຜູ້ປົກຄອງຂອງນັກກີລາ ແລະ ສື່ມວນຊົນເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ ທ່ານ ປະລິນຍາເອກ ໄຊບັນດິດ ຣາຊະພົນ ເລຂາທິການ ສຕລ ກ່າວວ່າ: ການຈັດພິທີໃນມື້ນີ້ຂຶ້ນ ເພື່ອມອບໃບຍ້ອງຍໍໃຫ້ກັບທີມຊາດຍິງ ລຸ້ນອາຍຸບໍ່ເກີນ 16 ປີ ທີ່ຍາດໄດ້ຜົນງານໂດດເດັ່ນ ໃນການແຂ່ງຂັນບານເຕະ ຊີງແຊັມອາຊີ 2017 ຮອບຄັດເລຶອກ ທີ່ປະເທດໄທ ແລະ ສ້າງປະຫວັດສາດດ້ວຍການຄວ້າອັນດັບ 2 ຂອງກຸ່ມ A ພ້ອມດ້ວຍສິດໄປຮ່ວມການແຂ່ງຂັນຮອບສຸດທ້າຍໃນປີໜ້າ ແລະ ຖ້າຫາກສາມາດຕິດ 1 ໃນ 4 ໃນຮອບສຸດທ້າຍ ກໍ່ມີສິດໄປຫຼິ້ນບານໂລກອີກດ້ວຍ ສ່ວນທີມຊາດລາວ ຊຸດໃຫຍ່ ສາມາດຍາດໄດ້ອັນດັບ 3 ດ້ວຍການບຽດເອົາຊະນະ ບຣູໄນ 3-2 ເຊິ່ງຜົນງານນີ້ກໍ່ເປັນຜົນສໍາເລັດຂອງນັກກີລາເອງ ລວມທັງຂອງ ສຕລ ແລະ ລັດຖະບານທີ່ໃຫ້ການຊ່ວຍເຫຼືອຕ່າງໆ ໂດຍກໍ່ຈະສືບຕໍ່ຊຸກຍູ້ ແລະ ພັດທະນາທີມຊາດລາວທັງສອງຊຸດນີ້ ຢ່າງສຸດຂີດ ເພື່ອສ້າງຜົນງານໂດດເດັ່ນຕໍ່ໆໄປ.

ຂະນະດຽວກັນ ທ່ານ ສີຈັນ ຈິດຕະປັນຍາ ຫົວໜ້າບໍລິຫານກົມກີລາລະດັບສູງ ຕ່າງໜ້າຈາກ ກະຊວງສຶກສາທິການ ແລະ ກີລາ ໄດ້ຂຶ້ນມາຜ່ານຂໍຕົກລົງຂອງ ທ່ານລັດຖະມົນກະຊວງສຶກສາທິການ ແລະ ກີລາ ທີ່ມີຂໍຕົກລົງຢ່າງເປັນທາງການ ມອບໃບຍ້ອງຍໍໃຫ້ກັບ ບັນດາຄະນະຄູຝຶກ ແລະ ນັກກີລາຂອງທີມຊາດທັງສອງຊຸດ ເຊິ່ງທາງ ກະຊວງສຶກສາທິການ ແລະ ກີລາ ໄດ້ບັນທຶກຜົນງານດັ່ງກ່າວໄວ້ໃນໜ້າປະຫວັດສາດຂອງກະຊວງ ປະກອບດ້ວຍ ທີມຊາດລາວ ຊຸດໃຫຍ່ປະກອບມີ ຄະນະຄູຝຶກ 8 ຄົນ ແລະ ນັກກີລາ 23 ຄົນ ສ່ວນທີມຊາດຍິງ ລຸ້ນອາຍຸ 16 ປີປະກອບມີ ຄະນະຄູຝຶກ 9 ຄົນ ແລະ ນັກກີລາອີກ 23 ຄົນ ທີ່ສ້າງຜົນງານດັ່ງກ່າວມາສູ່ປະເທດພວກເຮົາ.

ຂະນະທີ່ ບໍລິສັດ ເອັສເອັນຈີ (SNG) ໄດ້ມອບເງິນອັດສີດໃຫ້ກັບ ທີມຊາດຍິງ ຢູ 16 ຈໍານວນເງິນ 20 ລ້ານກີບ ເພື່ອເປັນການຍ້ອງຍໍ ແລະ ໃຫ້ກໍາລັງໃຈນັກກີລາ ສືບຕໍ່ສ້າງຜົນງານຕໍ່ໄປ ຈາກຜົນງານທີ່່ ທີມຊາດຍິງ ຢູ 16 ລາວ ຝາກຜົນງານໃນໜ້າປະຫວັດສາດບານເຕະ ຊີງແຊັມອາຊີ 2017 ຮອບຄັດເລຶອກກຸ່ມໆ A ທີ່ປະເທດໄທ ລະຫວ່າງວັນທີ 27 ສິງຫາ ເຖິງ 5 ກັນຍາທີ່ຜ່ານມາ ໂດຍນັດທໍາອິດແຈ້ງເກີດດ້ວຍການຖະຫຼົ່ມ ມຽນມາ 5-2, ນັດທີ 2 ເສຍໃຫ້ ໄທ 2-5, ນັດທີ 3 ເອົາຊະນະ ຈໍແດນ 2-0 ແລະ ນັດສຸດທ້າຍ ຖະຫຼົ່ມ ກວມ ແບບບໍ່ເຫັນຝຸ່ນ 14-1 ຄວ້າອັນດັບ 2 ຂອງກຸ່ມຈາກການມີ 9 ຄະແນນ ກອດຄໍ ທີມຊາດໄທ ໄປຫຼິ້ນຮອບສຸດທ້າຍ ທີ່ປະເທດໄທ ໃນປີໜ້າ.

