Homeຂ່າວພາຍ​ໃນຫົວໜ້າຈັດຕັ້ງສູນກາງຊີ້ ການກໍ່ສ້າງພັກ-ພະນັກງານ ຫລາຍດ້ານຕ້ອງໄດ້ປັບປຸງ ເຜີຍ 5 ປີ ລົງວິໄນສະມາຊິກພັກ ເກືອບ 2 ພັນຄົນ!

ຫົວໜ້າຈັດຕັ້ງສູນກາງຊີ້ ການກໍ່ສ້າງພັກ-ພະນັກງານ ຫລາຍດ້ານຕ້ອງໄດ້ປັບປຸງ ເຜີຍ 5 ປີ ລົງວິໄນສະມາຊິກພັກ ເກືອບ 2 ພັນຄົນ!

Published on

ຂປລ. ທ່ານ ຈັນ​ສີ ​ໂພ​ສີ​ຄໍາ ​ກໍາ​ມະການ​ກົມ​ການ​ເມືອງສູນ​ກາງ​ພັກ, ຄະນະ​ເລຂາທິການ​ສູນ​ກາງ​ພັກ ຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ ​ໄດ້​ແຈ້ງ​ຕໍ່​ກອງ​ປະຊຸມ ​ວຽກ​ງານ​ຈັດ​ຕັ້ງ​ທົ່ວ​ປະ​ເທດ​ ຄັ້ງ​ທີ 10, ​ໃນວັນ​ທີ 22 ສິງຫາ 2016 ນີ້​ວ່າ: ການ​ກໍ່ສ້າງ​ພັກ​-ພະນັກງານ ​ໃນ​ໄລຍະ​ຜ່ານ​ມາ​ ໄດ້​ດໍາ​ເນີນ​ດ້ວຍ​ຫລາຍ​ເນື້ອ​ໃນ, ຫລາຍ​ຮູບ​ການ, ວິທີ​ການ ​ແລະ ​ໄດ້​ປະສົບ​ຜົນ​ສໍາ​ເລັດ​ ໃນ​ຫລາຍ​ດ້ານ​ກໍ​ຕາມ ແຕ່​ກໍ​ຍັງ​ມີ​ຫລາຍດ້ານ​ທີ່ຍັງ​ບໍ່​ສອດຄ່ອງ​ ຕໍ່​ແນວທາງ​ນະ​ໂຍບາຍ​ຂອງ​ພັກ ​ທີ່​ເຮົາ​ຕ້ອງ​ໄດ້​ເອົາ​ໃຈ​ໃສ່​ສືບ​ຕໍ່​ປັບປຸງ​ແກ້​ໄຂ ​ເປັນ​ຕົ້ນ​ແມ່ນ ຄວາມ​ຮັບ​ຮູ້​ເຂົ້າ​ໃຈ​ຂອງ​ພະນັກງານ ​ສະມາຊິກ​ພັກ​ ຕໍ່​ແນວທາງ​ນະ​ໂຍບາຍ​ຂອງ​ພັກ​ ຍັງ​ບໍ່​ທັນ​ເລິກ​ເຊິ່ງ, ບໍ່​ທັນ​ມີການ​ຫັນປ່ຽນ​ທີ່​ຕັ້ງໜ້າ​ ທາງ​ດ້ານ​ແນວ​ຄິດ ​ແລະ ຈິນຕະນາການ, ການ​ຄົ້ນ​ຄວ້າ​ຫັນ​ເອົາ​ແນວທາງ​ຂອງ​ພັກ ​ເປັນ​ແຜນ​ງານ, ​ໂຄງການ​ເພື່ອ​ຈັດ​ຕັ້ງ​ປະຕິບັດ​ຢູ່​ຂັ້ນ​ຂອງ​ຕົນ​ຍັງ​ຊັກ​ຊ້າ, ຈັນ​ຍາ​ບັນ, ຄວາມ​ຮັບຜິດຊອບຕໍ່​ການ​ປະຕິບັດ​ໜ້າ​ທີ່ ​ແລະ ຄວາມ​ເປັນ​ເຈົ້າ​​ ໃນ​ການ​ບໍລິການ​ຮັບ​ໃຊ້​ປະຊາຊົນ​ຍັງ​ບໍ່​ທັນ​ສູງ, ຄຸນ​ທາດ​ການ​ເມືອງ, ຄຸນສົມບັດ​ສິນ​ທໍາ​ປະຕິວັດ, ຄວາມ​ເປັນ​ແບບຢ່າງ​ນໍາ​ໜ້າ​ຂອງ​ສະມາຊິກ​ ພັກ-ພະນັກງານ​ ຈໍານວນ​ໜຶ່ງ ​ມີ​ດ້ານ​ເສື່ອມຖອຍ, ການລະ​ເມີດລະບຽບ​ວິ​ໄນ​ຂອງ​ພັກ, ກົດໝາຍ​ຂອງ​ລັດ, ການ​ສວຍ​ໃຊ້​ໜ້າ​ທີ່​ຕໍາ​ແໜ່​ງ, ອາດຍາ​ສິດ, ສໍ້​ລາດ​ບັງ​ຫລວງ, ​ໃຫ້ ​ແລະ ຮັບ​ສິນ​ບົນ​ ເກີດ​ຢູ່​ໃນ​ການຈັດ​ຕັ້ງ​ຕ່າງໆ ອັນ​ໄດ້​ສົ່ງ​ຜົນ​ສະທ້ອນ​ ເຖິງ​ບົດບາດ​ການ​ນໍາພາ​ຂອງ​ພັກ ​ແລະ ການ​ຄຸ້ມ​ຄອງ​ຂອງ​ລັດເຮົາ​ບໍ່​ໜ້ອຍ.

