ສຳນັກຂ່າວຕ່າງປະເທດ ລາຍງານໃນວັນທີ 4 ຕຸລາຜ່ານມານີ້ວ່າ ລັດຖະບານເອຢິບ ໄດ້ເຊັນສັນຍາຈ້າງ ບໍລິສັດ China Fortune Land Development Co. Ltd. ຂອງຈີນ ໃຫ້ເປັນຜູ້ດຳເນີນການກໍ່ສ້າງ ເມືອງຫລວງແຫ່ງໃໝ່ຂອງປະເທດ ໄລຍະທີ 2 ດ້ວຍງົບປະມານ 20 ຕື້ໂດລາສະຫະລັດອາເມຣິກາ ໂດຍເມືອງຫລວງແຫ່ງໃໝ່ນີ້ ຈະມີຂະໜາດໃຫຍ່ເທົ່າກັບປະເທດສິງກະໂປ, ມີການວາງແຜນສ້າງສະໜາມບິນ ຂະໜາດໃຫຍ່ເທົ່າກັບ ສະໜາມບິນ Heathrow ຂອງລອນດອນ ປະເທດອັງກິດ, ພ້ອມທັງຈະມີການກໍ່ສ້າງອາຄານສູງກວ່າຫໍໄອແຟນ ນະຄອນຫລວງປາຣີ ຂອງປະເທດຝຣັ່ງ ອີກດ້ວຍ.

ທັງນີ້ ເມືອງຫລວງແຫ່ງໃໝ່ ຈະຖືກສ້າງຂຶ້ນຢູ່ພາກຕາເວັນອອກ ຂອງນະຄອນຫລວງໄຄໂຣ ຊຶ່ງຈະກາຍເປັນສູນກາງທາງດ້ານການເມືອງ, ການບໍລິຫານ ແລະ ທຸລະກິດແຫ່ງໃໝ່ ເພື່ອຊ່ວຍບັນເທົາຄວາມແອອັດຂອງ ນະຄອນຫລວງໄຄໂຣ ທີ່ມີປະຊາກອນເຖິງ 18 ລ້ານຄົນໃນປັດຈຸບັນ.

 
ຕິດຕາມເຮົາທາງFacebook ກົດຖືກໃຈເລີຍ!