ສ່ວນຜົນງານ ທີມຊາດລາວ ຊຸດໃຫຍ່ ແມ່ນສ້າງຜົນງານຢ່າງໂດດເດັ່ນໃນການແຂ່ງຂັນ ບານເຕະ ໂຊລິດາຣິຕີ້ ຄັບ ທີ່ປະເທດມາເລເຊຍ ລະຫວ່າງວັນທີ 2-15 ພະຈິກທີ່ຜ່ານມາ ດ້ວຍການຄວ້າອັນດັບ 3 ໄປຄອງ ຈາກຜົນງານ ຊະນະ ສີລັງກາ 2-1, ເສຍໃຫ້ ມາເກົາ 1-4 ແລະ ຊະນະ ມົງໂກລີ 3-0 ໃນຮອບແບ່ງກຸ່ມ, ຜ່ານເຂົ້າຮອບຮອງຊະນະເລີດໄປເສຍໃຫ້ກັບ ເນປານ ໃນການດວນຈຸດໂທດ 5-2 ແລະ ໄປຊີງທີ 3 ບຽດເອົາຊະນະ ບຣູໄນ 3-2 ຄວ້າອັນດັບ 3 ໄປປອບໃຈ.

 

ຂອບໃຈຂໍ້ມູນ ແລະ ຮູບພາບຈາກ: ສະຫະພັນບານເຕະແຫ່ງຊາດລາວ Lao Football Federation

ຕິດຕາມຂ່າວເສດຖະກິດລາວ ກົດໄລຄ໌ເລີຍ!

ບົດຄວາມຫຼ້າສຸດ

ນາຍົກລັດຖະມົນຕີລາວ ພົບປະກັບ ປະທານສະພາແຫ່ງຊາດຫວຽດນາມ ໃນໂອກາດເດີນທາງຢ້ຽມຢາມ ສສ ຫວຽດນາມ ແລະ ເຂົ້າຮ່ວມກອງປະຊຸມເວທີອະນາຄົດອາຊຽນ ຄັ້ງທີ 3

ໃນຕອນບ່າຍວັນທີ 8 ມິຖຸນາ 2026, ທີ່ ນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ...

ແຈ້ງການມອດໄຟຟ້າຊົ່ວຄາວ ລັດວິສາຫະກິດໄຟຟ້າລາວ ນວ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ ເລີ່ມແຕ່ວັນທີ 9-14 ມິຖຸນາ 2026

​ລັດວິສາຫະກິດໄຟຟ້າລາວ (EDL) ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ (ມອດໄຟ) ເພື່ອປັບປຸງ, ສ້ອມແປງລະບົບຕາໜ່າງໄຟຟ້າ ແລະ ຕິດຕັ້ງເສົາໄຟຟ້າໃໝ່ ໃຫ້ມີຄວາມປອດໄພ ແລະ ກຽມພ້ອມຮອງຮັບການຊົມໃຊ້ທີ່ດີຂຶ້ນ....

ກຽມໄປແຂ່ງຕໍ່ທີ່ຍີ່ປຸ່ນ MAZDA GB FC U12 ຄວ້າແຊ້ມ ບານເຕະເຍົາວະຊົນທີ່ອິນໂດເນເຊຍ ພ້ອມໄດ້ໄປແຂ່ງຕໍ່ຮອບສຸດທ້າຍທີ່ປະເທດຍີ່ປຸ່ນ

ເກັ່ງຫຼາຍ MAZDA GB FC ຢູ 12 ຄວ້າແຊ້ມບານເຕະເຍົາວະຊົນ ທີ່ອິນໂດເນເຊຍ ພ້ອມໄດ້ສິດບິນລັດຟ້າໄປແຂ່ງຂັນທີ່ປະເທດຍີ່ປຸ່ນ. ນ້ອງໆເຍົາວະຊົນຈາກສະໂມສອນ Mazda Laos GB FC ໂຊຊຟອງເກັ່ງຄວ້າແຊ້ມລາຍການແຂ່ງຂັນບານເຕະເຍົາວະຊົນລະດັບພາກພື້ນ...

ນາຍົກລັດຖະມົນຕີລາວ ສົ່ງຈົດໝາຍເຖິງນາຍົກລັດຖະມົນຕີໄທ ເພື່ອສະແດງຄວາມຂອບໃຈຕໍ່ການຊ່ວຍເຫຼືອຄົ້ນຫາ ແລະ ກອບກູ້ເອົາຊິວິດປະຊາຊົນທີ່ຕິດຄ້າງຢູ່ໃນຖໍ້າ

ວັນທີ 7 ມິຖຸນາ 2026 ທີ່ນະຄອນຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີລາວ ໄດ້ສົ່ງຈົດໝາຍຂອບໃຈເຖິງທ່ານ ອະນຸທິນ ຊານວີຣະກູນ, ນາຍົກລັດຖະມົນຕີ ແຫ່ງ...