1-1-2

ທ່ານ ຈັນ​ສີ ​ໂພ​ສີ​ຄໍາ ຍັງ​​ໃຫ້​ຮູ້​ຕື່ມ​ອີກ​ວ່າ: ຍິ່ງ​ໄປ​ກວ່າ​ນັ້ນ ການຈັດ​ຕັ້ງ​ແຕ່ລະ​ຂັ້ນ ​ເຖິງ​ວ່າ​ໄດ້​ຮັບ​ການ​ປັບປຸງ ​ແຕ່​ການ​ເຄື່ອນ​ໄຫວ​ນໍາພາ​ຢູ່ບາງບ່ອນ ຍັງ​ເຮັດບໍ່​ທັນ​​ໄດ້ດີ​ເທົ່າ​ທີ່​ຄວນ, ບໍ່​ທັນ​ໄດ້​ເຄື່ອນ​ໄຫວ​ຊີ້​ນໍາ-ນໍາພາ​ ຕາມ​ພາລະ​ບົດບາດໜ້າ​ທີ່​ຂອງ​ຕົນ, ຄຸນ​ນະພາ​ບ ຂອງ​ການ​ກໍ່ສ້າງ ​ໜ່ວຍ​ພັກເຂັ້ມ​ແຂງ​ຮູ້​ນໍາພາ​ຮອບດ້ານ​ ຈໍານວນ​ໜຶ່ງ​ບໍ່​ທັນ​ສູງ ​ແລະ ບໍ່​ບັນລຸ​ຕາມ​ຄາດໝາຍ​ທີ່​ວາງ​ໄວ້, ຈໍານວນ​ສະມາຊິກ​ພັກ​ໄດ້​ເພີ່ມ​ຂຶ້ນ ​ແຕ່​ຄຸນ​ນະພາ​ບບໍ່​ທັນ​ສູງ, ບາງ​ບ່ອນການ​ຂະຫຍາຍ​ພັກ​ ບໍ່​ຖືກ​ຕາມ​ກົດ​ລະບຽບ​ພັກ​ ແລ່ນ​ນໍາ​ປະລິມານ, ຖື​ເບົາ​ທາງ​ດ້ານ​ຄຸນ​ນະພາ​ບ, ການ​ສຶກສາ​ອົບຮົມ​ ວັດຖຸ​ປະສົງ​ເຂົ້າ​ພັກ​ບໍ່​ທັນ​ເລິກ​ເຊິ່ງ, ຈໍານວນ​ໜຶ່ງ​ເຂົ້າ​ພັກ​ເພື່ອ​ຜົນ​ປະ​ໂຫຍ​ດຂອງ​ຕົນ​ເອງ, ການ​ຂະຫຍາຍ​ພັກ ​ໃນ​ຖັນ​ແຖວ​ພະນັກງານ​ລັດຖະກອນ ​ເພີ່ມ​ຂຶ້ນ​ຫລາຍ, ​ແຕ່​ຢູ່​ຮາກ​ຖານ​ຂັ້ນ​ບ້ານ​ຂະຫຍາຍ​ໄດ້​ໜ້ອຍ, ການ​ຂະຫຍາຍ​ພັກ​ບາງ​ບ່ອນ​ ມີ​ລັກສະນະ​ກຸ່ມ​ກ້ອນ​, ພັກ​ພວກ, ​ຄົນ​ເຈົ້າຄົນ​ຂ້ອຍ, ຮ້າຍ​ແຮງ​ກວ່າ​ນັ້ນ​ ຍັງ​ມີ​ຫາງ​ສຽງວິພາກ​ວິຈານ​ຢາກ​ເຂົ້າ​ພັກ ​ກໍ​ມີ​ການ​ຊື້​ຈ້າງ​ຈອບ​ອອຍ ​ດ້ວຍ​ຮູບ​ການ​ທາງ​ກົງ ​ຫລື ທາງ​ອ້ອມ, ການ​ຕິດຕາມ​ກວດກາ, ຄຸ້ມ​ຄອງ​ປ້ອງ​ກັນ​ການຈັດ​ຕັ້ງ ​ແລະ ຖັນ​ແຖວ​ສະມາຊິກ​ພັກ​ ບາງ​ບ່ອນຍັງ​ເຮັດ​ບໍ່​ທັນ​​ໄດ້ດີ, ມີ​ຈໍານວນ​ໜຶ່ງ ​ເມື່ອ​ເຂົ້າ​ພັກ​ແລ້ວ ​ບໍ່​ມີ​ການເຄື່ອນ​ໄຫວ​ວຽກ​ພັກ, ຫ່າງ​ເຫີ​ນມະຫາຊົນ, ອາດຍາ​ສິດ, ສວຍ​ໃຊ້​ໜ້າ​ທີ່​ຕໍາ​ແໜ່​ງ ຫາ​ຜົນ​ປະ​ໂຫຍ​ດສ່ວນ​ຕົວ​. ໃນ 5 ປີຜ່ານມາ ມີ​ສະມາຊິກ​ພັກ ຖືກ​ລົງ​ວິ​ໄນ​ທັງ​ໝົດ 1.806 ສະຫາຍ, ຍິງ 171 ສະຫາຍ ​ແລະ ​ອອກ​ຈາກ​ພັກ 1.007 ສະຫາຍ, ການ​ດໍາ​ເນີນກອງ​ປະຊຸມ​ໃຫຍ່​ ບາງ​ບ່ອນຍັງ​​ເຮັດ​ບໍ່​ທັນ​ດີເທົ່າ​ທີ່​ຄວນ, ຂະ​ບວນການ​ຕ່າງໆ​ບໍ່​ຟົດ​ຟື້ນ ​ແລະ ບໍ່​ທັນ​ກາຍ​ເປັນຂະ​ບວນການ​ມະຫາຊົນ​ຢ່າງ​ແທ້​ຈິງ, ການ​ປະຕິບັດລວມສູນ​ປະຊາທິປະ​ໄຕພາຍ​ໃນ​ພັກ​ ບາງ​ບ່ອນ​ບໍ່​ທັນ​ເຂັ້ມ​ງວດ, ມີ​ປະຊາທິປະ​ໄຕ​ແບບ​ຮູບ​ການ, ການ​ຂຶ້ນ​ແຜນ​ກໍານົດ​ພະນັກງານ​ ບໍ່​ທັນ​ເປັນ​ລະບົບ​ຄົບ​ຊຸດ, ການ​ຄຸ້ມ​ຄອງ​ພະນັກງານ ​ບໍ່​ທັນ​ປະຕິບັດ​ເຂັ້ມ​ງວດຕາມ​ລະບຽບ​ທີ່​ກໍານົດ​ໄວ້, ບໍ່​ທັນ​ກໍາ​ແໜ້ນ​ການ​ເຄື່ອນ​ໄຫວ​ ຂອງ​ພະນັກງານ, ກົນ​ໄກ​ການ​ປະສານ​ສົມທົບ ລະຫວ່າງ​ສາຍ​ຕັ້ງ, ສາຍ​ຂວາງ​ບໍ່​ທັນ​ເປັນ​ລະບົບ​, ການ​ປະຕິບັດ​ນະ​ໂຍບາຍ​ ຕໍ່​ພະນັກງານ-​ລັດຖະກອນ ບໍ່​ທັນ​ເປັນ​ລະບົບ​ຄົບ​ຊຸດ ​ແລະ ບໍ່​ທົ່ວ​ເຖິງ, ບ່ອນ​ທີ່​ມີ​​ເງື່ອນ​ໄຂ​ ກໍ​ກໍານົດ​ລະບອບນະ​ໂຍບາຍ​ສະ​ເພາະ ​ທີ່​ບໍ່​ສອດຄ່ອງ​ກັບ​ ນະ​ໂຍບາຍ​ລວມ, ການຈັດ​ຕັ້ງ​ລະບົບ​ການ​ເມືອງ​ແຕ່​ສູນ​ກາງລົງ​ຮອດ​ຮາກ​ຖານ ​ບາງ​ບ່ອນ​ບໍ່​ທັນ​ໄດ້​ປັບປຸງ​ຕາມ​ທິດ​ກະທັດ​ຮັດ ​ແລະ ສົມ​ເຫດ​ສົມ​ຜົນ, ກົງຈັກ​ການຈັດ​ຕັ້ງ​ຂັ້ນ​ທ້ອງ​ຖິ່ນ​ຮາກ​ຖານ ​ບາງ​ບ່ອນ​ບໍ່​ທັນ​ສອດຄ່ອງກັບ​ເງື່ອນ​ໄຂ ​ແລະ ບໍລິ​ມາດ​ຂອງ​ວຽກ​ງານ​ຕົວ​ຈິງ, ບາງ​ບ່ອນ​ສ້າງ​ຂຶ້ນ​ແລ້ວ ​ບໍ່​ໄດ້​ເຄື່ອນ​ໄຫວ​ຕາມ​ພາລະ​ບົດບາດ, ຂາດ​ບຸກຄະລາ​ກອນ, ພາຫະນະ​ອຸປະກອນ​ຮັບ​ໃຊ້ ​ແລະ ອາຄານ​ສະຖານ​ທີ່​ເຮັດ​ວຽກ​, ​ເກີດ​ມີ​ຂໍ້​ສະ​ເໜີ​ຮຽກຮ້ອງ​ຕ່າງໆ​ ອັນ​ໄດ້​ສ້າງ​ຄວາມ​ຫຍຸ້ງຍາກ ​ໃຫ້​ແກ່​ອົງການ​ປົກຄອງ​ທ້ອງ​ຖິ່ນ ​ຫລາຍ​ພໍສົມຄວນ.

 

ແຫລ່ງຂ່າວ:

ຂປລ

ຕິດຕາມເຮົາທາງFacebook ກົດຖືກໃຈເລີຍ!

ບົດຄວາມຫຼ້າສຸດ

ນາຍົກລັດຖະມົນຕີລາວ ພົບປະກັບ ປະທານສະພາແຫ່ງຊາດຫວຽດນາມ ໃນໂອກາດເດີນທາງຢ້ຽມຢາມ ສສ ຫວຽດນາມ ແລະ ເຂົ້າຮ່ວມກອງປະຊຸມເວທີອະນາຄົດອາຊຽນ ຄັ້ງທີ 3

ໃນຕອນບ່າຍວັນທີ 8 ມິຖຸນາ 2026, ທີ່ ນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ...

ແຈ້ງການມອດໄຟຟ້າຊົ່ວຄາວ ລັດວິສາຫະກິດໄຟຟ້າລາວ ນວ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ ເລີ່ມແຕ່ວັນທີ 9-14 ມິຖຸນາ 2026

​ລັດວິສາຫະກິດໄຟຟ້າລາວ (EDL) ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ (ມອດໄຟ) ເພື່ອປັບປຸງ, ສ້ອມແປງລະບົບຕາໜ່າງໄຟຟ້າ ແລະ ຕິດຕັ້ງເສົາໄຟຟ້າໃໝ່ ໃຫ້ມີຄວາມປອດໄພ ແລະ ກຽມພ້ອມຮອງຮັບການຊົມໃຊ້ທີ່ດີຂຶ້ນ....

ກຽມໄປແຂ່ງຕໍ່ທີ່ຍີ່ປຸ່ນ MAZDA GB FC U12 ຄວ້າແຊ້ມ ບານເຕະເຍົາວະຊົນທີ່ອິນໂດເນເຊຍ ພ້ອມໄດ້ໄປແຂ່ງຕໍ່ຮອບສຸດທ້າຍທີ່ປະເທດຍີ່ປຸ່ນ

ເກັ່ງຫຼາຍ MAZDA GB FC ຢູ 12 ຄວ້າແຊ້ມບານເຕະເຍົາວະຊົນ ທີ່ອິນໂດເນເຊຍ ພ້ອມໄດ້ສິດບິນລັດຟ້າໄປແຂ່ງຂັນທີ່ປະເທດຍີ່ປຸ່ນ. ນ້ອງໆເຍົາວະຊົນຈາກສະໂມສອນ Mazda Laos GB FC ໂຊຊຟອງເກັ່ງຄວ້າແຊ້ມລາຍການແຂ່ງຂັນບານເຕະເຍົາວະຊົນລະດັບພາກພື້ນ...

ນາຍົກລັດຖະມົນຕີລາວ ສົ່ງຈົດໝາຍເຖິງນາຍົກລັດຖະມົນຕີໄທ ເພື່ອສະແດງຄວາມຂອບໃຈຕໍ່ການຊ່ວຍເຫຼືອຄົ້ນຫາ ແລະ ກອບກູ້ເອົາຊິວິດປະຊາຊົນທີ່ຕິດຄ້າງຢູ່ໃນຖໍ້າ

ວັນທີ 7 ມິຖຸນາ 2026 ທີ່ນະຄອນຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີລາວ ໄດ້ສົ່ງຈົດໝາຍຂອບໃຈເຖິງທ່ານ ອະນຸທິນ ຊານວີຣະກູນ, ນາຍົກລັດຖະມົນຕີ ແຫ່ງ...